SEB-​KÃNGÃ togsda kibay sẽn yaa sɩda. Kibayã yita Biiblã sẽn yaa sebr ning sẽn tar yõod n yɩɩd sɛb a taabã fãa wã pʋgẽ. Kibayã gomda Wẽnnaam sẽn wa n na n naan dũniyã yelle, la bũmb ning sẽn zĩnd rẽ tɛk n tãag tõnd wakatã me yelle. B leb n wilgda Wẽnnaam sẽn kãab t’a na n maana bũmb nins ka la bilfã menga.

Seb-​kãngã na n sõng-⁠y lame tɩ y bãng bũmb ning sẽn be Biiblã pʋgẽ. A gomda neb nins yell b sẽn gomd Biiblã pʋgẽ wã yelle, la b sẽn maan bũmb ninsã me yelle. A leb n wilgdame tɩ Wẽnnaam kãabame tɩ tẽngã na n wa lebga arzãna, tɩ nebã vɩɩmd a pʋgẽ wakat sẽn kõn sa.

Yaa kibay 116 n be sebrã pʋgẽ. B welga kibayã zĩis a nii. Babg fãa sɩngrẽ, b wilga b sẽn na n gom bũmb ning yellã koɛɛg-​koɛɛga. Kibayã sẽn pʋgd taab to-⁠to sebrã pʋgẽ wã kell n zemsa ne sẽn sɩd yɩ to-⁠to wã. Woto na n sõng-⁠y lame tɩ y bãng kibar fãa sẽn zĩnd sasa ningã.

B togsa kibayã ne goam võor wʋmb sẽn yaa nana. Kamb wʋsg meng na n tõog n karm-⁠b-⁠la b toore. Roagdbã na n yãame tɩ kom-​kɩdsã na n nonga kibayã n dat tɩ b karemd naoor wʋsg tɩ b kelgdẽ. Sebrã kareng na n talla yamleoog ne kambã la kãsembã me.

Kibar fãa baasgẽ, b ninga verse rãmb sẽn wilgd kibarã sẽn yit zĩig ning Biiblã pʋgẽ. Yɩta sõma tɩ y karem-ba.

Yaa ãnd n naan saasã la tẽngã? Ãnd n naan wĩntoogã, kiuugã, ãdsã la bũmb nins fãa sẽn be tẽngã zugã? Biiblã yetame tɩ yaa Wẽnnaam. La a sẽn yetã sɩd yaa sɩda. Seb-​kãngã pʋgẽ, b na n deng n goma Wẽnnaam sẽn sɩng bũmba fãa naanegã yelle.

Wẽnnaam naana malɛgsã pipi. B bee ne yẽ saasẽ. A naana tẽngã n kõ ninsaalbã. A naana pag ne raoa n ning-​b zĩig sẽn yaa neer wʋsg pʋgẽ. Raoã yʋʋr la a Ãdem tɩ pagã yʋʋr yaa a Hawa. La a Ãdem ne a Hawa kɩɩsa Wẽnnaam noor tɩ Wẽnnaam yeel-⁠b tɩ b na n kiime.

A Ãdem naanegã tɛk n tãag sa-​kãsengã niib yaa yʋʋm tusr la kobs yoobe la pis-⁠nu la a yoobe. Yʋʋm-​kãensa fãa pʋgẽ, nin-​wẽns wʋsg n zĩndi. Saasẽ wã, yaa a Sʋɩtãan ne a malɛg-​wẽnsã n da be be. Tẽngã zugu, nin-​wẽns me n da be. Wala makre, a Kayẽ ra yaa nin-​wẽnga, nin-​wobd sẽn da tar pãng wʋsg me n da be n yaa nin-​wẽnse. La nin-​sõma me n da be tẽngã zugu. Wala makre, a Abɛll, a Enok la a Nowe. Pipi babgã pʋgẽ, d na n goma nin-​kãensã fãa yelle.

YAA Wẽnnaam n naan bũmb fãa. A naana wĩntoogã sẽn na yɩl tɩ d paam vẽenem yibeoog n tɩ tãag zaabre. A naana kiuugã la ãdsã sẽn na yɩl tɩ d paam vẽenem yʋngo. A leb n naana tẽngã me n kõ tõndo.

La Wẽnnaam pa reng n naan wĩntoogã, kiuugã, ãdsã la tẽngã ye. Yãmb mii a sẽn deng n naan-⁠b rãmb pipi bɩ? A reng n naana malɛgsã. Tõnd pa tõe n yã malɛgsã ye. D pa tõe n yã Wẽnnaam me ye. B fãa bee saasẽ.

Malɛk ning Wẽnnaam sẽn deng n naan pipi wã yɩɩda malɛgs a taabã fãa ne ziiri. Yaa yẽ la b sẽn boond tɩ Wẽnnaam pipi biigã. A sõnga a ba wã n naan bũmb a taabã fãa. A sõng-⁠a lame n naan wĩntoogã, kiuugã, ãdsã la tẽngã.

La tẽngã ra yaa wãn-​wãn sɩngrẽ wã? Sɩngrẽ wã, ned baa a ye ra ka tõe n vɩɩmd tẽngã zug ye. Zĩigã fãa ra pida ne koom. La Wẽnnaam da ratame tɩ neb vɩɩmd tẽngã zugu. Rẽ n so t’a maneg tẽngã. Yaa bõe la a maan-​yã?

Vẽenem da ka be tẽngã zug ye. Rẽ n so tɩ Wẽnnaam kɩt tɩ wĩntoogã vẽenem na n yãgd tẽngã zugu. A leb n kɩtame tɩ wĩndg la yʋng beẽ. Rẽ poore, koomã sẽn da pid tẽngã zugã yĩnga, Wẽnnaam kɩtame tɩ koomã welg taab tɩ tẽn-​gãongã puki.

La baa fʋɩ ra ket n pa be tẽn-​gãongã zug ye. Tẽngã ra wõnda yãmb sẽn ne bũmb ning fotã zugã. Tɩɩs la rũms ra ka be ye. Zĩm meng ra ka be koomã pʋgẽ ye. Bũmb wʋsg la Wẽnnaam na n maan n paase, sẽn na yɩl tɩ tẽngã yɩ neer tɩ ninsaalbã la rũmsã tõog n vɩɩmde.