SAK PIIG LA A YIIBU
Bõe la y tõe n maan n lebg Wẽnnaam zoa?
1, 2. Ãnd dãmb n paam n yɩ a Zeova zo-rãmba?
YÃMB sã n baood zoa, nin-bʋg buud la y na n yãke? Yaa ned sẽn nong yãmb zĩigẽ, tɩ yãmb me nong a zĩigẽ. Ned sẽn tar zʋg-sõma la yel-manesem sẽn noom yãmba.
2 Wẽnnaam a Zeova me yãkda neb tɩ b yɩ a zo-rãmba. Wala makre, a Abrahaam yɩɩ a Zeova zoa. (Ezayi 41:8; Zak 2:23) A Zeova ra nonga a Davɩɩd me, n yeel t’a yaa ‘rao sẽn ta yẽ yam.’ (Tʋʋmã 13:22) No-rɛɛs a Dãniyɛll me yɩɩ a Zeova “nin-nongre.”—Dãniyɛll 9:23.
3. Bõe la a Abrahaam, a Davɩɩd la a Dãniyɛll maan n paam a Zeova zoodo?
3 Bõe la a Abrahaam, a Davɩɩd la a Dãniyɛll maan n paam a Zeova zoodo? A Zeova yeela a Abrahaam yaa: “Fo saka mam noorã.” (Sɩngre 22:18) Yaa neb nins sẽn sikd b mens n sakd a Zeova wã n tõe n yɩ a zo-rãmba. A yeela Israyɛll buudã yaa: “Sak m koɛɛgã tɩ m na n yɩɩ yãmb Wẽnnaam, tɩ yãmb yɩ mam nebã.” (Zeremi 7:23) Dẽnd yãmb me sã n dat n lebg a Zeova zoa, y tog n sak-a lame.
A ZEOVA KOGENDA A ZO-RÃMBÃ
4, 5. Bõe la a Zeova maand n kogend a zo-rãmbã?
4 Biiblã pʋgẽ, a Zeova wilga a sẽn maand to-to n ‘sõngd neb nins sẽn nong yẽ ne b sũyã fãa wã.’ (2 Kibayã 16:9) Yɩɩn-sõamyã 32:8 wã pʋgẽ, a Zeova yeta ned ning fãa sẽn yaa a zoa yaa: “Mam na n zãmsa foom, la m wilg foom sor ning f sẽn tog n tũ. Mam na n sagla foom, la mam nin na n bee fo zugu.”
5 La bɛ n be n tar pãng wʋsgo, n pa rat tɩ d yɩ a Zeova zo-rãmb ye. La a Zeova ratame n kogl-do. (Karm-y Yɩɩn-sõamyã 55:23.) Tõnd sẽn yaa a Zeova zo-rãmbã, d tũud-a-la ne d sũy fãa. Baa zu-loees sasa, d ket n sakd-a lame. Tõnd teega a Zeova wa yɩɩn-gʋlsdã me sẽn da teeg-a wã. Yɩɩn-gʋlsdã yeelame yaa: “Mam geta Sẽn-Ka-Saab daar fãa. Bãmb sã n be mam dɩtgo, bũmb kõn tol n miim maam ye.” (Yɩɩn-sõamyã 16:8; 63:9) Bõe la a Sʋɩtãan maand sẽn na yɩl tɩ d ra tõog n yɩ Wẽnnaam zo-rãmba?
A SƲƖTÃAN RÕTA NINSAALBÃ
6. Bõe la a Sʋɩtãan rõt ninsaalbã?
6 Sak 11 wã pʋgẽ, d yãame t’a Sʋɩtãan kãnega a Zeova. A rõd-a lame t’a yaa ziri yagda, la t’a pa maand sẽn yaa tɩrga, a sẽn pa bas a Ãdem ne a Hawa tɩ b yãk sẽn yaa sõma la wẽng b toorã yĩnga. Zoob sebrã tolg n wilga vẽeneg t’a Sʋɩtãan rõta neb nins sẽn dat n yɩ Wẽnnaam zo-rãmbã. Sã n yaa ne a Sʋɩtãana, b tũuda Wẽnnaam b mengã nafr yĩnga, pa b sẽn nong-a yĩng ye. A pʋd n wilgame tɩ yẽ tõeeme tɩ ned buud fãa kɩɩs Wẽnnaam. Bɩ d ges a Zoob kibarã sẽn zãmsd tõnd bũmb ninga, la a Zeova sẽn maan n kogl-a.
7, 8. a) A Zoob yɩɩ nin-bʋg buudu? b) Bõe la a Sʋɩtãan rõd a Zoobe?
7 A Zoob yɩɩ nin-bʋg buudu? A yɩɩ nin-sõngo. A vɩɩmda sẽn zems yʋʋm 3600 sẽn looge. A Zeova yeelame tɩ ned ra kae dũniyã zug n yaa nin-sõng wa a Zoob ye. A ra tũuda Wẽnnaam ne a sũur fãa, n kis wẽnga. (Zoob 1:8) Hakɩɩka, a Zoob yɩɩ a Zeova zoa meng-menga.
8 A Sʋɩtãan wa n yeelame t’a Zoob tũuda Wẽnnaam a mengã nafr yĩnga. A yeela a Zeova yaa: “Yãmb wẽe yãgr n gũbg-a, yẽnda ne a zakã, la ne a sẽn so wã fãa. Yãmb ninga a nus tʋʋmã barka, la a rũmsã fɩɩgdame n pit tẽngã. Mam kotame bala, tɩ y tẽeg y nug n sɩɩs a sẽn so wã fãa. La mam mii hakɩɩka, t’a na n tʋʋsa yãmba.”—Zoob 1:10, 11.
9. A Zeova basame t’a Sʋɩtãan maan bõe?
9 A Sʋɩtãan rõda a Zoob t’a tũuda a Zeova sẽn nafd-a wã yĩng bala. A yeelame me tɩ yẽ tõeeme t’a Zoob bas a Zeova. A Zeova ra miime t’a Sʋɩtãan yagdame, la a basame t’a nams a Zoobe, sẽn na yɩl tɩ b bãng t’a Zoob sẽn yaa yẽ zoa wã yaa a sẽn nong-a wã yĩnga.
A SƲƖTÃAN NAMSA A ZOOB
10. Bõe la a Sʋɩtãan maan n nams a Zoobe? A Zoob manesem yɩɩ wãna?
10 A Sʋɩtãan reng n kɩtame tɩ b zu a Zoob rũmsã kẽere, la b kʋ sãnda. Rẽ poore, a kʋʋ a Zoob tʋm-tʋmdbã fãa la bala. A Zoob bõna a sẽn da tarã fãa. Rẽ poore, a Sʋɩtãan kɩtame tɩ sob-kẽeng kʋ a Zoob kamb piigã. La a Zoob kell n saka a Zeova. “Bõn-kãens fãa pʋga, a Zoob ka tol n maan yel-wẽnde, la a ka yeel tɩ Wẽnnaam maana bũmb sẽn ka zems ye.”—Zoob 1:12-19, 22.
A Zeova ninga a Zoob barka, a sẽn kell n sak-a wã
11. a) Bõe me la a Sʋɩtãan maan a Zoobe? b) A Zoob maana wãna?
11 A Sʋɩtãan pa tek woto ye. A tɩ yeela Wẽnnaam yaa: “M kotame tɩ y sɩɩs a kõabã ne a yĩngã nemd n gese, mam mii vẽeneg t’a na n tʋʋsa yãmb n ka zoe y nif ye.” Rẽ zugẽ, a Sʋɩtãan loba a Zoob bã-kɛgenga. (Zoob 2:5, 7) La baa ne rẽ a Zoob kell n saka a Zeova. A yeelame: “Hal n tãag mam kũum, mam kõn tol n bas m burkĩndã ye.”—Zoob 27:5.
12. Bõe la a Zoob maan-yã, tɩ wilgdẽ t’a Sʋɩtãan yaa ziri yagda?
12 A Zoob ra pa mi t’a Sʋɩtãan rõd-a lame, a ra pa wʋmd a namsgã võor me. A ra tẽedame tɩ yaa a Zeova n kɩt tɩ yẽ namsdẽ. (Zoob 6:4; 16:11-14) La baa ne rẽ, a kell n saka a Zeova. Ra lebga vẽeneg t’a Zoob pa tũud Wẽnnaam a meng nafr yĩng ye. A ra yaa Wẽnnaam zoa, a sẽn da nong Wẽnnaamã yĩnga. A Sʋɩtãan sẽn yeelã fãa ra yaa ziri.
13. A Zoob sẽn kell n sak Wẽnnaamã, a paama bõe?
13 Baa a Zoob sẽn da pa mi tɩ yaa a Sʋɩtãan n dõt-a wã, a kell n saka Wẽnnaam, tɩ wilgdẽ t’a Sʋɩtãan yaa wẽnem soaba. A Zeova ninga a Zoob barka, a wẽn-sakrã yĩnga.—Zoob 42:12-17.
A SƲƖTÃAN RÕTA YÃMB ME
14, 15. Bõe n wilgd t’a Sʋɩtãan rõda ninsaalbã fãa?
14 Yell ning sẽn paam a Zoobã zãmsda tõnd bũmb wʋsgo. Rũndã-rũndã, a Sʋɩtãan yetame tɩ tõnd tũuda a Zeova sẽn mik tɩ nafda tõndã. Zoob 2:4 pʋgẽ, a Sʋɩtãan yeelame: “Ninsaal dɩkda a sẽn tar fãa n kõ a vɩɩm yĩnga.” Dẽnd a pa rõd a Zoob bal ye. A rõta ninsaalbã fãa, n yetẽ tɩ b baooda b mens nafre. Hal ne rũndã, a Sʋɩtãan ket n tʋʋda a Zeova la a rõt neb nins sẽn tũud-a wã. Yel-bũn 27:11 (Wẽnnaam Sebre, 1983) yetame: “M biiga, maan yam n kõ maam sũ-noogo tɩ m paam n leok sẽn paoogd-a maamã.”
15 Yãmb tõe n yãka yam n sak a Zeova n lebg a zoa meng-menga, n wilg t’a Sʋɩtãan yaa ziri yagda. Baa sã n yaa tɩlɛ tɩ y toeem bũmb kẽer y vɩɩmã pʋgẽ n paam n lebg Wẽnnaam zoa, bãng-y tɩ bũmb kae t’a yõod ta rẽ ye. A Sʋɩtãan yeelame tɩ yãmb sã n wa tar zu-loeese, y na n basa Wẽnnaam. A rat n belga yãmb tɩ y ra le tũ Wẽnnaam ye. Wãn to la a maand dẽ?
16. a) Wilg-y bũmb nins a Sʋɩtãan sẽn maand n dat tɩ nebã bas a Zeova tũubu. b) Bõe la a Sʋɩtãan tõe n maane, n dat tɩ yãmb mengã bas a Zeova tũubu?
16 A Sʋɩtãan tũnugda ne manesem buud toor-toor n dat tɩ d ra yɩ Wẽnnaam zo-rãmb ye. A “gõodame n kelemd wa gɩgemde, n baood a sẽn tõe n paam a soab n sãam.” (1 Pɩyɛɛr 5:8) Rẽnd y zo-rãmba, y zakã neb bɩ neb a taab sã n dat tɩ y bas Biiblã zãmsgo, la y ra tũ y sẽn zãmsd bũmb ningã, pa segd n ling-y ye. Y tõe n wa tagsdame tɩ b pa rat yãmb neer ye.a (Zã 15:19, 20) A Sʋɩtãan leb n “toeemda a meng n lebg wa malɛɛk sẽn tar vẽenem” sẽn na yɩl n belg tõnd tɩ d kɩɩs a Zeova. (2 Korẽnt-rãmbã 11:14) Bũmb a to me la a Sʋɩtãan maanda, n dat tɩ d bas a Zeova. A kɩtdame tɩ d tags tɩ d pa tol n tõe n ta Wẽnnaam yam ye.—Yel-bũnã 24:10.
SAK-Y A ZEOVA NOYÃ
17. Bõe n kɩt tɩ tõnd sakd a Zeova?
17 Tõnd sã n sak a Zeova, d wilgdame t’a Sʋɩtãan yaa ziri yagda. Bõe n tõe n sõng-d tɩ d sak a Zeova? Biiblã yetame: “Bɩ y nong Sẽn-Ka-Saab [“a Zeova,” MN] sẽn yaa yãmb Wẽnnaamã ne y sũur fãa, la ne y yalẽ fãa la ne y pãngã fãa.” (Tõodo 6:5) Tõnd sakda a Zeova, d sẽn nong-a wã yĩnga. D nonglmã ne Wẽnnaam sã n paasdẽ, d na n dat n maana bũmb nins fãa a sẽn yet tɩ d maanã. Tʋm-tʋmd a Zã yeelame yaa: “Nong Wẽnnaam yaa tɩ sak bãmb tõodã.” D sã n nong a Zeova ne d sũur fãa, d na n yãame t’a noyã sakr “ka toog ye.”—1 Zã 5:3.
18, 19. a) Sõdg-y bũmb kẽer a Zeova sẽn kisi. b) Bõe n kɩt tɩ d miẽ t’a Zeova pa kot tõnd tɩ d maan bũmb d sẽn pa tõe?
18 A Zeova wilga tõnd bũmb nins a sẽn kisi. Y sã n ges zĩ-gũbrã sẽn yet tɩ “Kisg-y bũmb nins a Zeova sẽn kisã,” y na n yãa bũmb kẽere. Y tõe n tagsame tɩ sãnda pa tolg n yaa wẽng ye. La y sã n karem Biiblã vɛrse-rãmbã, la y bʋgs neere, y mikdame t’a Zeova noyã tũub la sõma. Tõe tɩ y mik tɩ bũmb kẽer la y tog n toeeme. La baa sã n yaa toogo, y sã n modg n toeeme, y na n lebga Wẽnnaam zoa, tɩ y yamã gãe bãane, tɩ y sũurã noome. (Ezayi 48:17, 18) Bõe n kɩt tɩ d miẽ tɩ ned tõe n toeemame n tõog n ta Wẽnnaam yam?
19 A Zeova zɩ n kos tõnd tɩ d maan bũmb d sẽn pa tõe ye. (Tõodo 30:11-14) A yaa tõnd zoa sẽn mi tõnd n yɩɩd tõnd mengã. A mii tõnd sẽn tõe n maane, la d sẽn kongd pãng zĩig ningã. (Yɩɩn-sõamyã 103:14) Tʋm-tʋmd a Poll togsa gomd sẽn kengd raoodo. A yeelame: “Wẽnnaam yaa sɩd maanda, la b ka na n sak tɩ yãmb paam makr sẽn yɩɩd y pãng ye. La makr sã n wa, Wẽnnaam na n kõo yãmb manesem y sẽn na maan n yi, tɩ yãmb tõe n yals makrã pʋgẽ.” (1 Korẽnt-rãmbã 10:13) D tõe n kɩsa sɩd tɩ wakat fãa, a Zeova na n kõo tõnd pãng tɩ d maan sẽn yaa tɩrga. A na n kõo tõnd a pãn-kãsengã, tɩ d tõog toog zu-loees sasa.—2 Korẽnt-rãmbã 4:7.
NONG-Y BŨMB NINS WẼNNAAM SẼN NONGÃ
20. Zʋg-sõma bʋs la y segd n modg n paame, la bõe yĩnga?
20 D sã n dat n lebg a Zeova zoa, d pa tog n le maand a Zeova sẽn kis ye. (Rom-dãmbã 12:9) La pa rẽ bal ye. Wẽnnaam zo-rãmbã nonga bũmb nins a sẽn nongã. Yɩɩn-sõamyã 15:1-5 gomda rẽ yelle. (Karm-y.) A Zeova zo-rãmbã rɩkda a togs-n-taare, n paam zʋg-sõma. Wala makre, “nonglem, la sũ-noogo, la bãane, la sũ-mare, la sõmblem, la maan-neere, la maan-sɩda, la bʋgsem, la yõk-m-menga.”—Galat-rãmbã 5:22, 23.
21. Bõe n na n sõng-y tɩ y paam zʋg-sõma sẽn tat Wẽnnaam yam?
21 Bõe n na n sõng-y tɩ y paam zʋg-sõma? Y tog n karemda Biiblã la y zãmsd-a wakat fãa, n tõog n bãng bũmb nins a Zeova sẽn nongã. (Ezayi 30:20, 21) Dẽ, y na n maneg n nonga a Zeova n paase, tɩ rẽ kɩt tɩ y rat n sak a noyã.
22. Yãmb sã n sak a Zeova, yõodã yaa bõe?
22 Tõe tɩ bũmb kẽer la y tog n toeeme. D tõe n maka rẽ ne ned sẽn na n pidg fu-kʋdre, n yeelg fu-paalle. Sɩd me, Biiblã yetame tɩ segdame tɩ y ‘yeeg y yalẽ-kʋdgã’ la y ‘yelg yalẽ-paalga.’ (Koloos-rãmbã 3:9, 10) Baa sã n yaa toogo, y sã n modg n toeem n sak a Zeova, a pʋlmame t’a na n ning-y-la barka. (Yɩɩn-sõamyã 19:12) Bɩ y sak a Zeova, n wilg t’a Sʋɩtãan yaa ziri yagda. Tũ-y-yã a Zeova, y sẽn nong-a ne y sũur fãa wã yĩnga, pa y sẽn na n wa paam keoor yĩng ye. Dẽ, y na n lebga a zoa hakɩɩka!
a Woto pa rat n yeel tɩ neb nins sẽn dat tɩ y bas Biiblã zãmsgã bee a Sʋɩtãan nugẽ t’a wẽnd-b ye. La yẽ n yaa “dũni-kãngã na-wẽngã,” tɩ ‘dũniyã zãng be a nugẽ.’ Dẽnd neb kẽer sã n dat n gɩdg tõnd tɩ d ra tũ a Zeova, pa lingd tõnd ye.—2 Korẽnt-rãmbã 4:4; 1 Zã 5:19.