Tõe tɩ sãamb nins sẽn na n sig a Gayus nengẽ wã yaa misioneer-dãmba, neb a Zã sẽn tʋme, wall tigims sull yel-gɛtba. Sẽn yaa a soab fãa, yaa Rĩungã koe-noogã yĩng la b sẽn gilgdã. A Zã yeelame tɩ yaa “Zu-soabã yʋʋrã yĩng la b kẽng-yã.” (3 Zã 7) Vɛrse a 6 pʋgẽ, a Zã goma Wẽnnaam yelle. Rẽnd a sẽn yeel tɩ yaa ‘Zu-soabã yʋʋrã yĩngã,’ wõnda yaa a Zeova yell la a gomda. Woto wilgdame tɩ sãambã ra yaa kiris-neba, tɩ b tẽed-n-taasã ra segd n deeg-b sõma. Sɩd me, a Zã yeelame: “Tõnd tog n deega nin-bãmbã-rãmba, tɩ tõnd tõe n yɩ tʋmd-n-taas ne bãmba, sɩdã yĩnga.”—3 Zã 8.

Pipi, tõnd sʋkã neb kẽer sẽn paam n bãng a Zeova wã, tũu ne neb sẽn sak n tog sor n na n tɩ taas koe-noogã. Yaa sɩd tɩ rũndã-rũndã, kiris-neb wʋsg pa togd sor n zãag zĩig koɛɛgã mooneg yĩng ye. La d tõe n dɩka a Gayus togs-n-taare, n sõngd d tẽed-n-taas nins sẽn gilgd Wẽnnaam tʋʋmdã yĩngã, la d kengd b raoodo. Wala makre, tigims sull yel-gɛtbã ne b pagbã. D tõeeme me n teel d tẽed-n-taas nins sẽn yik n kẽng zĩig a to, wall sẽn pʋd n kẽng tẽn-taag sẽn na yɩl n sõng zĩis nins koe-moondbã sẽn pa waoogã. Bɩ d fãa ‘mao n maand sãambã sãando.’—Rom. 12:13; 1 Tɩm. 5:9, 10.