Biiblã tõe n sõng n manega y kãadmã

SÃ N yaa ne neb kẽere, kãadem yaa sũ-noog yelle. La neb a taab tagsdame t’a wata ne sũ-sãamse. Pag a yembr yeelame: “Baa d sẽn be ne taabã, mam sũurã pʋgẽ yaa wa d kãadmã kaoome. M getame t’a raaga maam n bas tɩ m yaa m yembr wakat fãa.”

Bõe n tõe n kɩt tɩ neb a yiib sẽn da pʋlem tɩ b na n nonga taab yam wa yi taab woto? Bũmb a yembr sẽn wat ne rẽ yaa b sẽn ka zãms n bãng kãadmã sẽn baood tɩ b maan bũmb ningã. Logtoeemd kɩba-kɩt a yembr yeelame: “Tõnd kẽeda kãadmã n ka reng n paam zãmsg a zug ye.”

Etazĩni Inivɛrsite a ye (Rutgers University sẽn be New Jersey) maana vaeesg kãadmã zug tẽngẽ wã. B sẽn vaees n yã bũmb ningã wilgame tɩ sẽn mi b yɛl wʋsg kãadmã wɛɛngẽ wã sõor paoodame. Vaeesgã taoor dãmb wilgame tɩ “vaeesgã pʋgẽ, b yãame tɩ neb wʋsg bɩɩ ne roagdb kãadem sẽn ka zĩnd sũ-noog bɩ sẽn sãame. B mii kãadem sẽn ka sõma sẽn yaa bũmb ning takɩ, la b ka mi kãadem sẽn yaa sõma sẽn segd n yɩ to-to ye. Neb kẽer sẽn tõe bal yaa b wilg tɩ kãadem sẽn yaa sõma yaa kãadem ‘sẽn yaa lebend ne mam roagdbã rẽnda.’ ”

Rẽ yĩnga kãadem zu-loees tõe n paama kiris-neb hakɩkã bɩ? N-ye. Wala makre, yɩɩ tɩlae tɩ b sagl pipi kiris-nebã tɩ b sã n kẽ kãadem bɩ b “ra bao welgr ye.” (1 Korẽnt dãmba 7:27, Sebr Sõngo) Yaa vẽeneg tɩ zu-loees ka tõe n ka zĩnd ninsaalb a yiib sẽn ka zems zãng kãadem pʋgẽ ye, la sõngr beeme. Sɩdbã la pagbã sã n tũ Biiblã noyã b moorã ne taab noom tõe n paasame.

Yaa sɩd tɩ Biiblã ka sebr sẽn kõt noy kãadem wɛɛngẽ bal ye. La sẽn yaa kãadmã Lugend n vẽneg-a tɩ b gʋlsã, noy nins sẽn be a pʋgẽ wã segd n kõta sõngr kãadmã wɛɛngẽ. Wẽnnaam a Zeova tũnuga ne no-rɛɛs a Ezai n yeel woto: “Mam yaa [a Zeova], yãmb Wẽnnaam. Mam zãmsda yãmb y meng sõngr yĩnga. Mam yãagda yãmb sor ninga yãmb sẽn tog n tũ wã zugu. Yãmb sã n da sak mam tõodã, yãmb laafɩ wã ra na n yɩɩ wa kʋɩls koom la yãmb tɩrlma ra na n yɩɩ wa ko-kãsenga ko-wiisi.”—Ezai 48:17, 18.

Rẽ yĩnga nonglem wʋsg ning sẽn dag n be yãmb ne taab sʋkã sɩnga meneng bɩ? Yãmb tagsdame tɩ y bee kãadem sẽn ka tar nonglem pʋgẽ n ka le tõe n yi bɩ? Pag sẽn zĩnd kãadem pʋgẽ yʋʋm 26 yeelame: “Sũ-sãang ning kãadem a woto buud sẽn wat ne wã ka tõe n bãng n bilg ye. F gãee ne-a, f yikda ne-a.” Walla tɩ y kʋmb n yeel tɩ y ka tar y sẽn na n maaneg kãadem sẽn ka tat y yam pʋgẽ wã, bõe yĩng tɩ y ka na n bao yellã tɩɩm? Sõasg ning sẽn pʋgdã na n wilga sɩdbã ne pagbã Biiblã noy sẽn tõe n sõng n maneg b kãadmã zĩig a yembr takɩ, sẽn yaa pʋleng ning b sẽn maan tɩ b na n zĩnda ne taab wakat fãa wã.

Y sẽn tõe n maneg y kãadmã n paas to-to

MAMS-Y b sẽn na n bas roog t’a sãame. Roogã pẽntiir lagsdame, a sugrã sãame, tɩ zĩigã fãa pid ne sagd menga. Yaa vẽeneg tɩ yʋʋmd ne a to fãa saagã ne sobgã sãama zakã, sẽn paase b ra bas-a lame n ka get a yell ye. Rẽ yĩnga b segd n siig-a lame bɩ? Pa tɩlae tɩ b maan woto ye. Roogã sã n yẽbga sõma la a ket n tar pãnga, b tõe n lebs n maneg-a lame.

Ro-kãngã sẽn yaa to-to wã tẽegd-y-la y kãadmã sẽn yaa to-to wã bɩ? Yʋʋmd ne a to fãa, tõeeme tɩ zu-loeesã toɛy-toɛyã sãama yãmb zĩnd-n-taarã. Tõeeme tɩ ned a yembr yãmb sʋkã, bɩ y yiibã fãa ka ges kãadmã yell sõma ye. Tõeeme tɩ y tagsd wala a Sandy sẽn yeel woto a sẽn zĩnd kãadem pʋgẽ yʋʋm 15 poorã: “Tõnd da ka tar baa fɩ sẽn lagem tõnd ne taab tɩ sã n pa sẽn yaa ned ne a kẽed-n-taagã bal ye. La woto ra ka sek ye.”

Baa yãmb kãadmã sã n yaa woto me, bɩ y ra tolg n yeel tɩ y na n kao-a lame ye. Y tõe n lebs n manega y kãadmã. La rẽ yaa yãmb ne y kẽed-n-taagã sẽn na n sɩd tʋll sõma n maneg y kãadmã la y kogl-a. Tʋlsem sẽn tar pãng woto tõe n kɩtame tɩ y kãadmã vigl kãn-kãe toog wakate. La wãn-wãn la Biiblã tõe n sõng n paas yãmb tʋlsem kãng pãnga?

Pʋlengã baoodame tɩ ned kam fãa maan a sẽn segd n maane

Ned sã n pʋlem t’a na n maana bũmbu, a getame masã tɩ yaa tɩlae ne-a t’a maan bõn-kãnga. Wala makre, ro-met sã n tik a nug kaool sebr zug t’a na n mee roogo, a getame tɩ yaa tɩlae t’a tũ kaoolã noyã. Tõeeme tɩ ro-metã meng ka mi ned ning sẽn dat-a tʋʋmdã ye. Ne rẽ fãa a getame tɩ yaa tɩlae ne-a t’a pids a pʋlengã.

Yaa sɩd tɩ kãadem pa wa tʋʋmd kaool neb sẽn maan ne taab ye, la pʋleng ning kẽed-n-taasã sẽn maan ne taabã baoodame tɩ ned kam fãa maan a sẽn segd n maane. Yãmb ne y kẽed-n-taagã pʋlma Wẽnnaam la ninsaalb taoor tɩ y na n zĩnda ne taaba, baa sẽn ya a soab fãa. A Zezi yeelame: “Naanda naana bãmb, daowa la paga hal sɩngre, la tɩ bãmb yeelame: A yaa woto yĩnga dao na bas a ba ne a ma n zĩnd ne a paga.” La a paase: “Bɩ ned da welg bũmb nins Wẽnnaam sẽn lagem ne taaba ye.” (Matɩe 19:4-6) Dẽ, zu-loees sã n wa