sakdbã n maan a Zeova raabã tẽng zugu. Na n yɩɩ wakat sẽn be yamleoog wʋsgo. Yaa wakat kãng la Biiblã sẽn boond tɩ Bʋkaoorã Daarã.b

20. Zeɛn yaa bõe, la ãnd dãmb n debd be?

²⁰ Woto rat n yeelame tɩ ninsaalb nins fãa sẽn ki wã na n vʋʋgame bɩ? Ayo. Biiblã yetame tɩ kũ-rãmb kẽer bee zĩig sẽn boond tɩ Zeɛn b sẽn lebg tɩ ‘bug-tẽng’ Wẽnnaam Sebre pʋgẽ wã. (Luk 12:5) Zeɛn da yaa yʋʋr b sẽn kõ tãmpʋʋr sẽn da be pĩnd Zerizalɛmã dapoore. Be la b ra yõogd b sagdã. B ra lobda neb kẽer kũum be me, la yaa neb nins Zʋɩf rãmbã sẽn da get wa neb sẽn pa zems ne mumb la vʋʋgrã. Rẽnd zemsame la b sẽn dɩk Zeɛnnã n mak sãoong wakat fãa yĩngã. Yaa sɩd tɩ yaa a Zezi la b bobl sẽn vɩ-bã la sẽn ki-bã bʋʋdo, la yaa a Zeova la Bʋkaood kãsengã. (Tʋʋma 10:42) A pa na n tol n vʋʋg neb nins a sẽn ges tɩ b yaa nin-wẽns sẽn pa rat n toeemã ye.

VƲƲG N VƖƖMD SAASẼ WÃ

21, 22. a) Vʋʋg-bʋg buud me n be? b) Ãnd soab n yɩ pipi n vʋʋg ne malɛk yĩnga?

²¹ Biiblã leb n gomda vʋʋgr buud a to yelle. Yaa vʋʋg n yɩ wa malɛk n vɩɩmd saasẽ wã. Biiblã gomda vʋʋg-kãngã buudã a yembr bal yelle: yaa a Zezi Kirist vʋʋgrã bala.

²² B sẽn wa n kʋ a Zezi wã poore, a Zeova pa bas t’a Biribl-sakdã pa yaoogã pʋgẽ ye. (Yɩɩl Sõamyã 16:10; Tʋʋma 13:34, 35) Wẽnnaam vʋʋga a Zezi, la a pa vʋʋg-a t’a yɩ ninsaal ye. Tʋm-tʋmd a Poll wilgame tɩ Kirist kii ne ‘dũniyã yĩnga, la a vʋʋga ne sɩɩg’ bɩ malɛk yĩnga, (1 Korẽnt dãmba 15:44) Ad woto sɩd ra yaa yel-solemd sẽn yaa kãsenga. A Zezi leb n paama vɩɩm, n yaa malɛk sẽn tar pãnga. (1 Korẽnt dãmba 15:3-6) A Zezi n yɩ pipi n paam vʋʋg-kãngã sẽn tar ziirã. (Zã 3:13) La ra pa yẽ a ye bal n da na n paam a buud ye.

23, 24. Ãnd dãmb n be a Zezi “bãg-bilã” pʋgẽ, la b na n yɩɩ neb a wãna?

²³ A Zezi sẽn da mi tɩ ra pa na n kaoos la a kẽng saasẽ wã yĩnga, a yeela a karen-biis nins sẽn kell n pa ne-a wã t’a ra na n tɩ ‘manega zĩig’ bãmb yĩng be. (Zã 14:2) A Zezi yeelame tɩ neb nins sẽn debd saasẽ wã yaa yẽ “bãg-bila.” (Luk 12:32, NW) Kiris-neb hakɩk a wãn n da na n wa zĩnd sul-bil-kãngã pʋgẽ? Sã n yaa ne Wilgri 14:1, tʋm-tʋmd a Zã yeelame: “Mam gesame, la haya! Pebila [a Zezi Kirist] yalsa tãng ninga sẽn boond tɩ Siõ wã zugu, la neb tus koabga la tus pis-naas la a naase sẽn tar Pebila yʋʋre la bãmb Ba yʋʋre sẽn gʋls bãmb dĩyã bee ne bãmba.”

²⁴ Kiris-neb 144000 kãensã, sẽn yaa a Zezi tʋm-tʋmdbã la kiris-neb a taab na n vʋʋgame n tɩ vɩɩmd saasẽ. Yaa wakat bʋg la b na n vʋʋge? Tʋm-tʋmd a Poll gʋlsame tɩ rẽ ra na n yɩɩ Kirist belmã sasa. (1 Korẽnt dãmba 15:23) Wala y sẽn na n yã sak a 9 pʋgẽ wã, masã d vɩɩ sasa kãngã. Neb 144000 kẽer keta tẽng zug tõnd wakatã. Bãmb sʋkã, neb nins sẽn kiidã vʋʋgda zĩig pʋgẽ n tɩ vɩɩmd saasẽ. (1 Korẽnt dãmba 15:51-55) La ãdem-biis wʋsg tara saagr n na n vʋʋg n vɩɩmd tẽng zug Arzãnã sẽn watã pʋgẽ.

25. Bõe la d na n yã sak ning sẽn pʋgdã pʋgẽ?

²⁵ N-ye, a Zeova sɩd na n tõoga tõnd bɛ wã sẽn yaa kũumã, n kɩt t’a menem wakat fãa yĩnga! (Ezai 25:8) La tõe tɩ y soke: ‘Neb nins b sẽn vʋʋg tɩ b kẽng saasẽ wã na n tɩ maana bõe beenẽ?’ B na n yɩɩ Wẽnnaam Rĩungã sẽn yaa goosneema sẽn be saasẽ wã nanambse. D na n paama vẽnegr goosneema kãng zug n paas sak ning sẽn pʋgdã pʋgẽ.

[Tẽngr not rãmbã]

BIIBLÃ SẼN YET BŨMB NINGA

▪ Biiblã sẽn gomd kũum sẽn vʋʋg yellã kõta tõnd saagr hakɩka.—Zã 11:39-44.

▪ A Zeova rata ne a sũur fãa n vʋʋg sẽn ki-bã.—Zoob 14:13-15.

▪ Neb nins fãa sẽn be yaoogẽ wã na n vʋʋgame.—Zã 5:28, 29.

[Foto, seb-neng 69]

A Eli vʋʋga pʋg-kõor biribla.​—1 Rĩm dãmba 17:17-24

[Foto, seb-neng 69]

Tʋm-tʋmd a Pɩɛɛr vʋʋga kiris-nin-poak a Dorkas.​—Tʋʋma 9:36-42

[Foto, seb-neng 69]

A Lazaar vʋʋgrã waa ne sũ-no-kãsenga.​—Zã 11:38-44

[Foto, seb-neng 75]

Arzãnã pʋgẽ, sẽn ki-bã na n vʋʋgame n le zĩnd ne b nin-nongdsã

Sak a nii

Wẽnnaam Rĩungã yaa bõe?

Bõe la Biiblã yet tõnd Wẽnnaam Rĩungã wɛɛngẽ?

Bõe la Wẽnnaam Rĩungã na n maane?

Wakat bʋg la Rĩungã na n kɩt tɩ Wẽnnaam daabã maan tẽng zugu?

1. Pʋʋs-bʋg neb wʋsg sẽn mi la d na n vaees masã?

DŨNIYÃ gill zugu, neb tus-kẽema mii Soaalã pʋʋsg ning sẽn sɩngd ne goam nins sẽn yaa: Tõnd Ba sẽn be saasẽ wã. Pʋʋs-kãngã yaa pʋʋsg ning yʋʋr sẽn yi a Zezi Kirist sẽn wilg tɩ yaa makr d sẽn segd n tũ wã. A sɩd yaa pʋʋsg sẽn tar pãnga, la y sã n vaees kosg a tãab nins a sẽn sɩngd ne wã, na n sõng-y lame tɩ y bãng Biiblã sẽn sɩd yet tõnd bũmb ningã n paase.

2. Yɛl a tãab bʋs la a Zezi zãms a karen-biisã tɩ b pʋʋs n kose?

² Pʋʋs-kãng sɩngrẽ wã, a Zezi yeela a kɛlgdbã woto: “Dẽ yĩnga, bɩ yãmb pʋʋs woto: ‘Tõnd Ba sẽn be [saasẽ], tɩ yãmb yʋʋr yɩ ne waoogre, tɩ yãmb soolem wa, tɩ yãmb daab maan dũniyã zug wa sẽn maand [saasẽ wã].’” (Matɩe 6:9-13) Yɛl a tãabã b sẽn kos ka wã võor yaa bõe?

3. Bõe la d segd n bãng Wẽnnaam Rĩungã wɛɛngẽ?

³ Tõnd zoe n zãmsa yɛl wʋsg Wẽnnaam yʋʋrã sẽn yaa Zeova wã zugu. La d goma Wẽnnaam daabã yell bilfu, a sẽn zoe n maan la a sẽn na n maan bũmb ning n kõ ãdem-biisã. La yaa bõe yell la a Zezi ra gomda, a sẽn wa n yeel tɩ d pʋʋs “tɩ yãmb soolem wa” wã? Wẽnnaam soolmã bɩ a Rĩungã yaa bõe? Wãn to la a waoongã na n maneg Wẽnnaam yʋʋrã, bɩ n kɩt t’a lebg sõngo? La wãn to la Rĩungã waoong na n kɩt tɩ Wẽnnaam daabã maane?

WẼNNAAM RĨUNGÃ SẼN YAA BŨMB NINGA

4. Wẽnnaam Rĩungã yaa bõe, la ãnd la a Rĩmã?

⁴ Wẽnnaam Rĩungã yaa goosneema Wẽnnaam a Zeova sẽn lugli, sẽn tar Rĩm a meng sẽn yãke. Ãnd n yaa Wẽnnaam Rĩungã Rĩma? Yaa a Zezi Kirist. A Zezi yaa Rĩm sẽn yaa kãseng n yɩɩd ninsaalbã nanambs fãa. B boond-a lame me tɩ “rĩm dãmb Dĩma la zu-soben dãmb Zusoaba.” (1 Tɩmote 6:15) A tara pãng n tõe n maan neer n yɩɩd naab buud fãa sẽn yaa ninsaala, hali n yɩɩg naab ning sẽn yaa-a sõma n yɩɩd a taabã fãa wã.

5. Yɛ la Wẽnnaam Rĩungã na n zĩnd n dɩ naamã, la yaa ãnd dãmb zut la a na n dɩ naamã?

⁵ Wẽnnaam Rĩungã na n zĩnda yɛ n dɩ naamã? Yɛ la a Zezi be? Y tẽrame tɩ b kʋ-a-la namsg ra-luk zugu, la tɩ rẽ poore, a vʋʋgame. A vʋʋgrã poor bilfu, a rʋʋ saasẽ. (Tʋʋma 2:33) Rẽnd yaa saasẽ la Wẽnnaam Rĩungã be. Yaa rẽ yĩng la Biiblã sẽn boond-a tɩ “saasẽ rĩungã.” (2 Tɩmote 4:18, NW) Baa ne Wẽnnaam Rĩungã sẽn be saasẽ wã, a na n dɩɩ naam tẽngã neb zutu.—Wilgri 11:15.

6, 7. Bõe n kɩt t’a Zezi yaa Rĩm-kãsenga?

⁶ Bõe n kɩt t’a Zezi yaa Rĩm-kãsenga? Pipi, a pa na n tol n ki ye. Biiblã maka a Zezi ne rĩm dãmb nins sẽn yaa ninsaalbã n yeel tɩ yẽ ‘bal n ka kiid ye, la a bee vẽenem pʋgẽ tɩ neb ka tõe n kolg ye.’ (1 Tɩmote 6:16) Woto rat n yeelame tɩ bõn-sõma nins fãa a Zezi sẽn maandã na n kaoosame. La a na n sɩd maana bõn-sõma sẽn yaa kãsems n kõ nebã.

⁷ Ges-y Biiblã bãngr-gom-kãngã sẽn yet bũmb ning a Zezi zugã: “[A Zeova] sɩɩga na n paa bãmb zugu, yaa yam ne yẽesem sɩɩga la saglg ne pãng sɩɩga la bãngre la [a Zeova] zoees sɩɩga. Bãmb na n maana sũ-noog Zusoaba zoees yĩnga. Bãmb ka na n bʋ yell tɩ zems bũmb ninga nin sẽn yã ye, la b ka na n kao bʋʋd tɩ zems bũmb ninga bãmb tʋba sẽn wʋm ye. B na n bʋʋ nimbãan dãmba yell tɩ zemse n kao bʋʋd ne tɩrlem n kõ dũniyã naong rãmbã.” (Ezai 11:2-4) Gom-kãensã wilgdame t’a Zezi ra na n wa yɩɩ tẽngã fãa gill Rĩm sẽn yaa tɩrg la sẽn tar nimbãan-zoeere. Yãmb rata naab sẽn yaa woto bɩ?

8. Ãnd dãmb n na n dɩ naam ne a Zezi?

⁸ Ad bũmb a to sẽn tar loees ne Wẽnnaam Rĩungã: A Zezi pa na n dɩ naamã a yembr ye. Neb a taab n na n dɩ naamã ne-a. Wala makre, tʋm-tʋmd a Poll yeela a Tɩmote: “Tõnd sã n tall tẽeb n ka base, tõnd na rɩ naam ne bãmb me.” (2 Tɩmote 2:12) N-ye, a Polle, a Tɩmote la wẽn-sakdb a taab nins Wẽnnaam sẽn yãkã na n naaga a Zezi n dɩ naam saasẽ Rĩungã pʋgẽ. Yaa neb a wãn n na n paam zu-no-kãngã?

9. Neb a wãn n na n naag a Zezi n dɩ naam, la yaa wakat bʋg la Wẽnnaam sɩng b yãkre?

⁹ Wa b sẽn wilg seb-kãngã sak a 7 pʋgẽ wã, tʋm-tʋmd a Zã paama vẽnegre, n yã “Pebila [a Zezi Kirist] sẽn yik n yas Sɩyõ tãngã [sẽn makd a saasẽ naamã] zugu, tɩ neb tus koabg la tus pis-naas la a naas sẽn da tar Pebila yʋʋr ne b ba wã yʋʋr sẽn gʋls b rĩyẽ wã be ne bãmba.” Neb 144000 kãensã yaa ãnd dãmba? A Zã meng yeta tõnd tɩ: “Bãmb na n pʋgda Pebila n dabd zĩig ninga fãa b sẽn dabda. B raa bãmb n yiis neba sʋka, tɩ b yɩ wa dẽenem biis Wẽnnaam ne Pebila yĩnga.” (Wilgri 14:1, 4, Kãab-paalgã Koe-noogo) N-ye, b yaa a Zezi Kirist karen-biis hakɩk b sẽn tũus tɩ b na n naag-a n dɩ naam saasẽ. B sẽn vʋʋg-b tɩ b paam saasẽ vɩɩmã poore, ‘bãmb na n dɩɩ naam dũniyã neb zut’ ne a Zezi. (Wilgri 5:10) A Zezi tʋm-tʋmdbã wakat tɛka, Wẽnnaam tũusa kiris-neb hakɩk sẽn na yɩl n lok neb 144000 sõore.

10. Bõe yĩng tɩ b sẽn yãk a Zezi ne neb 144000 tɩ b rɩ naam ãdem-biisã zutã yaa nonglem wilgri?

¹⁰ A Zeova sẽn yãk a Zezi ne neb 144000 tɩ b na n dɩ naam ãdem-biisã zutã yaa nonglem wilgri. D bãng t’a Zezi me yɩɩ ninsaala, la a mii namsg sẽn dat n yɛɛlga. A Poll yeelame t’a Zezi ‘ka a soab sẽn ka zoet tõnd nimbãanega tõnd pãn-komsem pʋgẽ ye, la yẽ rag n paama makr ne bũmb fãa wa tõndo, la a ka maan yel-wẽn baa bilf ye.’ (Hebre dãmba 4:15; 5:8) A na-rɩt-n-taasã me yɩɩ ninsaalb n nams la b maan sũ-mar toog pʋgẽ. Sẽn paase, b maoa ne b pãn-komsmã la bãas buud toor-toore. Hakɩka, b na n yɩɩ wʋmdb ne ãdem-biisã, zu-loees nins b sẽn segdã pʋgẽ.

BÕE LA WẼNNAAM RĨUNGÃ NA N MAANE?

11. Bõe yĩng t’a Zezi yeel t’a karen-biisã ra segd n pʋʋsame tɩ Wẽnnaam daabã maan saasẽ?

¹¹ A Zezi sẽn wa n yeel t’a karen-biisã segd n pʋʋsame tɩ Wẽnnaam Rĩungã wa wã, a paasame tɩ b segd n pʋʋsame tɩ Wẽnnaam daabã maan saasẽ la tẽng zugu. Wẽnnaam bee saasẽ, la malɛg-sõmsã maanda a raabã be wakat fãa. La seb-kãngã sak a 3 pʋgẽ, d bãngame tɩ malɛg-wẽng n bas Wẽnnaam daabã maanego, la a tus a Ãdem ne a Hawa tɩ b maan yel-wẽnde. Sak 10 pʋgẽ, d na n bãnga bũmb ning Biiblã sẽn yet tõnd malɛg-wẽng kãng b sẽn boond t’a Sʋɩtãanã zug n paase. B kõo a Sʋɩtãan ne malɛgs nins sẽn yãk yam n tũ-a tɩ b boond-b tɩ zĩn dãmbã sor tɩ b kell n zĩnd saasẽ wakat bilf pʋgẽ. Rẽnd pa malɛgsã fãa n da maand Wẽnnaam daabã saasẽ ye. La Wẽnnaam Rĩungã sã n da wa sɩng naamã rɩɩbo, toeeng n da na n zĩndi. Rĩm paalg a Zezi Kirist b sẽn zĩnig naam geerẽ wã ra na n wa yika zabr ne a Sʋɩtãanã.—Wilgri 12:7-9.

12. Yel-kãsems a yiib bʋs la b bilg Wilgr 12:10 pʋgẽ?

¹² Bãngr-goam nins sẽn pʋgdã bilgda bũmb nins sẽn da na n wa zĩndã: “La mam wʋma koe-kãseng [saasẽ] sẽn yeele: ‘Masã fãagr ne pãng la tõnd Wẽnnaam soolem ne bãmb Kirist pãnga waame, tɩ bõe, tõnd ba-biisa rõata [a Sʋɩtãan] sẽn da rõt bãmb tõnd Wẽnnaam taoor wĩntoog ne yʋngã b rig-a lame t’a sigi.’” (Wilgri 12:10) Yãmb yãa yel-kãsems a yiib nins b sẽn bilg Biiblã verse kãngã pʋgẽ wã bɩ? Pipi, Wẽnnaam Rĩungã Rĩm sẽn yaa a Zezi Kiristã sɩnga naam dɩɩbo. Yiib-n-soaba, b riga a Sʋɩtãan t’a yi saasẽ n wa tẽngã zugu.

13. B sẽn dig a Sʋɩtãan n yiis saasẽ wã waa ne bõe be?

¹³ Yɛl a yiibã waa ne bõe? Bũmb ning sẽn zĩnd saasẽ wã wɛɛngẽ, d karemdame: “Yaa woto yĩnga [saase,] la yãmb dãmb sẽn be be, bɩ y maan sũ-noogo.” (Wilgri 12:12) N-ye, malɛg-sõmsã sẽn be saasẽ wã kɩdemdame, bala, a Sʋɩtãan ne a zĩn dãmbã sẽn loogã yĩnga, malɛgs nins fãa sẽn ket saasẽ wã sakda Wẽnnaam a Zeova. Laafɩ la bãan zãng-zãng n be beenẽ wakat fãa. B maanda Wẽnnaam daabã saasẽ.

14. B sẽn dig a Sʋɩtãan n sik tẽng zugã waa ne bõe?

¹⁴ La yaa wãn to yẽ ne dũniyã? Biiblã yetame: “Toog bee ne neb nins sẽn be dũniyã zug la ko-kãsenga pʋgẽ wã. Tɩ bõe, Sʋɩtãanã sigame n wa yãmb nengẽ, la a sũ-puugra yaa kãsenga a sẽn bãng t’a wakat yaa bilfa yĩnga.” (Wilgri 12:12) A Sʋɩtãan sũur puuda b sẽn dig-a n yiis saasẽ t’a wakatã yaa bilfã yĩnga. A sũurã sẽn puugã yĩnga, a wata ne namsg bɩ “toog” tẽngã zugu. D na n zãmsa yɛl n paas “toog” ning a sẽn wat ne wã zug sak ning sẽn pʋgdã pʋgẽ. B sẽn dig a Sʋɩtãan t’a sig tẽngã zug t’a wat ne toogã yĩnga, d tõe n soka woto: Wãn to masã la Rĩungã na n kɩt tɩ Wẽnnaam daabã maan tẽng zugu?

15. Wẽnnaam daab ne tẽngã yaa bõe?

¹⁵ Tẽeg-y Wẽnnaam daab ne tẽngã sẽn yaa a soabã. Yãmb bãnga rẽ sak a 3 pʋgẽ. Edɛn zẽedẽ wã, Wẽnnaam wilgame t’a raabã yaa tɩ tẽn-kãngã yɩ arzãn sẽn pid ne ninsaalb sẽn pa kiid la sẽn yaa tɩrse. A Sʋɩtãan kɩtame t’a Ãdem ne a Hawa maan yel-wẽnde, la rẽ kɩtame tɩ Wẽnnaam daabã ne tẽngã pidsg viig wakat bilf yĩnga, la a raabã ne tẽngã pa toeem ye. A Zeova ket n datame tɩ ‘nin-tɩrs soog dũniyã n zĩnd a zug wakat sẽn ka sɛta.’ (Yɩɩl Sõamyã 37:29) La yaa Wẽnnaam Rĩungã n na n pids rẽ. Wãn to?

16, 17. Bõe la Daniɛll 2:44 yet tõnd Wẽnnaam Rĩungã wɛɛngẽ?

¹⁶ Ges-y bãngr-gomd ning sẽn be Daniɛll 2:44 pʋgẽ wã. Be d karemdame: “Rĩm dãmb kãens sẽn dɩt naam wakate, Wẽnnaam sẽn be yĩngra na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi. A na n wãa soolem kãens fãa tɩ b menem n bas-a t’a yaas wakat fãa.” Bõe la rẽ wilgd tõnd Wẽnnaam Rĩungã wɛɛngẽ?

¹⁷ Pipi, a wilgda tõnd tɩ b ra segd n lugla Wẽnnaam Rĩungã “rĩm dãmb kãens sẽn dɩt naam wakate,” bɩ rĩm dãmb a taabã sẽn ket n beẽ wakate. Yiib-n-soaba, a wilgda tõnd tɩ Rĩungã na n kaoosa wakat sẽn pa sate. Goosneema a to pa tõe n zab n deeg a zĩigã ye. Tãab-n-soaba, zabr n na n zĩnd Wẽnnaam Rĩungã ne dũni kãngã goosneemã rãmba sʋka. La yaa Wẽnnaam Rĩungã n na n tõoge. Sẽn na n baase, na n yɩɩ goosneem kãng bal n na n dɩ naam ãdem-biisã zutu. Rẽ la ãdem-biisã na n paam goosneema ning buud sẽn yaa-a sõma n yɩɩd a taabã fãa, tɩ rɩ naam b zugu.

18. B boonda yaoolem zabr ning sẽn na n zĩnd Wẽnnaam Rĩungã ne dũni kãngã goosneema rãmb sʋkã tɩ bõe?

¹⁸ Biiblã wilgda yɛl wʋsg yaoolem zabr ning sẽn na n zĩnd Wẽnnaam Rĩungã la dũni kãngã goosneema rãmbã sʋkã zugu. Wala makre, a yeta tõnd tɩ saabã sẽn kolgdã, malɛg-wẽnsã na n yelga ziri sẽn na yɩl n belg ‘dũniyã fãa nanambse.’ Bõe yĩnga? Yaa sẽn “na n tɩ tigis bãmb tɩ b wa Wẽnnaam Sẽn-tõe-fãa daar kãsenga zabre.” Tẽngã rĩm dãmb na n tigma taab “zĩig sẽn boond ne hebre goama tɩ Harmagedõ” wã. (Wilgri 16:14, 16) Verse kãensã b yiibã sẽn yet bũmb ningã yĩnga, b boonda yaoolem zabr ning sẽn na n zĩnd ninsaalbã goosneema rãmb ne Wẽnnaam Rĩungã sʋkã tɩ Armagedõ zabrã.

19, 20. Bõe n kɩt tɩ Wẽnnaam daabã pa maand tẽng zug masã?

¹⁹ Bõe la Wẽnnaam Rĩungã na n tũnug ne Armagedõ n maane? Leb-y n tẽeg-y Wẽnnaam daab ne tẽngã sẽn yaa a soabã. Wẽnnaam a Zeova ratame tɩ tẽngã wa pid ne nin-tɩrse, ninsaalb sẽn zems zãng sẽn maand a raabã Arzãn pʋgẽ. Yaa bõe n gɩdgd rẽ masã? Pipi, tõnd yaa yel-wẽn-maandba, n lʋɩt bãas la d kiidẽ. La d yãa sak a 5 wã pʋgẽ t’a Zezi kii tõnd yĩng sẽn na yɩl tɩ d tõog n vɩɩmd wakat sẽn pa sate. D tẽra gom-kãensã b sẽn togs a Zã Evãnzillã pʋgẽ wã: “Wẽnnaam nonga dũniyã hal tɩ b kõ b Biiga sẽn ka to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.”—Zã 3:16.

²⁰ Zu-loɛɛg a to n be. Neb wʋsg tʋmda tʋʋm-wẽnse. B yagda ziri la b yoaada. B pa rat n maan Wẽnnaam daabã ye. Neb nins sẽn tʋmd tʋʋm-wẽnsã na n paama sãoong Wẽnnaam zabrã sẽn yaa Armagedõ wã sasa. (Yɩɩl Sõamyã 37:10) Bũmb a to sẽn kɩt tɩ b pa maand Wẽnnaam daabã tẽng zugã yaa goosneema rãmbã sẽn pa sõngd nin-buiidã tɩ b maan rẽ wã yĩnga. Goosneema rãmb wʋsgo, sã n pa pãng la b pa tare, b yaa toose, bɩ zãmb rãmba. Biiblã togsda vẽeneg tɩ: “Ninsaal tõe a to n maand-a wẽnga.”—Koɛɛg Soaba 8:9.

21. Wãn to la Rĩungã na n kɩt tɩ Wẽnnaam daabã maan tẽng zugu?

²¹ Armagedõ poore, yaa goosneema yɛng bala, sẽn dat n yeel tɩ Wẽnnaam Rĩungã n na n dɩ naam ãdem-biisã zutu. Rĩung kãng na n maana Wẽnnaam daabã la a wa ne bark wʋsgo. Wala makre, a na n yõka a Sʋɩtãan ne a zĩn dãmbã n page. (Wilgri 20:1-3) B na n kɩtame t’a Zezi maoongã naf wẽn-sakdbã, tɩ rẽ na n kɩt tɩ b pa na n lʋɩt bãas la b kiidẽ yɛs ye. La Rĩungã naam wakate b na n tõog n vɩɩmda wakat sẽn pa sate. (Wilgri 22:1-3) B na n kɩtame tɩ tẽngã lebg arzãna. Woto, Rĩungã na n kɩtame tɩ Wẽnnaam daabã maan tẽng zugu, la a na n kɩtame tɩ Wẽnnaam yʋʋrã paam waoogre. Rẽ rat n yeelame tɩ bõe? Rat n yeelame tɩ Wẽnnaam Rĩungã naam sasa, wakat n na n wa zĩnd tɩ nebã fãa na n waoog a Zeova yʋʋrã.

WAKAT BƲG LA WẼNNAAM RĨUNGÃ NA N KƖT T’A RAABÃ MAAN TẼNGÃ ZUGU?

22. Bõe n kɩt tɩ d miẽ tɩ Wẽnnaam Rĩungã pa wa sasa ning a Zezi sẽn da wa n be tẽng zugã bɩ a vʋʋgrã poor bala?

²² A Zezi sẽn wa n yeel a karen-biisã tɩ b pʋʋs tɩ “yãmb soolem wa” wã, ra yaa vẽeneg tɩ soolmã bɩ Rĩungã ra nan pa wa sasa kãng ye. A Zezi sẽn wa n dʋ saasẽ wã tɩ Rĩungã waame bɩ? Ayo, bala a Pɩɛɛr ne a Poll fãa yeelame t’a Zezi sẽn wa n vʋʋgã, bãngr-gomd ning sẽn be Yɩɩl Sõamyã 110:1 pʋgẽ wã pidsa a zugu. Be d karemdame: “[A Zeova] koɛɛga mam Soaala yĩnga: ‘Zĩnd mam dɩtg hal tɩ m kɩt tɩ f tab f bɛɛbã.’” (Tʋʋma 2:32-35; Hebre dãmba 10:12, 13) A ra segd n gũume tɩ wakat ning ta.

23. a) Wakat bʋg la Wẽnnaam Rĩungã sɩng naam dɩɩbo? b) Bõe yell la d na n gom sak ning sẽn pʋgdã pʋgẽ?

²³ La rẽ ra segd n kaoosa wakat a wãna? Yʋʋmd 1900 sẽn wa n kolgdẽ wã, neb sẽn da vaeesd Biiblã ne pʋ-peelem magame n mik tɩ gũubã wakat da na n saa yʋʋmd 1914. (Sẽn na yɩl n bãng n paas yʋʋm kãng zug bɩ y ges Vẽnegr sẽn be seb-neng 215-18 pʋgẽ wã.) Dũniyã yɛl nins sẽn sɩng ne yʋʋmd 1914 sɩd wilgdame tɩ Biiblã zãmsdbã sẽn geelã ra zemsame. Biiblã bãngr-goam pidsg wilgdame tɩ yʋʋmd 1914, Kirist lebga Rĩm tɩ Wẽnnaam saasẽ Rĩungã sɩng naam dɩɩbo. Woto yĩnga, d vɩɩ “wakat bilf” ning sẽn ket a Sʋɩtãan yĩngã. (Wilgri 12:12; Yɩɩl Sõamyã 110:2) D tõe n yeela ne bas-m-yam me tɩ ka la bilfu, Wẽnnaam Rĩungã na n kɩtame t’a raabã maan tẽng zugu. Yãmb getame tɩ woto yaa koe-noog bɩ? Yãmb tẽedame tɩ yaa sɩd bɩ? Sak ning sẽn pʋgdã na n sõng-y lame tɩ y yã tɩ Biiblã sɩd wilgda woto.

BIIBLÃ SẼN YET BŨMB NINGA

▪ Wẽnnaam Rĩungã yaa goosneema sẽn be saasẽ, t’a Zezi Kirist yaa a Rĩma, la b yãka neb 144000 ãdem-biisã sʋk tɩ b na n naag a Zezi n dɩ naam.—Wilgri 14:1, 4.

▪ Wẽnnaam Rĩungã sɩnga naam dɩɩb yʋʋmd 1914, la b riga a Sʋɩtãan saasẽ t’a sig tẽng zugu.—Wilgri 12:9.

▪ Ka la bilfu, Wẽnnaam Rĩungã na n sãama ninsaalbã goosneema rãmba, la tẽngã na n lebga arzãnã.—Wilgri 16:14, 16.