Ges F Zãmsgã Yell Neer Wakat Fãa

“Gũus f meng ne koɛɛg ninga fo sẽn zãmsd nebã, la ges bõn-kãens n da bas ye, tɩ bõe, yaa woto la fo na n fãag f menga la neb nins sẽn kelgd foomã.”—1 TƖMOTƖ 4:16.

1, 2. Bõe yĩng tɩ karen-saam dãmb sẽn tar yẽesem daab be rũndã-rũndã ne yãgbo?

“KẼNG-Y n maan buudã fãa neb tɩ b yɩ karen-biisi, . . . n zãmsd-b tɩ b tũ bũmb nins fãa mam sẽn kõ yãmb noorã.” (Matɩe 28:19, 20, NW ) A Zezi Kirist sẽn kõ no-kãngã wã yĩnga, kiris-neba segd n modgdame n lebg karen-saam dãmba. D rata karen-saam dãmb sẽn tar yẽesem sẽn na yɩl n sõng pʋ-peelem dãmbã tɩ b wa paam Wẽnnaam bãngrã tɩ nan da kẽ n bõog ye. (Rom dãmba 13:11) Tʋm-tʋmd a Poll saglame: “Bɩ f moon Wẽnnaam koɛɛgã, la f nang pãng wakat fãa, nana wala toog pʋgẽ.” (2 Tɩmotɩ 4:2) Rẽ baooda zãmsg kũun tigengã pʋgẽ la a yɩngã. Sɩda, moonegã tẽn-tʋmd mengã baoodame tɩ d maan tɩ yɩɩg Wẽnnaam koɛɛgã taasg bala. Zãmsg sẽn yaa sõma yaa tɩlae, d sã n dat tɩ sẽn wilgd-b ratmã lebg karen-biisi.

² Tõnd vɩɩ “wakat tood a vɩɩmdg sẽn pa nana” pʋgẽ. (2 Tɩmotɩ 3:1, NW ) Dũniyã filozofi rãmb la ziri zãmsg buya nebã yam. Neb wʋsg bee “yam-tagsg lik pʋgẽ” la b “ye pa tar vɩɩm manesem tɩrg yĩn-sidg ba a yembre.” (Efɛɛz rãmba 4:18, 19, NW ) Neb sãnda tara yĩn-sidg pogls sẽn namsd-ba. Sɩda, neba “sũyã [sɩd] sãama wʋsgo la bãmb pãnga fãa sɛɛme. Bãmb yaa wa piis sẽn ka tar kɩɩm ye.” (Matɩe 9:36) Baasg zãnga, d sã n tũnug ne zãmsg tõogo, d tõe n sõnga pʋ-peelem dãmbã tɩ b maan toeeng ning sẽn yaa tɩlayã.

Karen-saam dãmb tigengã pʋgẽ

3. a) Bõe n be a Zezi tẽn-tʋmd ning sẽn yaa zãms neba sʋka? b) Ãnd n tar zɩɩb pipi n na n kõ zãmsg tigengã pʋgẽ?

³ Ne yirẽ Biibl zãmsgã maasem yĩnga, neb milyõ rãmb n paamd zãmsgo. La b lisgã poore, nin-paalsã rata sõngr sẽn na yɩl n “kɩ yẽg n yẽbg” kãn-kãe. (Efɛɛz rãmba 3:17) Sasa ning d sẽn pidsd a Zezi tẽn-tʋmd ning sẽn be Matɩe 28:19, 20, NW pʋgẽ wã la d teesd nin-paalsã a Zeova siglgã, nin-kãens sẽn paamd zãmsg tigengã meng pʋgẽ wã nafd-b lame. Sã n yaa ne Efɛɛz rãmba 4:11-13, roap la b yãk tɩ b sõgen wa “pe-kɩɩmba, la kẽer karen-saam dãmba, Wẽnnaam neba bɩɩb yĩnga, la Wẽnnaam tʋʋmda yĩnga, la Kirist yĩnga sõngr yĩnga.” Wakat-wakate, b zãmsg tõogã baoodame tɩ b ‘lenge la b sagl ne sũ-maasem wʋsgo, la b zãms nebã.’ (2 Tɩmotɩ 4:2) Karen-saam dãmbã tʋʋmd ra tara yõod wʋsg hal n kɩt t’a sẽn da waa n gʋlsd Korẽnt dãmbã, a Poll sõdga karen-saam dãmbã tʋm-tʋmdbã la no-rɛɛsdbã poor bala.—1 Korẽnt dãmba 12:28.

4. Wãn-wãn la zãmsgã tõog sõngd tõnd tɩ d sak a Poll saglg ning sẽn be Hebre dãmba 10:24, 25 pʋgẽ wã?

⁴ Sɩda, pa kiris-nebã fãa n sõgend wa kẽem dãmb bɩ yel-gɛtb ye. Baasg zãnga, b fãa paamda raoolg n na n tus taab tɩ b “maan nonglem la tʋʋm sõama.” (Hebre dãmba 10:24, 25) Woto maaneg tigissẽ wã baoodame tɩ d segl sõma, leoor sẽn segl sõma la f sẽn kõt ne f sũur sẽn tõe n keng tẽeb tõe n kõo neb a taabã zãmsg la raool-ba. Rĩungã koe-moondb sẽn tar minim tõeeme me n ‘yik taab ratem tɩ maan tʋʋm sõama,’ b sã n taas b bãngrã la b minima nin-paalsã, b sã n wa tʋmd ne-b pʋʋgã tʋʋmdẽ. Wakat a woto la segb sẽn pa yãk wakate, zãmsg sẽn tar yõod la b tõe n kõ. Wala makre, b sagenda pagb nins sẽn bɩ wã tɩ b “zãms neb a taab sẽn yaa sõama bala.”—Tɩt 2:3.

B kɩtame tɩ b sak n tẽ

5, 6. a) Wãn-wãn la kiris-nedemd hakɩkã yaa lebend ne ziri balengã? b) Wãn-wãn la kẽem dãmbã sõngd nin-paalsã tɩ b rɩk sard sẽn be yam?

⁵ Woto, kiris-nedemd hakɩkã yaa lebend zãng fasɩ ne ziri tũudmã, tɩ wʋsg baood n na n soog b nebã tagsa wã. A Zezi sẽn da wa n be tẽng zugã, tũudmã nanambs baoome n na n soog nebã vɩɩm nens fãa la bal n tũnug ne minund sẽn weoogd sẽn yit ninsaalb nengẽ. (Luk 11:46) Dũni kiris-nedemdã tũudum taoor dãmb maana woto naoor wʋsgo.

⁶ Baasg zãnga, baleng hakɩkã yaa “baleng tʋʋmd” tõnd sẽn kõt ne d “tagsgã tõogo.” (Rom dãmba 12:1, NW ) B ‘kɩtdame t’a Zeova sõgen dãmbã sak n tẽ.’ (2 Tɩmotɩ 3:14, NW ) Wakat-wakate, tõe n wa yaa tɩlae ne neb nins sẽn lʋɩt taoorã tɩ b yãk noy kẽer la na-kẽndɩ kẽer sẽn na yɩl n tɩ tigengã mars sõma. Baasg zãnga, wall tɩ b bao n dɩk sard kiris-nin-taasã yĩnga, kẽem dãmbã zãmsd-b lame tɩ b ‘bãng sõama ne wẽng n bake.’ (Hebre dãmba 5:14) Sẽn yɩɩd fãa kẽem dãmbã maanda woto n dɩlgd tigengã ne “tẽeb koɛɛga la karen-sõnga.”—1 Tɩmotɩ 4:6.

Y sẽn na n gũus ne y zãmsgã to-to

7, 8. a) Wãn-wãn la neb nins tõod sẽn pa zãag zĩigã tõe n yɩ karen-saam dãmba? b) Bõe n wilgd tɩ modgr sẽn yit f meng nengẽ yaa tɩlae sẽn na yɩl n lebg karen-saamb sẽn womd biisi?

⁷ La bɩ d leb moonegã tẽn-tʋmd sẽn yaa d fãa rẽndã zugu. A baoodame tɩ d tall minim, zãmsg bɩ tõod zall sẽn na yɩl n kẽes d mens tʋʋm-kãngã pʋgẽ bɩ? Pa tɩlae ye. Sẽn yɩɩd fãa, yaa neb sẽn yaa wa b taabã la sẽn tar tõod sẽn pa zãag zĩig n pidsd dũni gill zãmsg tʋʋm-kãngã. (1 Korẽnt dãmba 1:26-29) A Poll wilgdame: “Tõnd tara arzɛk kãng [ministɛɛrã] yagd laas [yĩns sẽn pa zems zãng] pʋsẽ, sẽn na yɩl tɩ pãng ning sẽn yɩɩd pãn-zaalgã yɩ Wẽnnaam dẽnda la ka sẽn yit-a tõnd mensẽ wã ye.” (2 Korẽnt dãmba 4:7, NW ) Tõogr kãseng ning Rĩungã mooneg tʋʋmd sẽn paamd dũniyã gill zugã yaa bũmb sẽn wilgd a Zeova vʋʋsmã pãnga!

⁸ Baasg zãnga, rẽnda ned kam fãa maan modgr n lebg “tʋm-tʋmd sẽn kõn zoe yãnd ye, la sẽn togsd sɩd koɛɛga tɩrg bala.” (2 Tɩmotɩ 2:15) A Poll sagla a Tɩmotɩ: “Gũus f meng ne koɛɛg ninga fo sẽn zãmsd nebã, la ges bõn-kãens n da bas ye, tɩ bõe, yaa woto la fo na n fãag f menga la neb nins sẽn kelgd foomã.” (1 Tɩmotɩ 4:16) Wãn-wãn la ned maand gũusg ne a zãmsgã tigengã pʋgẽ bɩ a yɩngã? Neb nins sẽn maand woto wã baooda tɩlae tɩ b tall minim kãseng bɩ zãmsg modɛll kãsems bɩ?

9. Bõe n tar yõod n yɩɩd rog-ne tõodã?

⁹ Sɩd-sɩda, a Zezi wilgame t’a tara zãmsg tõog sẽn yaa zall a Tãng zug Zãmsgã yʋʋr sẽn yi wã pʋgẽ. A sẽn gom n sa wã, “kʋʋnga yɛɛsa bãmb karenga yĩnga.” (Matɩe 7:28) Yaa sɩd tɩ tõnd ned ba a yembr pa tõe n kõ zãmsg tɩ yɩ sõma wa a Zezi sẽn maana ye. Baasg zãnga, pa tɩlae tɩ d yɩ gom-minim dãmb n tõog n yɩ karen-saam dãmb sẽn womd biis ye. Ges-y, sã n yaa ne Zoob 12:7, NW baa “yir dũms” la “bõn-yɩgdɩ” tõe n kõo zãmsg tɩ pa tũ ne no-goam ye! Ne rog-ne tõod bɩ minim d sẽn tõe n tarẽ wã, sẽn yɩɩd fãa, yaa d sẽn yaa ‘neb nins buudã n tar yõod n yɩɩda’: zʋgd nins tõnd sẽn tarã la tẽeb minund nins d sẽn bɩɩs tɩ karen-biigã tõe n dɩk togs-n-taar ne wã.—2 Pɛɛr 3:11, NW; Luk 6:40.

Wẽnnaam Gomdã zãmsdba

10. Wãn-wãn la a Zezi kõ mak-sõng Wẽnnaam Gomdã zãmsg wɛɛngẽ?

¹⁰ Gʋlsgã sɩd karen-saam sẽn womd biis segd n yaa Wẽnnaam Gomdã zãmsda. (Rom dãmba 2:21) A Zezi Kirist kõo mak-kãseng rẽ wɛɛngẽ. A ministɛɛrã sasa, a Zezi lebg n togsame bɩ a goma tagsa sẽn yaa yembr ne sẽn zems Hebre Gʋlsgã sɛb sõor pʋɩ-sʋka.a A minimã ne Wẽnnaam Gomdã ra yaa vẽeneg a sẽn da wa n tar yʋʋm 12, b sẽn da wa n yã-a t’a ‘zĩ karen-saam dãmba sʋka n kelgd bãmba, la a sokd bãmb bũmb wʋsgã.’ (Luk 2:46) A sẽn da wa n lebg kãsma, a Zezi ra minimame n kẽngd sɩnagoogẽ wã b sẽn da karemdẽ Wẽnnaam Gomdã.—Luk 4:16.

11. Zãmsg minimd bʋs sẽn yaa sõma la karen-saamb segd n bɩɩse?

¹¹ Yãmb yaa ned sẽn sɩd nong Wẽnnaam Gomdã kareng bɩ? A pʋgẽ vaeesg yaa bõn-tũnugdg ning sabab “yãmb sẽn na n bãng a Zeova zoees võore, la y na n paama Wẽnnaam bãngrã menga.” (Yelbũna 2:4, 5, NW ) Woto yĩnga, bɩɩs-y zãmsg minimd sẽn yaa sõma. Mak-y n karem Wẽnnaam Gomdã babg a yembr daar fãa. (Yɩɩl Sõamyã 1:2) Minim-y n karemd Gũusg Gasgã la Réveillez-vous! wã sebr fãa tao-tao, y sẽn paam-b bala. Kelg-y tigengã tigems sõma. Zãms-y n maan vaeesg neere. Y sã n zãmsd n ‘fees bũmb fãa tɩ yɩ takɩ,’ y na n laka y meng ne maan-tɩ-loog la togsg sẽn pa takɩ, y sã n wa kõt zãmsgo.—Luk 1:3, NW.

Nonglem la waoogr ne neb nins b sẽn kõt zãmsgã

12. A Zezi manesem ne a karen-biisã ra yaa wãn-wãna?

¹² Zʋgd a to sẽn yaa kãseng yaa manesem sẽn zems ne neb nins yãmb sẽn zãmsdã. Fariziẽ rãmbã ra tara paoogr yĩn-sidg ne neb nins sẽn kelg a Zezi wã. “Kʋʋng kãngã ka mi tõog ye, b yaa zu-beed rãmba,” woto la b yeel-yã. (Zã 7:49) La a Zezi ra tara nonglem la waoogr wʋsg ne a karen-biisã. A yeelame: “Mam kõn le bool yãmb tɩ tʋm-tʋmdb ye, tɩ bõe, tʋm-tʋmd ka mi a zu-soab sẽn maand bũmb ninga ye. La mam boola yãmb tɩ m zo-rãmba, tɩ bõe, bũmb nins fãa mam sẽn wʋm m Ba nengẽ wã, mam togsa yãmba.” (Zã 15:15) Rẽ wilga a Zezi karen-biisã sẽn segd n kẽng taoor ne b zãmsgã tʋʋmd to-to.

13. A Poll tagsg ra yaa bõe ne neb nins a sẽn zãmsã?

¹³ A Poll pa tall yĩn-sidg kaalem bɩ manesem sẽn wõnd neb sẽn maand afɛɛr dãmb ne taab ne a karen-biisã ye. A yeela Korẽnt dãmbã: “Baa yãmb sã n paam karen-saam dãmb tus piig Kirist sora pʋgẽ, baasgo, yãmb ka tar ba rãmb wʋsg ye; tɩ bõe, maam n dog yãmb Kirist Zezi tũudma pʋgẽ ne Koenoogã.” (1 Korẽnt dãmba 4:15) Wakat kẽere, a Poll raaga nintãm menga, a sẽn da wa n sagend neb nins a sẽn zãmsã! (Tʋʋma 20:31) A wilga sũ-mar la sõmblem sẽn yaa kãseng wʋsg me. Woto yĩnga a ra tõe n yeela Tesalonik rãmbã woto: “Tõnd maana sũ-bʋgsem wʋsg yãmb sʋka. La a wa kom-bõoneg wubd sẽn gũud bãmb ne nonglma.”—1 Tesalonik rãmba 2:7.

14. Bõe yĩng tɩ tar yõod wʋsg woto tɩ d wilg ratem ne d Biibl zãms rãmbã? Kõ-y makre.

¹⁴ Yãmb rɩkda a Zezi la a Poll togs-n-taar bɩ? Nonglem ne pʋ-peelem ne d karen-biisã tõe n loka rog-ne tõodã d sẽn tõe n pa tarẽ wã. Tõnd Biibl zãms rãmbã neeme tɩ tõnd tara nonglem ne pʋ-peelem ne-b bɩ? D rɩkda sẽk n zãms n bãng-b bɩ? Sẽn da wa n yaa toog ne kiris-nin-poak t’a sõng Biibl zãms-poak t’a kẽng taoor tẽebã wɛɛngẽ, a sʋka ne nonglem: “Bũmb n namsd yãmb la?” Pagã sɩngame n togsd sẽn be a sũurẽ wã, n togsd yɛl wʋsg sẽn pak-a la sẽn kõt-a yɩɩre. Sõs-kãngã sẽn tall nonglmã waa ne toeeng kãseng pagã nengẽ. Yɛl a woto pʋsẽ, tagsa sẽn tik Gʋlsgã zug la belsg goam zemsame. (Rom dãmba 15:4) La d gũusi: Biiblã zãmsd tõe n bɩta tao-tao, la a tõe n ket n tara manesem sẽn pa zems ne kiris-ned rẽnd n segd n demse. Woto, tõeeme n pa yɩ yam bũmbu, d sã n pẽ wʋsg ne nedã tɩ loog ye. D segd n ket n paada kiris-ned kogsã pʋsẽ tɩ zemse.—1 Korẽnt dãmba 15:33.

15. Wãn-wãn la d tõe n wilg waoogr ne d Biibl zãms rãmbã?

¹⁵ Waoogr ne d Biibl karen-biisã baoodame tɩ d ra mak n soog b vɩɩmã ye. (1 Tesalonik rãmba 4:11) Wala makre, tõe tɩ d zãmsda Biiblã ne pag sẽn vɩ ne rao n pa kẽ kãadem ye. Tõe tɩ b paama kamb ne taaba. A sẽn wa n paam Wẽnnaam bãngr sẽn yaa takɩ, pagã ratame n dems yɛlã ne a Zeova. (Hebre dãmba 13:4) A segd n kẽe kãadem ne rao wã bɩ n welg ne-a bɩ? Tõe tɩ d tags wʋsg tɩ kẽ kãadem ne rao sẽn pa wilgd tẽeb ratem wʋsg bɩ baa bilf na n gɩdga pagã bɩʋʋngã beoog-daare. Sẽn yaa lebende, d tõeeme me n yɛɛs a kambã yɩ-neer yĩng n tags t’a sẽn na n kẽ kãadem ne rao wã n são. Sẽn ya a soab fãa, yaa bũmb sẽn yaa paoogr la nonglem kaalem bũmb tɩ d kẽes d toog karen-biig vɩɩm pʋgẽ n mak n modg-a t’a sak tõnd mengã tagsa yel-kãensã wɛɛngẽ. Sẽn ya a soab fãa, yaa yẽ n segd n vɩɩmd ne sardã biisã. Rẽ, pa são tɩ d zãms karen-biig a woto t’a rɩk a mengã “yam-welgr tõodã” n tʋm la a rɩk a toorẽ sard ne a sẽn segd n maan bũmb ning sɩda?—Hebre dãmba 5:14.

16. Wãn-wãn la kẽem dãmbã tõe n wilg nonglem la waoogr ne Wẽnnaam bãgrã?

¹⁶ Sẽn yɩɩd fãa, tara yõod tɩ tigengã kẽem dãmb tall nonglem la waoogr manesem ne bãgrã. A sẽn gʋlsd a Filemo wã a Poll yeelame: “Baa mam sẽn tar Kirist noor tɩ togs foom tɩ f maan sẽn zemsã, yaa ne nonglem la mam dat n kos foo bõn-kãnga.” (Filemo 8, 9) Wakat-wakate, yɛl sẽn sãamd sũy tõe n puka tigengã pʋgẽ. Tõe tɩ keoogr sẽn pa vigsd meng yɩ tɩlae. A Poll sagla a Tɩt t’a “ket n lengd [bʋdgdbã] ne pãng tɩ b paam laafɩ tẽebã pʋgẽ.” (Tɩt 1:13, NW ) Baa ne rẽ fãa, yel-gɛtbã segd n gũusame n da gom goam sẽn ka nonglem ne tigengã ye. A Poll gʋlsame: “Zusoaba tʋm-tʋmd ka tog n maan zabr ye. A tog n yɩɩ sũ-bʋgsem soab ne neba fãa la sẽn tõe n zãms neb a taaba la maan sũ-mare.”—2 Tɩmotɩ 2:24; Yɩɩl Sõamyã 141:3.

17. Tudgr bʋg la a Moiiz maan-yã, la bõe zãmsg la kẽem dãmbã tõe n paam dẽ pʋgẽ?

¹⁷ Yel-gɛtbã segd n tẽega wakat fãa tɩ yaa “Wẽnnaam piisa” la sẽn be b taoorã. (1 Pɛɛr 5:2) Baa ne a Moiiz sẽn da yaa sik-m-meng soabã, a yĩmã yel-kãngã wakat bilf pʋgẽ. Israɛll nebã “kɩtame tɩ yẽ sũur yik t’a gom tʋʋlga.” (Yɩɩl Sõamyã 106:33) Wẽnnaam sũur pa yɩ noog baa bilf ne b sẽn tall manesem yook kãngã ne A nin-buiidã ye, baa ne b sẽn sɩd ra tar taalã. (Sõdbo 20:2-12) B sã n wa seg yel-tood sẽn wõnd woto rũndã-rũndã, kẽem dãmbã segd n modgame n kõ zãmsg ne yam-vẽenem la sõmblem. Tõnd saam-biisã sakda sõma, b sã n get-b yembr-yembrã ne naneb wa neb sẽn dat sõngre, la pa wa wẽng maandb b sẽn pa tõe n dems ye. Kẽem dãmbã segd n talla tagsg sẽn zems ning a Poll sẽn da tall a sẽn wa n yeel tɩ: “D tara bas-yard Soaalã pʋgẽ yãmb wɛɛngẽ, tɩ y maandame la y na n ket n maanda bũmb nins tõnd sẽn kõt yãmb noorã.”—2 Tesalonik rãmba 3:4, NW.

A pidsda b ratmã

18, 19. a) Wãn-wãn la d segd n pids d Biibl zãms rãmb nins tõod sẽn yaa bilfã ratem? b) Wãn-wãn la d tõe n sõng karen-biis nins sẽn get tɩ yɛl kẽer takɩ võor-wʋmb pa nana wã?

¹⁸ Karen-saam sẽn womd biis ratame n zems a meng ne a karen-biisã tõod la b kogse. (Mak-y ne Zã 16:12.) A Zezi bilgrã sẽn gomd talã rãmbã yellã pʋgẽ, zu-soabã kõta zu-noodã “ned kam fãa sẽn zems-a.” (Matɩe 25:15) D tõe n tũu mak-kãngã, d sã n wa maand Biibl zãms rãmba. Wala sẽn zemse, d ratame n karem sebr sẽn tik Biiblã zug wakat koɛɛg sẽn zems pʋgẽ. La d segd n sak n deegame tɩ pa nebã fãa n tõe n karem sebr sõma, bɩ n tar tõog n na n wʋm tags-paals võor tao-tao ye. Woto yĩnga, yam-welgr yaa tɩlae, sã n yaa ne wakat ning d sẽn segd n long tags-zẽng zãmsgã pʋgẽ wã, sã n mik tɩ yaa toog ne neb sẽn wilgd ratem tɩ b kẽng tʋʋll-tʋʋll ye. Sõng karen-biisã tɩ b wʋm b sẽn zãmsdã võor tara yõod n yɩɩd sa babg sẽn yaa takɩ wakat fãa.—Matɩe 13:51.

¹⁹ B tõe n yeela woto me ne Biiblã zãmsdb nins sẽn pa wʋmd yɛl kẽer võor sõma nana-nana wala sẽn tɩ loe ne Tãablmã bɩ tũudmã tigã. Baa ne sẽn nong n pa tɩlae tɩ d paas vaeesg gom-zut sẽn tik Biiblã zug d zãmsgẽ wã, wakat ninga d tõe n maana woto, sã n yaa vẽeneg tɩ rẽ na n talla nafre. D segd n talla tagsg sẽn zems n da wa kɩt tɩ Biibl zãmsã taoor-kẽngr maag zaalem yĩng ye.

Tall-y yamleoogo!

20. Wãn-wãn la a Poll kõ mak-sõng sã n yaa ne wilg yamleoog la bas-yard sẽn pa vigsd a zãmsgã pʋgẽ?

²⁰ “Bɩ vʋʋsmã wɩng-yã,” woto la a Poll yeta. (Rom dãmba 12:11, NW ) N-yẽe, tõnd maanda Biibl zãmsg tɩ d tara sõsg tigengã tigisgẽ me, d segd n maana woto ne yẽesem la yamleoogo. A Poll yeela Tesalonik rãmbã: “Tõnd Koenooga ka ta yãmb nengẽ ne goam bal ye, la a taa ne pãnga la ne Sɩɩg Sõngo la ne tẽeb wʋsgo.” (1 Tesalonik rãmba 1:5) Woto, a Poll ne a tũud-n-taasã pa taas ‘Wẽnnaam Koe-nooga bal ye, bãmb kõo b mens me n paase.’—1 Tesalonik rãmba 2:8.

21. Wãn-wãn la d tõe n kell n tall yamleoog manesem ne d zãmsgã tʋʋm b sẽn bobl-dã?

²¹ Yaa d sẽn na n kɩs sɩd ne pa-vigsd tɩ d Biibl zãms rãmbã rat n wʋma d sẽn na n togs-b bũmb ninsã võor la d paamd yamleoog hakɩkã. D ra tol n ges zãmsg tʋʋmd ba a yembr wa rok-m-zugẽ bũmb ye. Gʋlsd a Ɛsdras sɩd gũusa ne a zãmsgã rẽ wɛɛngẽ. A “yãka yam n na n zãms Zusoaba tõoda la a sak-ba.” (Ɛsdras 7:10) D segd n maana woto me n segl d mens sõma la d puk tagsa wã yõodo. Bɩ d pʋʋs a Zeova t’a pids-d ne tẽeb la bas-yard sẽn pa vigsdi. (Luk 17:5) Tõnd yamleoogã tõe n sõnga Biiblã zãmsdb tɩ b bɩɩs nonglem hakɩk ne sɩdã. Yaa sɩd tɩ gũus ne d zãmsgã tõe n baoodame tɩ d tũnug ne zãmsg manesem sẽn yaa takɩ. Tõnd sõsg ning sẽn pʋgdã na n goma bãmb kẽer yelle.

[Footnotes]

Y tẽrame bɩ?

◻ Bõe yĩng tɩ karen-saam dãmb sẽn yaa kiris-neb sẽn tar tõogã ratem be rũndã-rũndã?

◻ Zãmsg minimd bʋs la d tõe n bɩɩse?

◻ Bõe yĩng tɩ nonglem la waoogr ne neb nins d sẽn zãmsdã tar yõod wʋsgo?

◻ Wãn-wãn la d tõe n pids tõnd Biibl zãms rãmbã ratem?

◻ Bõe yĩng tɩ yamleoog la tẽeb sẽn pa vigsd tar yõod wʋsgo, d sã n wa zãmsd neb a taabã?

[Picture on page 8]

Karen-saam-sõmsã mens yaa Wẽnnaam Gomdã zãmsdba

[Picture on page 11]

Bɩ yãmb mengã wilg ratem ne Biibl zãms rãmbã