Siglgã taoor lʋɩtb Sull lɛtre
Saam-biisi,
Tʋm-tʋmd a Poll ra wae n tũnugda ne sor a sẽn paam fãa n wilgd a tẽed-n-taasã t’a nand-b lame la t’a nong-b lame. A gʋlsa Rom kiris-nebã woto: “A Zezi Kirist maasem yĩnga mam pʋʋsda m Wẽnnaam bark yãmb fãa yĩnga, b sẽn gomd yãmb tẽeb yell dũniyã tɛk fãa wã yĩnga.” (Rom 1:8) N-ye, Rom soolmã fãa pʋgẽ, nebã ra mii pipi kiris-nin-kãensã b sẽn da tar tẽeb sẽn yaa kãn-kãe, la b sẽn da moond koɛɛgã ne yẽesmã yĩnga. (1 Tes. 1:8) Dẽnd pa lingr la a Poll sẽn nong a saam-biisã wʋsgã ye!
Wala a Polle, tõnd me sã n tags yãmb yell fãa, d pʋʋsda a Zeova bark wʋsgo. D nonga yãmb fãa wʋsgo! La yãmb ned kam fãa miime t’a Zeova nong-y lame. B kɩɩsda yãmb kẽer y tẽebã yĩnga, la y ket n modgd n moonda koɛɛgã. Yãmb raoodã sɩd noogda a Zeova sũur hal wʋsgo!—Yel. 27:11.
Karm-y a Zeova Kaset rãmbã rũndã-rũndã kibay sẽn be Annuaire—2008 sẽn tar yamleoog la kengd tẽebã. Y sã n karem, y na n bãngame tɩ Zusoab a Zezi Kirist kẽngda taoore, “la a tara tõogre,” la tɩ zab-teed nins fãa neb sẽn maand n na n zab ne Kirist karen-biisã pa na n tõog ye.—Wil. 6:2; Ezai 54:17.
A Poll gʋlsa kiris-neb nins sẽn be Filipã n yeel-b woto: “Mam pʋʋsda m Wẽnnaam barka . . . bũmb nins yãmb sẽn maan Koe-noogã yĩngã.” (Fil. 1:3-5) Tõnd sẽn yaa Siglgã taoor lʋɩtb Sullã nebã pʋʋsda Wẽnnaam bark yãmb yĩng wala a Polle. Yʋʋmd 2007 wã pʋgẽ, sẽn ta koe-moondb 6691790 n dɩk sẽn ta lɛɛr 1431761554 n moon tẽns 236 pʋsẽ dũniyã gill zugu. Ad sɩd yaa modgr wʋsg la y sẽn maand n moond koe-noogã zĩig fãa wã! Mams-y n ges neb tus ka tɛk nins d sẽn lagem taab n sõng tɩ b wʋm koɛɛgã. Woto sɩd waoogda a Zeova!
Sasa a to, a Poll wilgame t’a kʋmda a tẽed-n-taasã nimbãanega. A gʋlsa kiris-neb nins sẽn be Tesalonikã woto: “Wakat fãa tõnd Ba a Wẽnnaam taoore, tõnd tẽegda yãmb . . . sẽn maand sũ-mar n gũud tẽeb pidsg sẽn be tõnd Zusoab a Zezi Kirist nengẽ wã.” (1 Tes. 1:2, 3) N-ye, vɩɩmã pida ne zu-loeese, la d segd n modgame n tõog toogo. Zu-loe-bʋs la yãmb segda? Bãag n kɩt tɩ y pa tõe n ye tʋm a Zeova tʋʋmdã wʋsg tɩ sãamd y sũur bɩ? Yãmb pag bɩ y sɩd n maan kaalem bɩ? (Yel. 30:15, 16) Yãmb baooda ned sẽn nong a Zeova wala yãmb n dat n kẽ kãadem n yaool n pa tõe n paame, y sẽn tũud noor ning sẽn yeel tɩ y segd n kẽe kãadem ne ned sẽn tũud Zusoabã balã bɩ? (1 Kor. 7:39) Y maoodame n na n wub y kambã tɩ ligdã yell yaa toog ne-y bɩ? Yãmb zu-loeesã sẽn yaa a soab fãa, y sã n deng n bao Wẽnnaam Rĩungã, bɩ y tall bas-yard t’a Zeova “kõn yĩm yãmb tʋʋmdã ne y nonglmã yãmb sẽn wilg bãmb yʋʋrã yĩnga” ye. Saam-biisi, d bõosd-y lame tɩ y ra “yɛ ne tʋʋm-sõma maaneg ye.”—Heb. 6:10; Gal. 6:9.
Bõe n na n sõng-y tɩ y tõog toogo? Wala Tesalonik kiris-nebã, yaa y sẽn na n gũud y “tẽeb pidsg sẽn be tõnd Zusoab a Zezi Kirist nengẽ wã.” Bala kaoosg poore, a Poll maka ‘fãagrã tẽeb’ ne kut pugl sẽn tõe n kogl kiris-ned ne tags-kɛg la ne sãmbse.—1 Tes. 5:8.
Sɩd-sɩda, y sã n tõog toog ne sũ-noogo, y wilgdame t’a Sʋɩtãan sẽn kɩɩs t’a Zeova pa segd n yɩ yĩngr la tẽng Naabã yaa ziri. A yeelame tɩ neb nins sẽn tũud Wẽnnaamã tũud-a-la b mens nafr yĩnga, la tɩ zu-loeesã sã n paasdẽ, wall dũni kãngã sã n kaoosdẽ n yɩɩd b sẽn tagsdã b na n basa Wẽnnaam tũubu. Yãmb tara zu-noog n na n wilg vẽeneg t’a Sʋɩtãan yaa pʋ-yagda. Beoog sẽn vẽeg fãa, y kolgda wakat ning y sẽn na n paam tɩ y tẽebã pidsã n paasdẽ.
Wala a Poll sẽn da n tũnugd ne sor a sẽn paam fãa n pẽgd a saam-biisã b tẽebã sẽn yaa kan-kãe wã, b sẽn da modg n moond koɛɛgã la b tõogd toogã yĩngã, tõnd me sũy noomame tɩ d rat n pẽg-yã, la d wilg-y tɩ d nong-y-la wʋsgo. Ket-y n modgd-y ne y tʋʋm-neerã!
D kota Wẽnnaam t’a ning y bark wʋsg rõandã yʋʋmdã.
Yãmb saam-biisã,
Siglgã taoor lʋɩtb Sulli