GES-⁠Y tẽngã sẽn lebg to-⁠to masã! Bũmba fãa ka neer sɩda? Ges-⁠y moodã, tɩɩsã la rũmsã. Yãmb nee wobdã la bõn-​yẽesã bɩ?

Zĩ-kãngã maana wãn n lebg neer woto? D ges Wẽnnaam sẽn maneg tẽngã to-⁠to.

Wẽnnaam deng n kɩtame tɩ mood yi n pid tẽngã. A leb n maana tɩɩs buud toor-toore. Tɩɩsã ne moodã kɩtame tɩ tẽngã lebg neere. A kɩtame tɩ tɩɩs wʋsg womd biisi, tɩ f sã n dɩtẽ bɩ yaa noogo.

Rẽ poore, Wẽnnaam naana zĩmã n kɩt tɩ bãmb be koomẽ wã, la a naan liuuli wã me tɩ b yɩgda. A naana rũm-​bõones la rũm-​bɛda. A naana baase, yũusi, la wed-​moose. Sõdg-⁠y rũms nins yãmb sẽn mi wã tɩ d gese. Wẽnnaam sẽn maan bõn-​kãensa fãa n kõ tõndã ka sõma sɩda?

Wẽnnaam yãka zĩig a ye n maneg tɩ yaa sõma hal wʋsgo. A boola zĩ-kãng tɩ Edɛn. Bũmba fãa ra yaa neere. Wẽnnaam da ratame tɩ tẽngã gill fãa lebg neer wa zĩ-kãngã sẽn yaa to-⁠to wã.

La Wẽnnaam gesame tɩ bũmba fãa yaa neere, la bũmb n paooge. Yãmb we n ges fotã yɛsa. Yaa bõe n be tẽngã zug n yaool n ka be ka? Bɩ d naag taab n ges bũmb ning Wẽnnaam sẽn na n naan n paase.

BÕE n be foto kãngã zug n pa wõnd rũmsã? Yaa neb a yiibã. Bãmb la pipi raoã la pipi pagã. Yaa ãnd n naan-​ba? Yaa Wẽnnaam. Yãmb mii Wẽnnaam yʋʋr bɩ? A yʋʋr la a Zeova. Raoã yʋʋr la a Ãdem, tɩ pagã yʋʋr yaa a Hawa.

Wẽnnaam a Zeova sẽn wa n na n naan a Ãdmã, a yãka tom n maan a yĩngã tɩ yaa sõma. Rẽ poore, a fʋʋsa a Ãdem yõ-bogdẽ wã, n kõ-a vɩɩm.

Wẽnnaam a Zeova kõo a Ãdem tʋʋmde. A yeel-⁠a lame t’a pʋd rũmsã fãa yʋya. Tõeeme t’a Ãdem reng n maaga a meng n ges rũmsã fãa sẽn yaa to-⁠to, n yaool n pʋd rũng fãa yʋʋre. La a Ãdem sẽn wa n pʋt rũmsã yʋyã, a mikame tɩ bũmb la b tara, tɩ yẽ pa tarẽ ye. Yãmb mii sẽn yaa bũmb ning bɩ?

A mikame tɩ rũmsã fãa yaa raad la yãanse. Wob-​raad la wob-​yãans rabeeme, tɩ bõn-​yẽ-raad la bõn-​yẽ-yãans me beẽ. La a Ãdem yẽ ra yaa a yembre. Rẽ n so t’a Zeova kɩt t’a Ãdem gũsi, t’a yãk a sĩif kõbr n naan pag n kõ-a.

Ad a Ãdem sũurã segd n yɩɩ noog koe! A Hawa me sũurã ra segd n yaa noogo, a sẽn be zĩ-neerã pʋgẽ wã. Masã, b ra tõe n doga kamba, la b vɩɩmd ne sũ-noogo.

A Zeova ra ratame t’a Ãdem ne a Hawa vɩɩmd wakat fãa. A ra ratame tɩ b maneg tẽngã fãa t’a yɩ neer wa Edɛn. Ad woto fãa sɩd kɩtame t’a Ãdem ne a Hawa sũur ra yaa noog wʋsgo. Yãmb me sã n da paam n na n maneg tẽngã t’a yɩ neere, y ratame bɩ? La a Ãdem ne a Hawa sũ-noogã pa kaoos ye. D ges bũmb ning sẽn maane.