4, 5. A Zezi tagsg manesmã buud nen-bʋg la b wilg vẽeneg Rom dãmba 15:1-3 pʋgẽ, la wãn-wãn la kiris-nebã tõe n dɩk a togs-n-taare?

⁴ Paam Kirist tagsgã manesem buud baooda bõe maanego? A Poll lɛtr ning a sẽn taas Rom dãmbã sak 15 wã sõngda tõnd tɩ d leok sʋk-kãngã. Sag-kãng pipi verse rãmbã pʋsẽ a Poll gomda a Zezi zʋg-kãseng yelle, a sẽn wa n yeel tɩ: “A zemsame tɩ tõnd sẽn tar pãnga zɩ neb nins sẽn ka-pãnga zɩɩbo, la ka tɩ maan sẽn noom tõnd mens ye. Bɩ tõnd ned kam fãa maan sẽn noom a yaka, sẽn na yɩ sõma ne-a la a bɩɩb yĩnga. Tɩ bõe, Kirist ka maan sẽn noom bãmb meng ye. La a wa sẽn gʋlsã: ‘Neb nins sẽn tʋʋs yãmb tʋʋsg lʋɩɩ mam zugu.’ ”—Rom dãmba 15:1-3.

6. Wãn-wãn la d tõe n dɩk a Zezi manesmã togs-n-taar kɩɩsg la sãbgr taoore?

⁶ Zʋg-sõng a to a Zezi sẽn puk yaa tagsg la tʋʋm manesem buud sẽn yaa sõma wakat buud fãa. A zɩ n bas neb a taabã manesem sẽn pa sõma wã tɩ sãam a manesem sõngã sẽn tɩ loe ne Wẽnnaam sõgenegã ye. Tõnd me pa segd n bas tɩ neb sãam d manesmã ye. B sã n da sãbgd-a bɩ n namsd-a a sẽn balemd Wẽnnaam ne kɩs-sɩdã yĩnga, a Zezi ra tõogda toog ne maag-m-meng n pa yẽgemdẽ ye. A ra miime tɩ neb nins sẽn baood n na n noog b taab sũy “ne bũmb sẽn yaa sõma la a met tẽebã” segd n gũu kɩɩsg sẽn yit dũniyã sẽn pa tẽed la sẽn pa wʋmdã nengẽ.

7. Wãn-wãn la a Zezi wilg maag-m-menga, la bõe yĩng tɩ d segd n maan wa yẽ?

⁷ A Zezi talla manesem sẽn zems yɛl a taab pʋsẽ. A zɩ n tall yãgb ne a Zeova ye. Sẽn yaa lebende, a gũu A raabã pidsg ne maag-m-menga. (Yɩɩl Sõamyã 110:1, NW; Matɩe 24:36; Tʋʋma 2:32-36; Hebre dãmba 10:12, 13) Sẽn paase, a Zezi pa lebg yãg-yãg soab ne a karen-biisã ye. A yeel-b lame: “Zãms[-y] bũmb nins mam sẽn na n wilg yãmbã.” A sẽn da yaa “sũ-mar soaba” yĩnga, a zãmsgã ra kengda tẽebo. La a sẽn da yaa “nin-nana” wã yĩnga, a ra zɩ n wuk a meng bɩ n tall tɩtaam ye. (Matɩe 11:29) A Poll raoonda tõnd tɩ d rɩk togs-n-taar ne a Zezi manesmã nen-kãensã, a sẽn wa n yeel tɩ: “Tall-y tagsg manesem kãng Kirist Zezi me sẽn da tarã, baa t’a sẽn tall Wẽnnaam wẽnegã, a pa tags n na n deeg a zĩig ye, sẽn dat n yeel tɩ zeng Wẽnnaam ye. Ayo, la a faaga a menga, n dɩk yamb wẽnego, la a puka ninsaalb wẽneg pʋgẽ.”—Filip rãmba 2:5-7, NW.

8, 9. a) Bõe yĩng tɩ d segd n modg n bɩɩs manesem sẽn pa rat-m-yembre? b) Bõe yĩng tɩ d pa segd n koms raoodo, d sã n wa pa tõog n tũ makr ning a Zezi sẽn basã wakat ninga, la wãn-wãn la a Poll yɩ mak-sõng ne rẽ?

⁸ Yaa nana tɩ d yeel tɩ d rat n sõgna neb a taabã la tɩ d rat n dɩka b ratmã n lʋɩɩs tõnd rẽndã taoore. La d sã n vaees d tagsgã manesem ne pʋ-peelem, tõe n mikame tɩ tõnd sũyã pa nong n maand woto zãng ye. Bõe yĩnga? Pipi, yaa d sẽn dog ne rat-m-yembrã sẽn yit a Ãdem ne a Hawa nengẽ wã. Yiib-n-soaba, yaa tõnd sẽn vɩ dũni pʋgẽ sẽn sõngd n wat ne rat-m-yembrã yĩnga. (Efɛɛz rãmba 4:17, 18) Bɩɩs manesem sẽn pa rat-m-yembr manesem nong n baoodame tɩ d bɩɩs tagsg buud sẽn yaa lebend ne tõnd sẽn dog ne pa-zems-zãng ningã. La baoodame tɩ d rɩk sard sõma la d modge.