‘Pa-y Wẽnnaam nonglmã pʋgẽ’
1. Bõe yĩng tɩ b yiis “ Gardez-vous dans l’amour de Dieu ” sebrã?
1 D sũy nooma wʋsgo, d sẽn na zãms seb-paal ning gom-zug sẽn yaa “ Gardez-vous dans l’amour de Dieu ” wã, d Tigingã Biiblã zãmsg sasa wã. D na n sɩnga seb-kãng zãmsg wao-fugdg kiuugã rasem 23 semennã pʋgẽ. Siglgã taoor lʋɩtb sull gʋlsa lɛtr neb nins fãa sẽn nong a Zeova wã yĩng seb-kãng pʋgẽ. B baasg goma yɩɩ woto: “D saagdame tɩ seb-kãngã na n sõng-y lame tɩ y kell n maand sẽn tat Wẽnnaam yam, la y pa ‘Wẽnnaam nonglmã pʋgẽ, n gũud vɩɩm sẽn ka sɛta’.—Ziid 21.”
2. Seb-kãngã na n sõnga tõnd zĩ-bʋs wɛɛngẽ?
2 A sẽn tõe n sõng tõnd zĩis ninsã: Bõe la Biiblã yet tũud–n-taarã, reemã, taoor dãmbã sakre, tõnd sẽn minim n maand bũmb ninsã, kãadmã, d no-goamã la rog-m-migsã wɛɛngẽ? Noy nins Biiblã sẽn kõt tɩrlmã wɛɛngẽ wã tũub na n sõng-d lame tɩ d tall sũur-kaset sẽn yaa sõma. (Yɩɩl 19:8, 9) D sã n get yɛlã wa a Zeova sẽn get-b to-to wã, d na n dat n ta a yam ne d sũy fãa, tɩ rẽ kɩt tɩ d sakd-a d vɩɩma nens fãa pʋsẽ.—Yel. 27:11; 1 Zã 5:3.
3. Bõe yĩng tɩ d segd n modgdẽ n kẽesd d mens zãmsgã pʋgẽ semen fãa?
3 D modg n kẽes d mens zãmsgã pʋgẽ: D sã n wa segend zãmsgã, bɩ d ning d yamẽ tɩ d rat n pẽg a Zeova a tigingã neb sʋka. (Heb. 13:15) Tigingã neb fãa na n naagda taab n zãmsd seb-kãngã. (Heb. 10:24) Sẽn mik tɩ yaa sull a wãn bal la d na n zãmsd semen fãa wã yĩngã, d na n tõog n segenda sõma. Woto na n sõng-d lame tɩ d kõt leoor n da zoe rabeem ye. D sã n segend zãmsgã sõma la d leokd koɛɛg-koɛɛga, na n kenga saam-biisã raood tɩ b nong taab la b tʋmd tʋʋm sõma buud fãa. Sẽn paase, zãmsgã na n talla yamleoog ne nebã fãa, la kɩt tɩ b paam bãngr n paase. Tõnd ned kam fãa sã n kõt leoore, d sũ-noogã na n paasdame.
4. Bõe yĩng tɩ yaa tɩlae tɩ d tũud a Zeova noyã?
4 Yʋng ning sẽn deng t’a Zezi ki wã, a wilgame tɩ sẽn na yɩl n pa Wẽnnaam nonglmã pʋgẽ, yaa tɩlae tɩ d tũ a Zeova noyã. (Zã 15:10) “ L’amour de Dieu ” sebrã na n sõnga tõnd tɩ d modgd n tũud Biiblã sẽn yet bũmb ninsã sõma n yɩɩd raasenkamã, la d ‘pa Wẽnnaam nonglmã pʋgẽ.’—Ziid 21.