D wilg tɩ d nanda Wẽnnaam doogã
1 Biiblã gʋlsg wakatẽ, a Zeova ra kõo a nin-buiidã noor tɩ b tigimd taab wakat fãa a roogẽ wã. (Maan. 23:2) Tigis-kãens ra sõngd-b lame tɩ b tẽegd Wẽnnaam goamã, n bʋgsd b zutu, n maand tũud-n-taar ne taaba, la b sõsd a Zeova Tõogã zugu. B ra pidsda b pʋ-tẽyã ne Wẽnnaam tagsa wã n paamd tẽeb bark wʋsgo. Segb kãens sɩd ra yaa sũ-noog wakate. Tigissã sõnga nebã tɩ b zĩnd lagem-n-taar pʋgẽ la b kogl balengã t’a pa yɩlemde. Rũndã-rũndã, tigiss nins me d sẽn maand Wẽnnaam doogẽ wã tara yõodo.
2 Wãn-wãn la d tõe n wilg tɩ d nanda d tigissã? B wilgame tɩ tigims kẽer pʋsẽ, tigissã watb sõor boogame. Wakat ninga, nina zu-loees tõe n kɩtame t’a pa tõog n kẽng tigisg ye. La rẽ yĩnga y basdame tɩ yel-bõoneg gɩdgd-y tɩ y pa kẽngd tigissã bɩ? Neb kẽer tõe n mi n yãka yam n pa yir b zug sẽn zabd bilf wall b sẽn sig tʋʋmã tɩ yaams tar-b yĩnga. Sãnda gesame tɩ yaa tɩlae ne-b tɩ b pa yir n deeg b roagdb sẽn pa kiris-neb sẽn wa n na n kaag-ba. Kẽer meng n vaal tigiss kẽngr sẽn na yɩl n ges filim b sẽn nong wʋsgo, bɩ ɛspoorã yɛl sẽn yit televiziõ n wã. Yel-kãensã wilgda vẽeneg tɩ neb wʋsg n pa tar tagsg ning a Koore kambã sẽn da wilg ne b sũur fãa yɩɩll pʋgẽ wã ye. B ra yɩɩla woto: “Zusoaba samand datem tara maam hal tɩ mam pãng rat n sɛ.”—Yɩɩl 84:3.
3 Baa ne d sẽn paamd tẽeb rɩɩb wʋsg-wʋsg tigissẽ wã, yaa toog ne kɛlgdb kẽer tɩ b kelg neere. Tõe tɩ b yamã wat n gõodame wall b tagsd daarã zu-loees yelle, pa rẽ bɩ b suusdẽ. Neb wʋsg yãame tɩ b sã n kelgdẽ la b gʋlsd tags-koeese, sõngd-b lame tɩ b kelgd neere. D sã n gʋlsd tags-koeese, bũmb ning d sẽn kelgdã paada d pʋ-tẽerẽ wã me. Sẽn paase, d sã n dengd n segend tigissã, sõngdame tɩ d wa tõog n dɩ b yõod tɩ pidi. D sã n segl sõma d na n tõog n kelgame n yɩɩg raasenkam.—Heb. 2:1.
4 Kambã la kãsemba fãa segd n deega zãmsgã d sẽn paamd tigissẽ wã. Roagdbã sã n kõt b kambã reem-teed wall sɛb tɩ b gʋnd tigissã wakat n deemdẽ n tagsdẽ tɩ rẽ la b na n zĩnd sɩɩ, kambã pa na n kelg sõma ye. Pa sõma tɩ d basd d kambã tɩ b reemdẽ, n gomda, n kʋmdẽ wall b maand yɛl a taab sẽn tiisd neb nins sẽn zĩ n kɛg tõndã ye. Naoor wʋsgo, kambã sã n miẽ tɩ b sã n na n tɩ yũ koom wall b tɩ rʋʋde, b roagd a ye na n yãag-b lame, b boogda b yuusgã.
5 Tara yõod tɩ d wat lɛɛre: Wakat ninga, yɛl kẽer d sẽn pa tõe n gil tõe n kɩtame tɩ d pa ta tigisgẽ wã lɛɛr ye. La d sã n minim n tat n mikdẽ tɩ sɩngr yɩɩllã ne pʋʋsgã zoe n saame, wilgdame tɩ d pa nand Wẽnnaam balengã tigiss wa sẽn segdã ye, la d leb n tiisda nebã. Ra yĩm-y tɩ naag d saam-biisã n yɩɩl la pʋʋsã yaa d balengã neng a yembr ye. Neb kẽer sẽn wae n pa wat lɛɛrã, naoor wʋsgo, mikame tɩ yaa b sẽn pa rengd n segl b mensã yĩnga. D sã n tat lɛɛre, d wilgdame tɩ d nanda tigissã, la tɩ d nong-b lame.
6 Daarã sẽn tar kolgrã, d segd n tigimda taab n yɩɩda. (Heb. 10:24, 25) Bɩ d wilg tɩ d nanda d tigissã, d sẽn na n kẽnd-b wakat fãa, n dengd n segend-ba, n kẽngd lɛɛre, n kelgd neer la d tũud bũmb ning d sẽn zãmsd be wã.