Nebã buud fãa na n paama fãagre
1. Wẽnnaam sẽn get tõnd to-to wã tika bõe zugu?
1 Wẽnnaam nimbãan-zoeerã paka fãagr sor n kõ ãdem-biisã. A Zeova ratame tɩ “neba fãa paam fãagre la b bãng sẽn yaa sɩda.” (1 Tɩm. 2:3, 4) Wẽnnaam sẽn get tõnd to-to wã pa tik tõnd buudu, d sẽn yaa ned ninga, d pãn-tõogo, bɩ tõnd yalẽ wã zug ye. A tika tõnd sẽn tẽed a Zezi maoongã sẽn yɩ rondã zugu. (Zã 3:16, 36) Tõnd fãa sẽn yaa tʋmd-n-taas Wẽnnaam tʋʋmdã pʋgẽ wã, d pa segd abada n tũus neb ye. Bala rẽ tõe n kɩtame tɩ d wa pa reeg neb Wẽnnaam sẽn sak n na n deeg ye.
2, 3. Bõe n tõe n sõng-d tɩ d ra ges nebã yalẽ n kao b buudo?
2 D ra kao nebã buud ye: A Zeova geta ninsaal sũuri, la a pa maand rẽ ne yam-wẽnga, wall a tũusd neb ye. (1 Sãm. 16:7) A leb n geta ned sẽn tõe n wa maan bũmb ninsã. Rẽ n so t’a get neb nins sẽn baood n na n ta a yamã wa bõn-neeba. (Azze 2:7) Rẽ yĩnga tõnd me geta nebã wa a Zeova sẽn get-b to-to wã bɩ?
3 Neb kẽer tõnd sẽn segd koe-moonegã wakat yalẽ tõe n kɩtame tɩ d zoet-b pẽnegre. Nina tõe n yera fu-kʋɩds bɩ fut sẽn nekd yoob tʋlsem wall a pa maneg a zugã, pa rẽ bɩ yaa rao sẽn ning tʋb-londo. Sãnda tõe n yaa neb sẽn pa tar zagse. Kẽer tõe n talla wẽnem ne-do. La d pa na n kao b bʋʋd n yeel tɩ b pa tol n tõe n wa yɩ a Zeova sõgen dãmb ye. D na n talla yam-sõng ne-ba, tɩ bala, “pĩnda tõnd me rag n yaa yalemb la kɩɩsdb sẽn bʋdge.” (Tɩt 3:3) D sẽn mi rẽ wã yĩnga, d na n sak n moona nebã fãa, baa neb nins sẽn wõnd b pa zems ne koɛɛgã.
4, 5. Bõe la a Zezi ne a Poll makrã zãmsd tõndo?
4 Pipi kiris-nebã makre: A Zezi Kirist da rɩkda sẽk n sõngd neb nins neb a taabã sẽn da get wa neb sẽn pa tõe n paam fãagrã. (Luk 8:26-39) Baa ne a Zezi sẽn da pa sakd tʋʋm-wẽnsã, a ra miime tɩ nebã ra tõe n wa bʋdg n maana wẽnga. (Luk 7:37, 38, 44-48) Woto yĩnga, a ra yaa wʋmda, la nebã “nimbãanegã yõka [yẽ,] tɩ bõe, bãmb wẽnda wa piis sẽn ka tar pe-kɩɩm ye.” (Mark 6:34) Rẽ yĩnga tõnd tõe n tũu a Zezi mak-sõngã neer n paas bɩ?
5 B ra loba tʋm-tʋmd a Poll ne kuga, n pã-ba, la b pag-a bi-bees roogẽ. (Tʋʋ. 14:19; 16:22, 23) Rẽ yĩnga zu-loe-kãensã sãama a Poll sũur tɩ kɩt t’a wa baas n tags t’a ra sãamda a sẽkã tẽns la buud kẽer neb sʋk bɩ? Abada! A ra miime tɩ buud fãa neb sʋka, a tõe n yãa pʋ-peelem dãmba, t’a ra maood ne a sũur fãa n baood-ba. Rẽ yĩnga tõnd me geta d moonegã zĩig neb sẽn yaa buud toɛy-toɛy la b tar minimd toɛy-toɛyã woto bɩ?
6. Wãn to la tõnd manesmã tõe n sõng nin-paalsã tigingã tigissẽ?
6 Neb a taabã reegr rũndã-rũndã: Neb wʋsg Wẽnnaam nin-buiidã sʋk sũy yaa noogo, saam-biis la saam-bi-pogs sẽn da reeg-b tigingã pʋgẽ n pa ges b yalẽ wã sẽn yaa to-to wã yĩnga. Alemayn, rao sẽn tar zoob-wogdo, n pa maneg a toɛɛngã, la sẽn yeelg fu-rẽgdo, n wa Rĩung Roogẽ. Ra yaa ned yʋʋr sẽn sãam zĩig fãa. Baasgo, b reeg-a-la sõma tigisgẽ wã. Raoã sũur yɩɩ noog hal tɩ kɩt t’a le wa tigisgã semen ning sẽn pʋglã. Sẽn pa yã n kaoose, a manega a mengã, n bas sɩgaarã yũub la a kẽ kãadem ne a sẽn da vɩ ne pʋgsad ningã tɩ zems ne laloa wã. Pa kaoos la bãmb ne b kambã fãa lebg a Zeova sõgen dãmb ye.
7. Wãn to la d tõe n dɩk Wẽnnaam sẽn pa tũusd nebã togs-n-taare?
7 Bɩ d rɩk tõnd Wẽnnaamã sẽn pa tũusd nebã togs-n-taar n bool nebã fãa tɩ b wa rɩ Wẽnnaam nimbãan-zoeerã nafa.
[Goam sẽn tar pãngã]
“Wẽnnaam ka tũusd neb ye. La buud fãa sʋka, ned ninga sẽn zoet bãmba la sẽn maand tɩrga, yẽ soab tata bãmb yam.”—Tʋʋ. 10:34, 35.