Rogem paalgã n kɩtd tɩ ned paam fãagr bɩ?

B SÃ N sok yãmb tɩ y paama rogem paalgã, y na n leokame tɩ bõe? Dũniyã gill zugu, neb wʋsg yẽ na n leokame tɩ “n-ye!” B tẽedame tɩ kiris-ned hakɩk fãa segd n paama rogem paalgã, la tɩ yaa rẽ bal n kɩtd tɩ ned paam fãagre. B tẽeda tũudum taoor soab a Robert Charles Sproul sẽn togsã. A yeela woto: “Ned sã n pa paam rogem paalgã, . . . a soab pa kiris-ned ye.”

Yãmb me tẽedame tɩ yaa rogem paalgã n kɩtd tɩ ned paam fãagr bɩ? Sã n yaa woto, yaa vẽeneg tɩ y na n sõnga y zakã rãmb la y zo-rãmbã tɩ b paam rogem paalgã n wa paam fãagre. La b segd n bãnga welgr ning sẽn be ned sẽn paam rogem paalgã la ned sẽn pa paam sʋka. Bõe la yãmb na n yeel tɩ b bãng rogem paalgã sẽn dat n yɛɛlga?

Neb wʋsg tẽedame tɩ ned sẽn paam rogem paalgã yaa ned sẽn pʋlem t’a na n tũu Wẽnnaam la Kirist ne a sũur fãa. Rẽ kɩtame t’a sẽn da yaa wa kũum Wẽnnaam nifẽ wã, a lebga nin-vɩɩg masã.

B sã n yeel yãmb tɩ Biiblã pa wilgd woto, na n ling-y lame bɩ? Yãmb dat n bãnga Wẽnnaam Gomdã sẽn sɩd yet bũmb ning rogem paalgã wɛɛngẽ bɩ? Yãmb sã n maag y yĩng n karem sõs-kãngã, na n sõng-y lame, bala y na n bãnga paam rogem paalgã sẽn dat n yɛɛlga. Y sã n bãng rẽ, na n toeema y vɩɩmã, la kɩt tɩ y bãng y beoog daarã sẽn na n yɩ a soaba.

Bõe la Biiblã yet rogem paalgã wɛɛngẽ?

B gomda “rogem paalgã” yell Zã 3:1-12 pʋgẽ. Yɩɩ sasa ning a Zezi sẽn wa n sõsd ne Zerizalɛm tũudum taoor soab a ye. Y tõe n yãa b sõsgã gill zĩ-gũbrã pʋgẽ. Yɩta sõma tɩ y maag y yĩng n karem kiba-kãngã sẽn yit Biiblã pʋgẽ wã.

Kiba-kãng pʋgẽ, a Zezi wilga yɛl wʋsg rogem paalgã zugu. A Zezi goamã sõngda tõnd tɩ d bãng sogs-kãensã a nu wã leoore:

◼ Rogem paalgã yõod yaa bõe?

◼ Rogem paalgã yaa ned fãa yam-yãkr bɩ?

◼ Rogem paalgã yaa bõe yĩnga?

◼ Rogem paalgã paamda wãn-wãna?

◼ Rogem paalgã tɛka, toeen-bʋg n zĩndidi?

Bɩ d bao n bãng sogs-kãensã leoore.

[Zĩ-gũbri/Foto, seb-​neng a 4]

“Yaa tɩlae tɩ y paam rogem paalga”

“Fariziẽ dãmbã sʋka, Zʋɩf rãmbã naab a ye n da be be t’a yʋʋr boondẽ t’a Nikodɛm. Dao kãng waa a Zezi nengẽ ne yʋng n yeel bãmb yaa: ‘Karen-saamba, tõnd miime tɩ yãmb yaa karen-saam-kãseng sẽn yi Wẽnnaam nengẽ, tɩ bõe, ned ka tõe n maan bõn-bãn-kãsems nins yãmb sẽn maandã, a sã n ka Wẽnnaam sẽn be ne a soab ye.’ A Zezi leoka yẽnda: ‘Mam yeta yãmb sɩd-sɩda tɩ ned sã n ka paam dogem paalga, a ka tõe n yã Wẽnnaam soolem ye.’ A Nikodɛm soka bãmb yaa: ‘Ned sẽn kʋʋl na n yɩɩ wãn n le roge? Yẽ tõe n le kẽe a ma pʋgẽ n dog bɩ?’ A Zezi leoka yẽnda: ‘Mam yeta yãmb sɩd-sɩda tɩ ned sã n ka rog ne koom la Sɩɩg Sõngo, a ka tõe n kẽ Wẽnnaam soolmẽ ye. Bũmb ninga yĩngã sẽn dogd yaa yĩnga, la bũmb ninga Sɩɩg Sõng sẽn dogd yaa sɩɩga. Da yɛɛs-y ne mam sẽn yeel yãmb tɩ yaa tɩlae tɩ y paam dogem paalgã ye. Sobg wẽeda a sẽn dat zĩig ninga; la yãmb wʋmda a bʋʋre, la y ka tõe n bãng a sẽn yi zĩig ninga, la a sẽn dabd zĩig ning ye. A yaa woto ne ned ninga fãa Sɩɩg Sõng sẽn dogda.’ A Nikodɛm soka bãmb yaa: ‘Bõn-kãng na n yɩɩ wãn n maane?’ A Zezi leoka yẽnda: ‘Yãmb yaa Israɛll karen-saamb n ket n ka mi bõn-kãens bɩ? Mam yeta yãmb sɩd-sɩda, tõnd yeta bũmb nins tõnd sẽn mi, la tõnd kɩta kaset ne bũmb nins tõnd sẽn yã. La yãmb ka reeg tõnd kasetã ye. Mam sã n togs yãmb dũniyã yell tɩ yãmb ka tẽ, dẽ, yãmb na n maana wãn n tẽ mam sã n togs yãmb yĩngr yelle?’ ”—Zã 3:1-12.

Rogem paalgã yõod yaa bõe?

A ZEZI sẽn wa n sõsd ne a Nikodɛmã, a wilga vẽeneg tɩ rogem paalgã tara yõod wʋsgo. Wãn to la a wilg rẽ?

Ges-⁠y a Zezi sẽn yeel a Nikodɛm bũmb ning sẽn na yɩl n wilg-⁠a tɩ rogem paalgã sɩd tara yõodã. A yeela woto: ‘Ned sã n ka paam dogem paalga, a ka tõe n yã Wẽnnaam soolem ye.’ (Zã 3:3) “Sã n ka” wã, la “ka tõe” wã wilgdame tɩ rogem paalgã yaa bũmb sẽn yaa tɩlae. Wala makre: Ned sã n yeel tɩ “wĩndgã sã n ka puki, vẽenem ka tõe n wa,” rat n yeelame tɩ wĩndgã pukr yaa tɩlae sẽn na yɩl tɩ vẽenem zĩndi. Dẽnd a Zezi goamã me wilgdame tɩ ned sã n dat n yã Wẽnnaam soolem bɩ a Rĩungã, yaa tɩlae t’a soab paam rogem paalga.

Sẽn na yɩl tɩ yɛlã yɩ vẽeneg a Nikodɛm yamẽ, a Zezi yeela woto: ‘Yaa tɩlae tɩ y paam dogem paalga.’ (Zã 3:7) Dẽnd sã n yaa ne a Zezi, ned sã n dat n “kẽ Wẽnnaam soolmẽ” bɩ a Rĩungã pʋgẽ, yaa tɩlae t’a soab paam rogem paalga.—Zã 3:5.

Sẽn mik t’a Zezi ra getame tɩ rogem paalgã tara yõod wʋsgã yĩnga, kiris-nebã segd n bãnga rogem paalgã sẽn dat n yɛɛlga. La rẽ yĩnga yãmb tagsdame tɩ rogem paalgã yaa kiris-ned fãa yam-yãkr bɩ?

[Goam sẽn tar pãngã, seb-neng a 5]

“Wĩndgã sã n ka puki, vẽenem ka tõe n wa ye”

Rogem paalgã yaa ned fãa yam-yãkr bɩ?

ÃND n kɩtd tɩ ned paam rogem paalgã? Pastɛɛr dãmb kẽer tũnugda ne a Zezi goamã sẽn na yɩl n kɩt tɩ nebã modg n paam rogem paalga. A Zezi yeela woto: “Yaa tɩlae tɩ y paam dogem paalga.” (Zã 3:7) B tũnugda ne a Zezi goamã n modgd nebã, n yetẽ tɩ b “paam rogem paalga!” Woto b wilgdame tɩ ned ning fãa sẽn dat rogem paalgã segd n saka a Zezi la a maan yɛl a taab me. Dẽnd sã n yaa ne bãmba, rogem paalgã yaa ned fãa yam-yãkre. La rẽ yĩnga yaa woto la a Zezi wilg a Nikodɛm sɩda?

D sã n maag d yĩng n karem a Zezi goamã, d na n yãame t’a pa wilg tɩ rogem paalgã yaa ned fãa yam-yãkr ye. Bõe yĩng tɩ d yet woto? B tõe n lebga gɛrk gom-bil ning b sẽn lebg tɩ “dogem paalgã,” tɩ “yĩngr dogem” me.a Rẽ n so tɩ Biibl dãmb kẽer pʋsẽ, b ning tɩ rogem paalgã yita “yĩngri,” sẽn dat n yeel tɩ “saasẽ” bɩ “Ba wã nengẽ.” (Zã 19:11; Zak 1:17) Sɩda, yaa Wẽnnaam n kõt rogem paalgã.—1 Zã 3:9.

D sã n ning d yamẽ tɩ rogem paalgã yita yĩngri, d na n bãnga bũmb ning sẽn kɩt tɩ ned pa tõe n paam rogem paalgã a toorã. Tags-y yãmb meng rogmã yelle. Rẽ yĩnga yaa yãmb n yãk yam n na n wa dũni bɩ? Ayo. Yaa y roagdbã. Tõnd ka tõe n paam rogem paalgã me d toore, sã n pa d saasẽ Ba wã n kõ-d ye. (Zã 1:13) Rẽ n kɩt tɩ tʋm-tʋmd a Pɩɛɛr yeel woto: ‘Pẽgr Wẽnnaam tõnd Zusoab a Zezi Kirist Ba sẽn kõ tõnd dogem paalgã.’—1 Pɩɛɛr 1:3.

Ned fãa segd n paama rogem paalgã bɩ?

Neb kẽer tõe n sokame tɩ sã n mik tɩ rogem paalgã pa ned fãa yam-yãkre, bõe yĩng t’a Zezi yeel tɩ “yaa tɩlae tɩ y paam dogem paalga”? Woto yaa sokr sẽn zemse. Sã n sɩd yaa noor a Zezi sẽn kõ nebã fãa, pa zems ye. Bala na n wilgame t’a ratame tɩ d maan bũmb d sẽn pa tõe. La a sẽn yeel tɩ yaa tɩlae tɩ y “paam dogem paalgã” rat n yeelame tɩ bõe?

D sã n maag d yĩng n ges a Zezi goamã, d mikdame tɩ pa noor a sẽn kõ nebã tɩ b tũ ye. Yaa bũmb võor la a ra wilgda. Dẽnd a sẽn yeel tɩ yaa tɩlae tɩ y “paam dogem paalgã,” a ra rat n wilgame tɩ yaa bũmb sẽn kɩtd tɩ ned paam n kẽ Wẽnnaam Rĩungã pʋgẽ.—Zã 3:7.

D rɩk makre ne tẽng sẽn na n tar lekoll dãmb wʋsgo, tɩ lekoll a ye yaa tẽng-n-dãmbã kamb lekolle. La daar a yembre, sãan biig n wa n kos lekoll kãng taoor soabã n dat n karem beenẽ. La taoor soabã yeel-a lame yaa: “Yaa tɩlae tɩ f yɩ tẽng-n-biig n tõog n karem ka.” Yaa vẽeneg tɩ taoor soabã ka modgd karen-biigã t’a lebg tẽng-n-biig ye. A wilgd-a lame tɩ yaa tẽng-n-dãmbã kamb bal n karemd beenẽ. A Zezi me sẽn yeel tɩ “yaa tɩlae tɩ y paam dogem paalgã,” a ra rat n yeelame tɩ yaa neb nins sẽn paam rogem paalgã bal n kẽed Wẽnnaam Rĩungã pʋgẽ.

A Zezi sẽn gom Wẽnnaam Rĩungã yell to-to wã sõngda tõnd tɩ d bãng bũmb a to rogem paalgã wɛɛngẽ. Yaa sok-kãngã leoore: Rogem paalgã yaa bõe yĩnga? D sã n bãng sok-kãngã leoore, d na n bãnga rogem paalgã sẽn dat n yɛɛlgã sõma.

[Tẽngr note]

[Foto, seb-neng a 6]

Wõneg bʋg n be rogem paalgã la yãmb mengã rogmã sʋka?

Rogem paalgã yaa bõe yĩnga?

NEB wʋsg tẽedame tɩ sẽn na yɩl n paam fãagre, yaa tɩlae tɩ f paam rogem paalga. D ges a Zezi meng sẽn yeel bũmb ning rogem paalgã wɛɛngẽ. A yeela woto: “Ned sã n ka paam dogem paalga, a ka tõe n yã Wẽnnaam soolem ye.” (Zã 3:3) Dẽnd ned segd n paama rogem paalg sẽn na yɩl n kẽ Wẽnnaam soolem bɩ a Rĩungã pʋgẽ la pa sẽn na yɩl n paam fãagr ye. La neb kẽer tõe n yeelame tɩ paam n kẽ Wẽnnaam Rĩungã pʋgẽ ne paam fãagr yaa bũmb a yembre. La pa woto ye! Sẽn na yɩl n bãng tɩ pa bũmb a yembre, bɩ d reng n bao n bãng ‘Wẽnnaam Rĩungã’ sẽn yaa bũmb ninga.

Rĩung yaa wala goosneema buudu. Dẽnd “Wẽnnaam Rĩungã” rat n yeelame tɩ “Wẽnnaam goosneema.” Biiblã wilgdame t’a Zezi Kirist b sẽn boond tɩ “Ninsaal Biigã” n yaa Wẽnnaam Rĩungã Rĩma, la tɩ neb a taab n na n naag-a n dɩ naamã. (Daniɛll 7:1, 13, 14; Matɩe 26:63, 64) Sẽn paase, Wẽnnaam vẽnega tʋm-tʋmd a Zã t’a yã tɩ neb nins sẽn na n dɩ naam ne Kiristã yaa neb b sẽn tũus “buud sẽn yaa toor-toore, la b soolem sẽn yaa toor-toore,” la tɩ b “na n dɩɩ naam dũniyã zugu.” (Wilgri 5:9, 10; 20:6) Wẽnnaam Gomdã leb n wilgdame tɩ neb nins sẽn na n dɩ naam ne Kiristã yaa “wubr [sẽn] pa zem bũmbu,” sẽn yaa neb 144 000, b sẽn yãk dũniyã zugu.—Luk 12:32, Sebr Sõngo; Wilgri 14:1, 3.

Wẽnnaam Rĩungã bɩ a goosneemã bee yɛɛnẽ? B leb n boonda Wẽnnaam Rĩungã tɩ ‘saasẽ soolem,’ tɩ wilgdẽ t’a Zezi ne a na-rɩt-n-taasã na n zĩnda saasẽ n dɩ naamã tẽngã zugu. (Luk 8:10; Matɩe 13:11) Dẽnd Wẽnnaam Rĩungã yaa goosneemã sẽn be saasẽ, sẽn yaa a Zezi Kirist ne neb b sẽn tũus dũniyã zugu.

La a Zezi sẽn yeel tɩ ned segd n paama rogem paalg sẽn na yɩl n “kẽ Wẽnnaam soolmẽ” wã rat n yeelame tɩ bõe? A rat n wilgame tɩ ned segd n paama rogem paalg sẽn na yɩl n dɩ naam ne Kiristã saasẽ. Koɛɛg-koɛɛga, Wẽnnaam tũnugda ne rogem paalgã n yãkd neb sõor sẽn yaa bilf ninsaalbã sʋk tɩ b na n tɩ rɩ naam saasẽ.

D yãame masã tɩ rogem paalgã tara yõod wʋsgo, la tɩ yaa Wẽnnaam n kõt rogem paalgã. D bãngame me tɩ yaa ne rẽ la Wẽnnaam yãkd neb tɩ b na n tɩ rɩ naam saasẽ. La rogem paalgã paamda wãn-wãna?

[Goam sẽn tar pãngã, seb-neng a 7]

Wẽnnaam tũnugda ne rogem paalgã n yãkd neb sõor sẽn yaa bilf ninsaalbã sʋk tɩ b na n tɩ rɩ naam saasẽ

[Foto, seb-neng a 7]

Wẽnnaam Rĩungã yaa a Zezi Kirist ne neb b sẽn tũus dũniyã zugu

Rogem paalgã paamda wãn-wãna?

A ZEZI wilga a Nikodɛm rogem paalgã yõodo, a soab ning sẽn kõt rogem paalgã, neb kẽer sẽn paamd rogem paalgã võore. La a goma rogem paalgã sẽn paamd to-to yell me. A Zezi yeela woto: “Ned sã n ka rog ne koom la Sɩɩg Sõngo, a ka tõe n kẽ Wẽnnaam soolmẽ ye.” (Zã 3:5) Woto rat n yeelame tɩ yaa ne koom la ne Sɩɩg Sõng la ned paamd rogem paalgã. “Koomã la Sɩɩg Sõngã” yell b sẽn gomd ka wã yaa bõe takɩ?

“Rog ne koom la Sɩɩg Sõng” rat n yeelame tɩ bõe?

Yaa vẽeneg t’a Nikodɛm sẽn da yaa zʋɩf rãmbã tũudum karen-saambã, a ra miime tɩ Biiblã sã n gomd “Wẽnnaam sɩɩg” yelle, yaa pãng ning Wẽnnaam sẽn kõt nebã tɩ b tõogd n tʋmd tʋʋm-kãsemsã. (Sɩngre 41:38; Yikri 31:3; 1 Sãmwɛll 10:6) Dẽnd a Zezi sẽn gom “sɩɩg” yellã, yaa vẽeneg t’a Nikodɛm bãngame tɩ yaa Wẽnnaam vʋʋsem sõngã yell la a ra gomda.

La koom ning yell a Zezi sẽn gomã yẽ? D ges yɛl nins sẽn zĩnd nand t’a Zezi sõs ne a Nikodɛmã, la yɛl nins sẽn zĩnd b sõsgã poorã. A Zãmbatiis la a Zezi karen-biisã ra lisda nebã koomẽ. (Zã 1:19, 31; 3:22; 4:1-3) Zerizalɛm nebã ra mii koom lisgã sẽn yaa a soaba. Rẽ n so t’a Zezi sẽn gom koom yellã, a Nikodɛm bãngame tɩ yaa lisgã koom yell la a ra gomda.a

Lisg ne “Sɩɩg Sõngã”

“Rog ne koom” rat n yeelame tɩ reeg koom lisgu. La “rog ne Sɩɩg Sõng” rat n yeelame tɩ bõe? Nand t’a Nikodɛm sõs ne a Zezi, a Zãmbatiis ra reng n wilgame tɩ koomã la Sɩɩg Sõngã fãa tara tʋʋmd lisgã pʋgẽ. A yeela woto: “Mam lisa yãmb koom pʋgẽ, la [a Zezi] na n lisa yãmb Sɩɩg Sõng pʋgẽ.” (Mark 1:7, 8) Evãnzill gʋlsd a Mark wilga pipi lisgã sẽn tũ ne koom la Sɩɩg Sõngã sẽn yɩ to-to. A yeela woto: “Wakat kãnga, a Zezi yii Galile Nazarɛt n wa, la a Zã lisa bãmb Zʋrdẽ koom pʋgẽ. La b sẽn yit koomẽ wã b yãa yĩngr sẽn pake la Sɩɩg Sõng sẽn wẽnd wall sẽn sigd bãmb zugu.” (Mark 1:9, 10) A Zãmbatiis sẽn lis a Zezi Zʋrdẽ koomã pʋgẽ wã, a paama koom lisgu. La sasa ning Wẽnnaam vʋʋsem sõngã sẽn sig a zugã, a paama Sɩɩg Sõng bɩ vʋʋsem sõng lisgu.

A Zezi sẽn deeg lisgã tɩ yʋʋm a tãab poore, a yeela a karen-biisã tɩ ka la dasem bilf bala b “na n paama lisg Sɩɩg Sõng pʋgẽ.” (Tʋʋma 1:5) Yɩɩ sasa bʋg la b paam lisg Sɩɩg Sõng pʋgẽ wã?

Yʋʋmd 33 Pãntekotã daare, a Zezi karen-biis sẽn na ta 120 ra tigma taab roog a ye pʋgẽ Zerizalɛm. “La vugr bala bʋrg sẽn wẽnd sob-kãseng yii [saasẽ] n wa n pid roog ninga bãmb sẽn be wã. La bãmb yãa zɛlma sẽn wẽnd bug-witim . . . . Bãmb fãa pida ne Sɩɩg Sõngo.” (Tʋʋma 2:1-4) Baraare, b sagla nebã sẽn da be Zerizalɛmã me tɩ b reeg koom lisgu. Tʋm-tʋmd a Pɩɛɛr yeela kʋʋngã woto: “Bɩ y tek yam n kos sugr tɩ y ned kam fãa sak koom lisg ne a Zezi Kirist yʋʋre y yel-wẽnã sugr yĩnga; la y reeg Wẽnnaam kũunã sẽn yaa Sɩɩg Sõngã.” La nebã maana wãna? “Neb nins sẽn deeg a Pɩɛɛr goamã paama koom lisgu. La baraare karen-biisã paasa sẽn kolg tus a tãabo.”—Tʋʋma 2:38, 41.

Rogem paalgã tũuda ne lisg a yiibu

Bõe la lisg a yiibã wilgd tõnd rogem paalgã wɛɛngẽ? Wilgdame tɩ lisg a yiibã yaa tɩlae sẽn na yɩl n paam rogem paalgã. D tẽeg tɩ b reng n lisa a Zezi koomẽ. Rẽ poore, vʋʋsem sõngã siga a zugu. Pipi karen-biisã me reng n paama lisg koomẽ. Kẽer yaa a Zãmbatiis n lis-ba. Rẽ poore, b paama vʋʋsem sõngã. (Zã 1:26-36) Neb 3 000 wã me reng n deega koom lisgu, n yaool n paam vʋʋsem sõngã.

Masã, d bãnga nebã sẽn paam rogem paalgã to-to yʋʋmd 33 Pãntekotã daarã. La wãn-wãn la ned paamd rogem paalgã rũndã-rũndã? Yaa wala sẽn yɩ to-to ne a Zezi tʋm-tʋmdbã la a pipi karen-biisã. Pipi, f segd n deng n tɛka yam n kos f yel-wẽnã sugri, n bas f manesem wẽnsã, n dɩk f meng n kõ a Zeova n na n maan a raabã, la f reeg koom lisgu. Yiib-n-soaba, Wẽnnaam sã n yãk-f tɩ f rɩ naam a Rĩungã pʋgẽ, a zaeed-f-la ne a vʋʋsem sõngã. Pipi babgã sẽn yaa bũmb nins f sẽn segd n maan n wa tãag koom lisgã yaa nedã meng yam-yãkre. La yiib-n-soabã sẽn yaa vʋʋsem sõng lisgã yaa Wẽnnaam n kõt a sẽn dat-a soaba. Ned sã n paam lisg a yiibã fãa la b tõe n yeel t’a soab paama rogem paalgã.

Bõe yĩng t’a Zezi gom ‘rog ne koom la Sɩɩg Sõng’ yell ne a Nikodɛm? Yaa sẽn na yɩl n wilg tɩ koom la vʋʋsem sõng lisgã tɛka, toeeng sẽn yaa kaseng n zĩndidi. Sõsg ning sẽn pʋgdã gomda rẽ yelle.

[Tẽngr note]

[Foto, seb-neng a 9]

A Zãmbatiis lisa Israɛll neb nins sẽn tek yam n kos sugrã koomẽ

Rogem paalgã tɛka, toeen-bʋg n zĩndidi?

A ZEZI sẽn wa n gomd paam vʋʋsem sõng lisgã yellã, bõe yĩng t’a gom ‘rog ne Sɩɩg Sõng’ yelle? (Zã 3:5) Naoor wʋsgo b sã n gomd bũmb rogem yelle, b gomda a sɩngr yelle. Dẽnd “dogem paalgã” yaa bũmb sɩngre. Rẽ n so tɩ ‘rog ne Sɩɩg Sõngã’ la “dogem paalgã” wilgd zems-n-taar buud a to sẽn na n zĩnd neb nins sẽn paam vʋʋsem sõng lisgã ne Wẽnnaam sʋka. Wãn to la b paamd zems-n-taar kãngã?

Tʋm-tʋmd a Poll wilga Wẽnnaam sẽn segend nebã to-to tɩ b na n tɩ rɩ naam saasẽ wã. A gʋlsa a wakatẽ kiris-nebã n wilg-b tɩ Wẽnnaam na n deeg-b lame tɩ b lebg yẽ kamba. (Galat dãmba 4:5; Hebre dãmba 12:7) Sẽn na yɩl n bãng toeeng ning sẽn zĩndid nin-kãensã vɩɩmã pʋgẽ Wẽnnaam sẽn deeg-b tɩ b lebg a kambã tɛka, bɩ d leb n ges sãanã biigã sẽn da rat n tɩ karem tẽng-n-dãmbã kamb lekollẽ wã makrã.

B lebgda Wẽnnaam kamba

Makrã pʋgẽ, d yãame tɩ biigã sẽn da pa tẽng-n-ned biigã yĩnga, a pa paam sor n na n karem tẽng-n-dãmbã kamb lekollẽ wã ye. La raar a yembre, yɛlã toeemame. Tẽng-n-ned n deeg biigã t’a lebg a biiga. Biigã sẽn paam n lebg tẽng-n-ned biig mãsã wã, a tara sor n tõe n tɩ karem tẽng-n-dãmbã kamb lekollẽ, la a tõe n maan yɛl a taab me.

Mak-kãngã wilgda toeeng ning sẽn zĩndid neb nins sẽn paamd rogem paalgã vɩɩm pʋgẽ. Biigã ra na n paam n karma tẽng-n-dãmbã lekollẽ, a sã n da yaa tẽng-n-ned biiga. La biigã pa tõe n lebg tẽng-n-ned biig a toor ye. Woto me, neb kẽer na n paama zĩig Wẽnnaam Rĩungã pʋgẽ, la yaa b sẽn na n paam rogem paalgã bal la b tõe n paam dẽ. La b pa tõe n paam rogem paalgã b toor ye. Yaa Wẽnnaam n kõte.

Bõe n kɩt tɩ biigã paam n karem lekollẽ wã? Yaa tẽng-n-nedã sẽn deeg-a t’a lebg a biigã yĩnga. Biigã meng pa toeem ye. La a sẽn paam n lebg tẽng-n-ned biig masã wã, a tara sor n tõe n maan wa tẽng-n-dãmbã kamb sẽn maandã fãa. Woto yaa wala a paama rogem paalga. A lebga tẽng-n-ned biiga, tɩ kɩt t’a tõe n tɩ karem tẽng-n-dãmbã kamb lekollẽ wã.

A Zeova me kɩtame tɩ ninsaalb sẽn pa zems zãng lebg yẽ kamba. Tʋm-tʋmd a Poll sẽn naag nin-kãensã wã gʋlsa a tẽed-n-taasã n yeel-b woto: “Yãmb deega Sɩɩg Sõngo sẽn kɩt tɩ tõnd yɩ Wẽnnaam kamba tɩ tõnd kelemdẽ n yetẽ: ‘Abba, Ba!’ La Sɩɩg Sõng menga kɩta kaset ne tõnd sɩɩse tɩ tõnd yaa Wẽnnaam kamba.” (Rom dãmba 8:15, 16) Wẽnnaam sẽn sak n deeg kiris-nin-kãensã wã, b lebga “Wẽnnaam kamba.”—1 Zã 3:1; 2 Korẽnt dãmba 6:18.

Baa ne Wẽnnaam sẽn sak n deeg nin-kãensã tɩ b lebg a kambã, b mensã pa toeem ye. B ket n yaa ninsaalb sẽn pa zems zãnga. (1 Zã 1:8) Baasg zãnga, wala a Poll sẽn togs n paasã, b sẽn lebg Wẽnnaam kambã, b paama zu-nood a taaba. Wakat kãnga, Wẽnnaam vʋʋsem sõngã kɩtdame tɩ b bãng vẽeneg tɩ b na n tɩ vɩɩmda saasẽ ne Kirist. (1 Zã 3:2) Vʋʋsem sõngã sẽn kõ-b kaset vẽeneg woto wã kɩtame tɩ b sẽn get vɩɩmã to-to wã pa le yaa wa pĩndã ye. (2 Korẽnt dãmba 1:21, 22) Woto yaa wala b sẽn paam rogem paalga.

Biiblã gomda neb nins sẽn lebg Wẽnnaam kambã yell n yet woto: “Bãmb na n yɩɩ Wẽnnaam ne Kirist maan-kʋʋdba, bãmb na n dɩɩ naam ne bãmb yʋʋm tusri.” (Wilgri 20:6) Nin-kãensã na n dɩɩ naam ne Kirist Wẽnnaam Rĩungã bɩ a goosneemã pʋgẽ saasẽ. Tʋm-tʋmd a Pɩɛɛr togsa a tẽed-n-taasã tɩ b na n paama “dogem-pʋɩɩr sẽn ka tõe n sãam, la sẽn ka dẽgemda, la sẽn ka loogda, sẽn bĩng” bãmb yĩng saasẽ. (1 Pɩɛɛr 1:3, 4) Ad sɩd yaa rogem-pʋɩɩr tɛkẽ!

La naamã wɛɛngẽ, sokr n be. Neb nins sẽn paam rogem paalgã sã n na n yɩ rĩm dãmb saasẽ, ãnd dãmb zug la b na n dɩ naamã? Sõsg ning sẽn pʋgdã leokda sok-kãngã.

[Foto, seb-neng 10]

Bõe la a Poll yeel Wẽnnaam kambã wɛɛngẽ?