A Zeova pa zũnd-zãnd Wẽnnaam ye. (1 Korẽnt rãmbã 14:33) Dẽnd zemsame t’a nin-buiidã me yɩ neb sẽn sigl sõma. Wãn to la kiris-nebã tigingã sigl-yã? Bõe la d tõe n maan n sõng t’a kell n sigl sõma?

1. Ãnda la tigingã zu-soaba?

‘Kiristã yaa tigingã zu-soaba.’ (Efɛɛz rãmbã 5:23) A bee saasẽ, n get a Zeova nin-buiidã sẽn be dũniyã gill zugã tʋʋmdã yelle. A Zeezi yãka kãsem-dãmb sẽn tar minim sulli, tɩ b yaa “tʋm-tʋmd sẽn tũud sɩd la sẽn tar yamã,” b sẽn boond me tɩ siglgã taoor lʋɩtb sullã. (Karm-y Matiye 24:45-47.) Wa tẽn-tʋmdbã la kãsem-dãmbã sẽn da be Zerizalɛm pipi kiris-nebã wakatẽ n wilgd kiris-nebã sorã, siglgã taoor lʋɩtb sull me wilgda tigimsã sẽn be dũniyã gill zugã sore. (Tʋʋma 15:2) La nin-kãensã pa siglgã nanambs ye. B teegda a Zeova, la b vaeesd a Gomdã sẽn na yɩl n bãng b sẽn tog n maane. B sakda a Zeezi zu-sobendã me.

2. Kãsem-dãmbã tʋʋmd yaa bõe?

Kãsem-dãmbã yaa kiris-neb tẽeb sẽn bɩ. Ne Biiblã maasem, b zãmsda a Zeova nin-buiidã, n sõngd-b la b kengd b raoodo. B pa reegd yaood b tʋʋmdã yĩng ye. B pʋd n tʋmda ne “yamleoog Wẽnnaam taoore.” Pa b sẽn “dat n paam ligd la arzɛgs yĩng ye.” La yaa ne b “sũur fãa.” (1 Pɩyɛɛr 5:1, 2) Kãsem-sõngdbã sõngda kãsem-dãmbã. Tarẽ-n-tarẽ, bãmb me tõe n wa lebga kãsem-dãmba.

Siglgã taoor lʋɩtb sull yãkda kãsem-dãmb kẽer tɩ b lebgd tigims sull yel-gɛtba. B kaagda tigims toor-toor n kõt-b sagls la b kengd b raoodo. Tigims sull yel-gɛtbã tũuda noy nins sẽn be Biiblã pʋgẽ wã, n bãng b sã n tõe n yãka saam-biig ning t’a lebg kãsem-sõngd bɩ kãsem-soaba.—1 Tɩmote 3:1-10, 12; Tɩte 1:5-9.

3. A Zeova Kaset soab fãa tʋʋmd yaa bõe?

Tigingã nebã fãa pẽgda ‘a Zeova yʋʋrã.’ (Karm-y Yɩɩn-sõamyã 148:12, 13.) Wala makre, b kẽesda b toog tigissã sasa, la b moond koɛɛgã wa b sẽn tõe fãa.

D BAO N BÃNG N PAASE

4. A Zeezi yaa taoor soab sẽn yaa nin-bʋgsgo

A Zeezi ratame tɩ tõnd sak t’a yɩ d taoor soaba. Karm-y Matiye 11:28-30, tɩ rẽ poor bɩ y leok sokrã:

• A Zeezi ratame tɩ d sã n sak a taoor-sobendã bɩ naf-d wãn to?

VIDEO: Kãsem-dãmbã sẽn maane, tẽn-digimdgã sẽn zĩnd Nepall soolmẽ wã poore (4:56)

Biiblã pʋgẽ, b wilgda kãsem-dãmbã sẽn segd n tʋm b tʋʋmdã to-to wã vẽenega.

Karm-y Ezayi 32:2 la 1 Pɩyɛɛr 5:1-3, tɩ rẽ poor bɩ y leok sogsgã:

• Yãmb sẽn mi tɩ kãsem-dãmbã me rata ne b sũur fãa n bels b taabã wa a Zeezi wã, kɩtame tɩ y tagsg yaa wãna?

• Zĩ-bʋs wɛɛngẽ me la kãsem-dãmbã rɩkd a Zeezi togs-n-taare?

5. Kãsem-dãmbã kõta mak-sõngo

VIDEO: Kãsem-dãmbã lʋɩta taoore! (7:39)

A Zeezi wilga neb nins sẽn lʋɩt taoor tigingã pʋgẽ wã sẽn segd n maane. Karm-y Matiye 23:8-12, tɩ rẽ poor bɩ y leok sogsgã:

• Biiblã pʋgẽ, bõe la b yet kãsem-dãmbã wɛɛngẽ? Yãmb tagsdame tɩ tũudmã taoor dãmb tũuda rẽ bɩ?

1. A. Kãsem-dãmbã modgdame tɩ bãmb ne a Zeova zoodã kell n tall pãnga, la b sõngd b zagsã rãmb tɩ bãmb ne a Zeova zoodã me kell n tall pãnga

2. B. Tigingã nebã fãa yell paka ­kãsem-dãmbã

3. D. Kãsem-dãmbã moonda koɛɛgã n pa vaandẽ ye

4. E. Kãsem-dãmbã yaa karen-saam-dãmba. B leb n sõngda ne Rĩungã roog yẽesgo, la tʋʋm a taaba

6. D tõe n teela kãsem-dãmbã

Biiblã pʋgẽ, b wilgda d sẽn segd n teel kãsem-dãmbã võore. Karm-y Ebre-rãmb 13:17, tɩ rẽ poor bɩ y leok sogsgã:

• Bõe yĩng tɩ b yeel tɩ d segd n saka neb nins sẽn lʋɩt taoorã ne yamleoogo? Yãmb tagsg yaa wãn rẽ wɛɛngẽ?

Karm-y Luk 16:10, tɩ rẽ poor bɩ y leok sokrã:

• Bõe yĩng tɩ tar yõod tɩ d teel kãsem-dãmbã baa yel-bõones pʋgẽ?

KƲMSGO

A Zeezi n yaa tigingã zu-soabã. Tõnd teenda kãsem-dãmbã sẽn sakd a Zeezi wã ne yamleoogo, bala b belsda tõndo, la b kõt tõnd mak-sõngo.

Lebg-n-gese

• Ãnda la tigingã zu-soabã?

• Wãn to la kãsem-dãmbã sõngd tigingã nebã?

• A Zeova Kaset soab fãa tʋʋmd yaa bõe?

BŨMB A TAABA

Kaset sẽn wilgd tɩ rũndã-rũndã me, kiris-nebã yell sɩd paka siglgã taoor lʋɩtb sullã neb la kãsem-dãmb a taabã.

B kenga d tẽed-n-taas nins b sẽn namsd b tũudmã yĩngã tẽebo (4:22)

Tigims sull yel-gɛtbã sẽn tʋmd tʋʋm ninsi.

Tigims sull yel-gɛt sẽn gilgd n kaagd tigims tẽn-bõones pʋsẽ vɩɩm (4:51)

Pagbã sẽn tar yõod ning tigingã pʋgẽ.

“A Zeova Kaset rãmbã tũudmã pʋgẽ, pagbã moonda koɛɛgã bɩ?” (Yʋʋmd 2012 bõn-bɩʋʋng kiuug pipi daar Gũusg Gasgã)

Kãsem-dãmbã sẽn tʋmd wʋsg to-to n kengd b tẽed-n-taasã raoodo.

“Kãsem-dãmbã yaa ‘tʋmd-n-taas tõnd sũ-noog yĩnga’” (Yʋʋmd 2013 yʋʋm-vẽkr kiuug pipi daar Gũusg Gasgã)

1. Biiblã pʋgẽ, sagl-bʋs la b kõt pʋg-sɩdbã?

A Zeova yãka sɩdã, tɩ yẽ la zakã soaba. (Karm-y Efɛɛz rãmb 5:23.) A Zeova ratame t’a bãngd n yãkd yam sẽn nafd a zakã rãmba. Biiblã pʋgẽ, b yeta sɩdbã yaa: “Kell-y n nong-y y pagbã.” (Efɛɛz rãmbã 5:25) Woto rat n yeelame tɩ bõe? Yaa zakẽ tɩ yaa neb sʋka, rao segd n talla bʋgsem ne a paga. A kogend-a lame la a maand a sẽn tõe fãa n get a yelle, la a getẽ me t’a tar sũ-noogo. (1 Tɩmote 5:8) Sẽn yɩɩd fãa, a geta a tẽebã yelle, n sõngd-a sẽn na yɩl t’a tall zood sõma ne a Zeova. (Matiye 4:4) Wala makre, yẽ ne a pagã tõe n naaga taab n pʋʋse, la b karem Biiblã ne taaba. Rao sã n get a pag yell ne nonglem, kɩtdame tɩ yẽ mengã kell n tall zood sõma ne a Zeova.​—Karm-y 1 Pɩyɛɛr 3:7.

A Zeezi n yaa kiris-neb tigingã zu-soaba. (Efɛɛz rãmbã 5:23) Rũndã-rũndã, a Zeezi bee saasẽ n get a poorẽ dãmbã yell ne “tʋm-tʋmd sẽn tũud sɩd la sẽn tar yamã” maasem. (Karm-y Matiye 24:45.) A Zeezi mengã n yãk tʋm-tʋmdã n kõ-a sor t’a tõe n yãk yam bũmb kẽer wɛɛngẽ. La a segd n ket n sakda a Zeezi, la a tʋm Kiristã ba-biisã yĩnga. Ãnda la tʋm-tʋmdã? Wãn to la a get tõnd yelle?