Tõnd gɛɛlã beoog-daar yĩngã segd n tika bõe zugu?
1 Tõnd fãa tagsda bũmb ning d sẽn geend n na n maan beoog-daar yelle. Neb nins sẽn saagd n na n wa vɩɩmd tẽng zugã tagsda vɩɩm sẽn ka sɛt Wẽnnaam tɩrlem dũni paalgã pʋgẽ yelle. La yɛl n tõe n wa yiis saagr a woto tõnd sũyẽ wã. D segd n modga wʋsg sẽn na yɩl n ket n tikd d vɩɩmã Rĩungã yɛl zutu, n da bas tɩ yĩngã ratem wẽng wa kʋɩɩb-d ye.—1 Zã 2:15-17.
2 Dũniyã neb pʋd n ka tõe n wʋm tẽeb neb sũy tʋlsem võor ye. (1 Kor. 2:14) Neb a taabã maoodame n dat n paam yʋʋre, naam bɩ arzɛka. La tõnd maoodame n dat n paam arzɛk tẽebã wɛɛngẽ. (Mat. 6:19-21) Tõnd sã n mak n na n maneg d tagsgã t’a zems ne dũniyã neb tagsg beoog-daarã wɛɛngẽ, rẽ yĩnga d na n tõog n pidsa d bõn-datɩ wã bɩ? Pa na n kaoos la dũniyã yɛl soog tõnd sũyã ye. Wãn to la d tõe n gil rẽ?
3 “Bɩ y yeelg Zusoab a Zezi Kirist”: Tõnd sã n gũus n ges d goamã d bãngda d sã n tikda d beoog-daarã Rĩungã yɛl zutu. Tõnd gomda arzɛgs la dũniyã yɛl yell wakat fãa bɩ? Sã n yaa woto, d segd n tagsame n ges d sã n ka sɩng n yĩmd tẽebã yɛla. Tõeeme tɩ d sẽn segd n maan bũmb ning n yɩɩd yaa d ‘yeelg Zusoab a Zezi Kirist n da maan weer yĩnga ratem yĩng t’a ratma tõog-d ye.’—Rom 13:14.
4 Kom-bɩɩsã tõe n ‘yeelga Zusoabã,’ n deng n tags daar ning b sẽn dat n sɩng wakat fãa sõgeneg tʋʋmdã yelle. Bi-bɩɩg a yembr n da rat n lebg wakat fãa so-pakda. La b sẽn wub-a buud ning pʋgẽ wã neb ra minim n tagsdame tɩ bi-bɩɩg segd n maoome n wa lebg ligd soaba. Rẽ n so t’a fõr n kẽ afɛɛr dãmb pʋsẽ, hal t’a tigissã kẽnd la koe-moonegã wa lebg yɛl a sẽn maand a yʋʋr bala. A wa n sɩngame n talld bas-yard ne a Zezi goam nins sẽn be Matɩe 6:33 wã pʋsẽ. Rẽ tɛka a basa tʋʋm nins a sẽn da maand tɩ yaa yaams ne-a wã n lebg wakat fãa sõgne. Masã a ya a Zeova sõgen sẽn tar sũur kaset sẽn yaa sõma. Wala a sẽn yeelã, a ‘sõgenda a Zeova ne a pãngã fãa.’
5 Biiblã wilgame tɩ yaa yam tʋʋmd tɩ d reng n tags beoog-daar yelle. (Yel. 21:5) Bɩ d fãa maan woto ne Wẽnnaam daabã d yamẽ pipi.—Ef. 5:15-17.