BÕE n be foto kãngã zug n pa wõnd rũmsã? Yaa neb a yiibã. Bãmb la pipi raoã la pipi pagã. Yaa ãnd n naan-​ba? Yaa Wẽnnaam. Yãmb mii Wẽnnaam yʋʋr bɩ? A yʋʋr la a Zeova. Raoã yʋʋr la a Ãdem, tɩ pagã yʋʋr yaa a Hawa.

Wẽnnaam a Zeova sẽn wa n na n naan a Ãdmã, a yãka tom n maan a yĩngã tɩ yaa sõma. Rẽ poore, a fʋʋsa a Ãdem yõ-bogdẽ wã, n kõ-a vɩɩm.

Wẽnnaam a Zeova kõo a Ãdem tʋʋmde. A yeel-⁠a lame t’a pʋd rũmsã fãa yʋya. Tõeeme t’a Ãdem reng n maaga a meng n ges rũmsã fãa sẽn yaa to-⁠to, n yaool n pʋd rũng fãa yʋʋre. La a Ãdem sẽn wa n pʋt rũmsã yʋyã, a mikame tɩ bũmb la b tara, tɩ yẽ pa tarẽ ye. Yãmb mii sẽn yaa bũmb ning bɩ?

A mikame tɩ rũmsã fãa yaa raad la yãanse. Wob-​raad la wob-​yãans rabeeme, tɩ bõn-​yẽ-raad la bõn-​yẽ-yãans me beẽ. La a Ãdem yẽ ra yaa a yembre. Rẽ n so t’a Zeova kɩt t’a Ãdem gũsi, t’a yãk a sĩif kõbr n naan pag n kõ-a.

Ad a Ãdem sũurã segd n yɩɩ noog koe! A Hawa me sũurã ra segd n yaa noogo, a sẽn be zĩ-neerã pʋgẽ wã. Masã, b ra tõe n doga kamba, la b vɩɩmd ne sũ-noogo.

A Zeova ra ratame t’a Ãdem ne a Hawa vɩɩmd wakat fãa. A ra ratame tɩ b maneg tẽngã fãa t’a yɩ neer wa Edɛn. Ad woto fãa sɩd kɩtame t’a Ãdem ne a Hawa sũur ra yaa noog wʋsgo. Yãmb me sã n da paam n na n maneg tẽngã t’a yɩ neere, y ratame bɩ? La a Ãdem ne a Hawa sũ-noogã pa kaoos ye. D ges bũmb ning sẽn maane.

GES-⁠Y bũmb ning sẽn paam a Ãdem ne a Hawa masã. B rig-⁠b lame n yiis zĩ-neerẽ wã. Yãmb mii sẽn yaa bũmb ning yĩng bɩ?

B maana bũmb sẽn yaa wẽng wʋsgo, t’a Zeova sɩbg-⁠ba. Yãmb mii a Ãdem ne a Hawa sẽn maan bũmb ning bɩ?

Wẽnnaam yeel-⁠b lame tɩ b ra maan bũmb tɩ b kɩɩs n maane. A yeel-⁠b lame tɩ b tõe n dɩɩ tɩɩsã biisi. La tɩɩg a ye bɩɩs la Wẽnnaam yeel-⁠b tɩ b ra rɩ, tɩ b sã n kɩɩs n dɩ, b na n kiime. Tɩɩgã ra yaa Wẽnnaam n so. Tõnd miime tɩ d pa segd n dɩk bũmb d sẽn pa so ye. Ka sɩda? La bõe la a Ãdem ne a Hawa maan-​yã?

Raar a yembre, a Hawa sẽn wa n yaa a yembre, waaf n gom ne-⁠a. A yeela a Hawa t’a rɩ tɩɩg ning biis Wẽnnaam sẽn yeel-⁠b tɩ b ra rɩ wã. Yãmb we n ges koe, waaf sẽn gomde! A Zeova yaool n pa naan wiisã tɩ b tõe n gom ye. Dẽnd yaa ned a to n kɩt tɩ waafã gom ne a Hawa. Yaa ãnda?

Ra pa a Ãdem ye. Rẽnd yaa malɛka. Yãmb ket n tẽra malɛgsã yell bɩ? Wẽnnaam naana malɛgsã n yaool n naan tẽngã. Tõnd pa tõe n yã-b ye. Malɛk ning sẽn kɩt tɩ waafã gomã lebga wilg-⁠m-​meng soaba. A tagsame tɩ yẽ me segd n yɩɩ naab wa Wẽnnaam. A ra ratame tɩ nebã bas a Zeova raaba maanego, n tũ yẽ raabã.

Malɛg-​kãng tõog n belga a Hawa. A yeel-⁠a lame t’a sã n dɩ tɩɩgã bila, a na n lebga wa Wẽnnaam. A Hawa tẽe a goamã. Yẽ ne a Ãdem fãa kɩɩsa Wẽnnaam n dɩ tɩɩgã bila. Yaa rẽ n so tɩ b rig-⁠b n yiis zĩ-neerẽ wã.

La daar n wat tɩ Wẽnnaam na n kɩt tɩ tẽngã fãa lebg neer wa Edɛn. Taoore, y na n bãnga yãmb me sẽn tõe n maan to-⁠to n wa paam n naag n maneg tẽngã t’a yɩ neere. La nananda, bɩ d ges bũmb ning sẽn paam a Ãdem ne a Hawa.