Maam ne m ba wã yaa n zemsa taaba

M KIBARÃ

Pagsanjan yaa tẽng sẽn be Filipin soolmẽ wã. Sãamb wʋsg wata be n get ko-zoetem sẽn yit gɛɛm zut n kiigdẽ. Yaa tẽn-kãng pʋgẽ la m baaba a Nardo Leron bɩ-yã. A roagdbã nus ra pa zãad ye. Goosneemã taoor-dãmbã, polɩɩs-rãmbã la a tʋʋmã zĩigẽ nebã sẽn da tʋmd pʋ-lik tʋʋmã kɩtame t’a lebg sũ-to-neda, t’a sũurã yikd tao-tao me.

Mam roagdbã tʋma wʋsg n ges b kamb a nii wã yelle. B ra wae n kẽnda tãensẽ wã n kood sẽn na yɩl n paam rɩɩbo. B ra kaoosda be. Naoor wʋsgo, maam ne m kẽem a Rodelio ra segd n gesa d mens yelle, tɩ komã ra mii n tar tõndo. Baa tõnd sẽn da yaa kambã, vɩʋʋg ra kae n deemdẽ ye. Biig fãa sã n da ta yʋʋm a yopoe, a ra segd n tɩ tʋma kaokã pʋtẽ, n tʋkd zɩɩb n dʋʋd tãensã. Sã n da zɩs wʋsgo, yaa tɩlɛ tɩ d vũ-a n dʋ.

Tõnd ba wã ra pãbda tõndo, la sẽn da zabd tõnd n yɩɩdã yaa a sẽn mi n pãbd d ma wã. Tõnd da mi n mak n na n gɩdg-a lame la d pa tõogd ye. Maam ne a Rodelio zemsa taab n yeel tɩ d sã n wa bɩ, d na n kʋʋ d baaba. M da rata ne m sũur fãa n paam baaba sẽn nong tõndo!

Mam sũurã sẽn da sãamd wʋsg m baaba nin-kɛglmã yĩngã, m yii zakẽ wã m sẽn wa n tar yʋʋm 14. M sẽn da pa tar roog n gãe wã, m da gãee vɩʋʋgẽ wã, la m sɩng n yũud marizuana. M wa n dɩkda sãambã ne batayo n kẽngd zĩig ning koomã sẽn yit gɛɛmã zut n kiigdẽ wã.

Yʋʋm a wãn poore, mam kẽnga inivɛrsite Maniiy tẽngã pʋgẽ. La mam sẽn da lebd Pagsanjan n tʋmd wɩkɛn fãa wã, m da pa le tar sẽk wʋsg n karemdẽ ye. Mam vɩɩmã ra pa le tar võore, Marizuana wã yũub me ra pa le tõe n boog m yɩɩrã ye. Mam wa n sɩnga dorg a taab yũubu, wala makre, metamfetamin ne kokayɩn la eroyɩn. Naoor wʋsgo, dorgã yũub ne yoobã tũuda taaba. Naongã, tʋʋm-kɛgã la namsgã ra bee zĩig fãa. Mam da kisa goosneemã taoor dãmbã, n yetẽ tɩ yaa bãmb n wa ne bõn-kãensã fãa. Mam soka Wẽnnaam yaa: “Bõe yĩng tɩ vɩɩmã yaa woto?” La tũudum nins fãa pʋgẽ mam sẽn kẽngã, m pa paam m sokrã leoor ye. Mam da maneg n yũuda dorg-rãmb wʋsgo, n dat tɩ m yɩɩrã booge.

Yʋʋmd 1972 wã, Filipin tẽngã karen-bi-bɛdã sũu taab n na n wilg goosneemã taoor dãmb b sũ-pa-noaanga. Vugri, m tɩ naag-b lame. Zabr n wa n yiki, tɩ b yõg neb wʋsg n pake. Kiis a wãn poore, taoor dãmbã wilgame tɩ tẽngã neb fãa segd n tũu sodaasã noore.

Mam le sɩng n gãee vɩʋʋgẽ wã. La so-kãngã wã, yaa mam sẽn da zoet sodaasã na n wa yõk-ma, m sẽn da naag karen-bi-bɛdã n zab ne goosneemã taoor dãmbã. M sẽn da rat n paamd ligd n daad dorgã, mam sɩnga zuubu, la m yood ne rakãagbã la sãambã. M da pa le yɛɛsd kũum ye.

Wakat kãnga, mam ma wã ne m yaoã ra sɩnga Biiblã zãmsg ne a Zeova Kaset rãmbã. M baaba sũurã yika wʋsgo, t’a yõog sɛb nins b sẽn da tar n zãmsd Biiblã. La b yiibã fãa kell n zãmsa Biiblã, n wa reeg lisg n lebg a Zeova Kaset rãmba.

Daar a yembre, a Zeova Kaset soab n yeel m baaba tɩ Biiblã wilgame tɩ wakat n wate, tɩ tɩrlem hakɩɩk na n zĩnd tẽngã gill zugu. (Yɩɩn-sõamyã 72:12-14) Gomdã kẽe m baaba sõma, t’a yãk yam n na n karem Biiblã a toor n gese. A sẽn karmã, a pa yã Wẽnnaam sẽn pʋlem t’a na n lugla goosneem-sõngã bal ye. A yãnda bũmb ning Wẽnnaam sẽn dat tɩ sɩdbã ne ba-rãmbã maanã. (Efɛɛz rãmbã 5:28; 6:4) Pa yã n kaoos la yẽ ne m kẽemã ne m yaopã fãa lebg a Zeova Kaset rãmb ye. La mam sẽn da zãrã, m da pa mi ye.

BIIBLÃ SẼN TOEEM MAAM TO-TO

Yʋʋmd 1978 wã, mam tɩ zĩnda Ostrali tẽngẽ wã. La baa tẽngã sẽn da be laafɩ tɩ vɩɩmã noomẽ wã, mam yamã ra pa gãe ye. Mam da ket n yũuda rãamã la dorgã. Kaoosg zugẽ, a Zeova Kaset rãmb n wa n kaag maam. B sẽn wilg maam tɩ nebã na n wa vɩɩmda ne bãan tẽngã zugã yɩɩ maam noogo, la mam da yɛɛsdame n pa rat n naag a Zeova Kaset rãmbã ye.

Rẽ poor bilfu, mam leba Filipin n na n tɩ maan semen a wãna. Mam kẽemã ne m yaopã yeela maam, tɩ m baaba modga wʋsg n lebg nin-bʋgsgo. La mam sũurã sẽn da yik wʋsg ne-a wã yĩnga, mam da pa rat n kolg-a ye.

Mam yao bi-pugl n tik Biiblã n wilg maam bũmb ning sẽn kɩt tɩ namsgã la tʋʋm-kɛgã pid zĩig fãa wã. Bi-bilf a woto sẽn tõog n leok mam sogsgã linga maam wʋsgo. Nand tɩ m lebg n looge, m baaba kõo maam Y Tõe n Vɩɩnda Wakat Sẽn-kõn-sa Tẽng zug Arzãnẽa sebrã. A yeelame maam yaa: “Ra le nams f meng ye. Seb-kãngã na n sõnga foom tɩ f paam f sogsgã leoore.” A sagla maam tɩ m sã n ta Ostrali bɩ m bao a Zeova Kaset rãmbã zĩiga.

Mam tũu m baaba saglgã. M sẽn ta Brisban, m baoo a Zeova Kaset rãmbã Rĩung roog sẽn pẽ m zakã. Mam sakame n na n zãms Biiblã. Bãngr-goam nins sẽn be Dãniyɛll sak a 7 ne Ezayi sak a 9 wã sõnga maam tɩ m bãng tɩ Wẽnnaam goosneemã na n wa sooga ninsaalbã, tɩ pʋ-likã la zãmbã pa le zĩnd ye. M bãngame tɩ d na n wa vɩɩmda arzãn pʋgẽ tẽngã zugu. Mam da rat n taa Wẽnnaam yam, la m mikame tɩ m segd n tõoga m menga, n bas dorgã la rãamã yũubu, la m bas yoobã. Mam basa m pʋg-sadã, la m bas dorgã la rãamã. Mam sẽn da maneg n kɩs a Zeova sɩdã, mam pʋʋs-a lame n kos t’a sõng-m tɩ m tõog n toeem bũmb a taaba.

Bilf-bilfã, mam wa n bãngame tɩ bũmb ning m sẽn zãmsdã sɩd tõe n sõnga maam tɩ m toeeme. Biiblã wilgame tɩ d sã n modge, d tõe n yeelga “nin-paalgã.” (Kolos rãmbã 3:9, 10) Mam sẽn da modgd n toeemd bũmb kẽerã, m bãngame tɩ tõe tɩ b sẽn yeel tɩ m baaba toeemame wã yaa sɩda. M da pa le rat n yik m sũur bɩ n dok m sũur ne-a ye. Mam sẽn da baood bal yaa tɩ laafɩ zĩnd d sʋka. Mam kõo m baaba sugri, n pa le kis-a wa m sẽn da kis-a hal m yãadmẽ wã ye.

BIIBLÃ ZÃMSG SẼN NAF MAAM TO-TO

Mam sẽn wa n yaa bi-bɩɩgã, m da tũuda neb sẽn kɩt tɩ m da tar manesem-wẽnga. Biiblã sẽn yeel bũmb ningã yaa sɩda: Tũud-n-ta-wẽnsã kẽesa maam weoogo. (1 Korẽnt rãmbã 15:33) La a Zeova Kaset rãmbã sʋka, m paama zo-rãmb m sẽn tõe n teege. B sõnga maam tɩ m lebg nin-sõngo. Sẽn paase, yaa bãmb sʋk la mam paam pʋg-sõngo, t’a yʋʋr yaa a Loretta. Tõnd naagda taab n wilgd nebã Biiblã sẽn tõe n sõng-b to-to.

Ne Biiblã maasem, m baaba toeemame n lebg sɩd-sõngo, la kiris-ned sẽn yaa sik-m-meng soab n nong laafɩ. M da pa tẽed t’a tõe n lebga woto ye. Mam sẽn deeg lisgã yʋʋmd 1987 wã poore, maam ne m baaba wa n yãa taaba, t’a mobg maam. Ra yaa pipi la woto a sẽn mobg maam!

M baaba ne m ma naaga taab n sõng neb tɩ b bãng Biiblã sẽn yet beoog-daarã wɛɛngẽ. B maana woto sẽn yɩɩd yʋʋm 35. A ra lebga ned sẽn tar yẽesem, n yaa nimbãan-zoɛta, tɩ nebã fãa miẽ t’a sõngda a taabã. Yaa yʋʋm-kãens la mam sɩng n nong-a, la m waoogd-a. M da ratame tɩ nebã fãa bãng t’a yaa m baaba. A maana kaalem yʋʋmd 2016. Mam sã n tẽeg a yelle, nooma maam bala m miime tɩ maam ne yẽ fãa sẽn zãms Biiblã, d tõog n toeemame. M pa le tar sũ-kẽk baa bilf ye. Mam sũur nooma m sẽn paam n bãng Wẽnnaam a Zeova sẽn yaa m Ba sẽn be saasẽ wã. Yaa yẽ n pʋlem tɩ bũmb nins fãa sẽn wat ne sũ-sãams zagsã pʋsẽ wã na n wa saame wã.