Nonglem kɩtdame tɩ d koe-moonegã womd biisi
1 “Bɩ y wa mam nengẽ, . . . la mam na kõ yãmb vʋʋsgo.” (Mat. 11:28) A Zezi gom-kãensã sẽn tar yamleoogã wilgda a sẽn da nong nebã wʋsg to-to. Tõnd sẽn yaa koe-moondbã yĩnga, d rat n dɩka a Zezi togs-n-tar n wilg tɩ d nonga neb nins sũy sẽn sãamã, nonglem sẽn pa ye be dũniyã zugã yĩngã. Wãn to la d tõe n wilg tɩ d nonga nebã koe-moonegã sasa?
2 Ne d goamã: A Zezi sẽn da nong nebã yĩng kɩtame t’a ra maand a sẽn tõe fãa n na n moon koe-noogã. (Zã 4:7-14) D sã n nong nebã, na n sõng-d lame tɩ d sẽn wa n tɩ be zĩig ning fãa bɩ d tõog n moon koɛɛgã n da yɛɛs ye. Bi-pugl sẽn tar yʋʋm a yoob n moon pag a ye sẽn da zĩ n yɛg-a logtor yir n gũud tɩbsgo. Bõe n kɩt t’a kõ kasetã? A yeela woto: “Wõnda paga ra rat n bãnga a Zeova.”
3 D sã n laad ne nebã la d gomd ne-b tɩ tar yamleoogo, d wilgdame tɩ b yell pak-d lame. D sã n kelgd nebã sõma n bãngd bũmb nins sẽn pak-bã, la d wilgd tɩ b yell sɩd pak-d lame, yaa kaset me sẽn wilgd tɩ d nong-b lame. (Yel. 15:23) D sẽn dɩkd a Zezi togs-n-taarã yĩnga, d segd n goma bõn-sõma nins Rĩungã sẽn na n wa maanã yelle, la d gom a Zeova sẽn nong nebã to-to wã me yell n yɩɩda.—Mat. 24:14; Luk 4:18.
4 Ne d tʋʋmã: A Zezi ra yɩta tao-tao n sõngd neb nins sẽn dat sõngrã. (Mat. 15:32) Koe-moonegã sasa, tõnd me tõe n wa paama zu-noog n tʋm n sõng nebã n wilg tɩ d nong-b lame. Saam-bi-poak n da get pag a ye sẽn gomd ne ned telefõnnẽ n yaool n pa wʋmd a soabã goam võor ye. D saam-bi-poakã kẽnga ne yamleoog n tɩ lebg goamã tɩ pagã wʋm a võore. A sẽn sõng-a ne nonglmã kɩtame tɩ b tõog n sõss ne taab Biiblã zugu, tɩ pagã meng sak Biibl zãmsgo. Saam-biig a ye me n da lebg n na n tɩ ges ned n tɩ mik a soabã sẽn dat n kẽes goeen-bedr roog pʋgẽ n pa tõe ye. Saam-biigã sẽn sõng raoã n kẽes goeelã, a pẽga wʋsgo, tɩ b kell n zĩnd goeelã zug n sɩng Biibl zãmsgo.
5 D sã n kẽesd d mens koe-noogã mooneg pʋgẽ, d wilgdame tɩ d nonga a Zeova la neb a taabã. (Mat. 22:36-40) D sẽn wilgd ne d goamã la ne d tʋʋmã tɩ d nonga nebã yĩnga, kɩtdame tɩ pʋ-peelem dãmbã bãng tɩ d bee sɩdã pʋgẽ.