“Bɩ y kɩt tɩ yãmb goamã . . . paam yamsem noom”
1. B sẽn yeel tɩ d kɩt tɩ d goamã ‘paam yamsem noomã’ rat n yeelame tɩ bõe?
1 “Bɩ y kɩt tɩ yãmb goamã zĩnd bark wakat fãa n paam yamsem noom, la y bãng sẽn zemse, n leok ned kam fãa.” (Kol. 4:6) B sẽn yeel tɩ d kɩt tɩ d goamã paam yamsem noomã rat n yeelame tɩ d segd n gomda goam sẽn pa yikd sũuri, la d goamã yɩ d kɛlgdbã noogo. Rẽ maaneg tara yõod wʋsg koɛɛgã mooneg sasa.
2. Bõe la a Zezi maan n tõog n moon Samari pagã?
2 A Zezi mak-sõngã: A Zezi sẽn wa n zĩ bulg a ye noor n vʋʋsdẽ wã, a goma ne Samari pag a ye sẽn wa n na n yãk koom. B sẽn wa n sõsdã, pagã goma beem ning sẽn da sɩng n be Samari nebã ne Zʋɩf rãmbã sʋkã yell naoor wʋsgo. Baa ne Zʋɩf rãmbã sẽn da tẽed ne b sũy fãa tɩ Samari nebã yaa sãamba, pagã wilgame t’a tẽedame tɩ Samari nebã yaa a Zakoob yagense. La a Zezi pa bao n na n kɩɩs-a bɩ n wẽ no-koɛɛm ye. A kell n sõssa ne-a sõma. A sẽn maan woto wã kɩtame t’a tõog n moon koɛɛgã tɩ naf pagã, la Samari tẽngã nebã.—Zã 4:5-15, 39.
3. D sã n wa moond koɛɛgã, wãn to la d tõe n tũ a Zezi mak-sõngã?
3 D sã n wa moond koɛɛgã, d segd n ninga d yamẽ tɩ yaa “laafɩ koɛɛg” la d moonda. (Rom 10:15) Yaa Biiblã koɛɛg sẽn kengd raood la tar yamleoogã la d rat n togs nebã, la pa segd n yɩ wa d rat n wẽe no-koɛɛm ne-b bɩ n kɩɩs b sẽn tẽed bũmb ningã ye. Ned sã n togs a tagsg tɩ yaa kɛgre, d pa segd n yɩ tao-tao n kɩɩs-a ye. D segd n kelga a sẽn yetã neer n yãk gomd a sẽn togs tɩ pa wẽng n tik rẽ n pẽg-a. D leb n tõe n karma verse Biiblã pʋgẽ la d sok-a woto: “Yãmb tagsdame tɩ gom-kãensã yaa sɩd bɩ?”
4. D kɛlgdã sã n yaa zab-baooda d segd n maana bõe?
4 D kɛlgdã sã n yaa zab-baooda, bɩ sã n yaa vẽeneg t’a rat n wẽe no-koeemde, d segd n maana bõe? D segd n kell n yɩɩ sũ-bʋgsem soaba, d goamã la d manesmã pʋsẽ. (2 Tɩm. 2:24, 25) A soabã sũur sã n yik ne tõnd hal n pa rat n kelg Rĩungã koɛɛgã, a tɩɩmã yaa d bõos-a sugr la d looge.—Mat. 7:6; 10:11-14.
5. Saam-bi-poakã sẽn leok ne gom-noodã baasa wãna?
5 Saam-bi-poak a ye mak-sõngo: Saam-bi-poak a ye makame n na n moon a yak koɛɛgã, la a yakã sũur yikame hal t’a sɩng tʋya. Saam-bi-poakã sika a sũur n yeel-a woto: “Gaafar tɩ m da pa mi tɩ na n yɩɩ woto ye. Wẽnd na kõ-d nindaare.” Semen a yiib loogr poore, pagã tɩ kogsa saam-bi-poakã kʋɩleng n bõos-a sugr n yeel-a t’a togs koɛɛg ning a sẽn da rat n togs baraarã t’a na n kelgame masã. Ad d sã n leokd ne gom-noodo sɩd womda biisi!—Yel. 15:1; 25:15.
6. D sã n moond koɛɛgã, bõe yĩng tɩ d segd n gomd gom-noodo?
6 D sã n moond koe-noogã bɩ d modg n gomd gom-nood wakat fãa, baa nebã sã n pa rat n kelge. D sã n maand woto, b tõe n sak n kelga d saam-biis a taabã nindaare.