YÃMB RA MIIME BƖ?

Biiblã sã n gomd “enik” yelle, yaa bõe yell la a gomda?

Wakat ninga, gom-bil ning sẽn yaa “enikã”a võor yaa rao b sẽn kɩsge. Pĩnd wẽndẽ wã, rao sã n beege, b tõe n kɩsg-a lame. B ra mi n kɩsgda rap b sẽn yõg zabr sasa, wall yembs me. B ra yãkda rap b sẽn kɩsg tɩ b get rĩm-dãmbã pagb yelle. Wala makre, a Hegai ra geta Pɛrs rĩm a Asuerus pagbã yelle, t’a Saasgaaz get a pʋg-bi wã yelle. Kẽer yetame t’a Asuerus la b sẽn boond t’a Zɛrzɛs pipi soabã.—Ɛstɛɛr 2:3, 14.

La pa neb nins Biiblã sẽn boond tɩ “enikã” fãa la b kɩsg ye. Biibl-mitb kẽer yetame tɩ “enik” tõe n yɩɩ ned sẽn tʋmd rĩm zakẽ n tar naam. Wõnda a Ebɛd-Melek sẽn sõng a Zeremi wã, n paas Etiopi ned ning a Filip sẽn moon koɛɛgã ra yaa woto. Yaa vẽeneg t’a Ebɛd-Melek ra yaa nin-kãsenga, bala a ra tõe n kẽ n yãa rĩm a Sedesias a toore. (Zeremi 38:7, 8) Biiblã wilgame tɩ Etiopi nedã ra yaa rĩm-poakã ligd gũuda, la t’a “waa Zerizalɛm n wa pʋʋs” n lebgdẽ.—Tʋʋma 8:27.

Pĩnd wẽndẽ wã, bõe yĩng tɩ pe-kɩɩmbã ra welgd piisã ne bʋʋsã?

A Zezi sẽn wa n gomd bʋ-kaoorã sẽn watã yellã, a yeela woto: “Ninsaal Biigã sã n wa ne b naam, . . . buudã fãa na n tigma b taoore. Bãmb na n welga bãmb ne taab wa pe-kɩɩm sẽn welgd a piis ne a bʋʋse.” (Matɩe 25:31, 32) La bõe yĩng tɩ pe-kɩɩmbã ra mi n welgd b piisã ne b bʋʋsã?

Pe-kɩɩmbã ra wae n naagda piisã ne bʋʋsã n kɩɩmdẽ. La zĩigã sã n sobge, b kẽesd-b-la bãg pʋsẽ n kogl-b ne waoodã, la sẽn na yɩl tɩ we-rũms wall wagda ra wa yõg-b ye. (Sɩngre 30:32, 33; 31:38-40) La b segd n kẽesa piisã ne bʋʋsã bãg toor-toor pʋsẽ, tɩ bʋʋsã ra wa pogl pe-yãansã ne pe-bi wã ye. Sebr a yembr yeelame tɩ pe-kɩɩmbã wae n welgda piisã ne bʋʋsã b sẽn wat n tar kamb sasa, b sã n wa rat n pẽ b bĩismã, la b sã n wa rat n wõrs b kõbdã. Rẽnd makr ning a Zezi sẽn dɩkã gomda bũmb a kɛlgdbã sẽn da maand wall b sẽn mi n yãt tɩ b maandẽ yelle, bala pe-kɩɩmb ra waooga Israyɛll soolmẽ wã.