A ÃDEM ne a Hawa sẽn yi Edɛnnã poore, b vɩɩmã lebga toog wʋsgo. Masã, b segd n tʋma wʋsg n paam n dɩ. B pa le tar tɩ-​neeb ye. Lebga mood la gõose. A Ãdem ne a Hawa sẽn kɩɩs Wẽnnaamã, b pa le yaa Wẽnnaam zo-​rãmb ye. Yaa rẽ yĩng la b vɩɩmã sẽn lebg toogã.

Sẽn paas menga, a Ãdem ne a Hawa ra miime tɩ b na n wa kiime. Tẽeg-⁠y tɩ Wẽnnaam da yeel-⁠b lame tɩ b sã n kɩɩs n dɩ tɩɩgã bila, b na n kiime. Daar ning b sẽn dɩ tɩɩgã bilã bala, lebga tɩlae tɩ b wa ki. B sã n da kelgẽ Wẽnnaam n são!

Yaa Wẽnnaam sẽn dig a Ãdem ne a Hawa n yiis Edɛnnã poor la b yaool n dog kamba. Dẽnd b kambã, la b yagensã me na n kʋʋndame la b kiidẽ.

A Ãdem ne a Hawa sã n da kelgẽ Wẽnnaam, bãmb ne b kambã fãa ra na n vɩɩmda ne sũ-noogo. B fãa ra na n vɩɩmda wakat fãa tẽngã zugu. Ned baa a ye ra pa na n kʋʋle, n lʋɩ bãaga, bɩ n ki ye.

Wẽnnaam datame tɩ nebã vɩɩmd wakat fãa ne sũ-noogo. A kãabame tɩ wakat n wat tɩ na n yɩ woto. Tẽngã fãa na n lebga neere, la bãag ka na n le yõk ned ye. Nebã fãa na n nonga taab la b nong Wẽnnaam.

A Hawa sẽn da pa le yaa Wẽnnaam zoa wã yĩnga, a sẽn wa n na n dog a kambã ra zabd-⁠a-⁠la wʋsgo. A sẽn kɩɩs a Zeova wã sɩd kɩtame t’a vɩɩmã lebg toog wʋsgo!

A Ãdem ne a Hawa roga kom-​dibli la kom-​pugli wʋsgo. B pʋda b pipi bi-​riblã yʋʋr t’a Kayẽ, n pʋd yiib-⁠n-​soabã t’a Abɛlle. Yãmb mii bũmb ning sẽn paam a Kayẽ ne a Abɛll bɩ?

GES-⁠Y a Kayẽ ne a Abɛll masã. B lebga bɛda. A Kayẽ lebga ka-​koaada. A kooda ki, n send tɩɩs sẽn womd biisi, la a bõeed karot ne sou la pastɛke.

A Abɛll yẽ ra gʋʋnda piisi. A nonga pe-⁠bi wã yell gesgo. Pe-⁠bi wã bɩtame n lebg bɛda, n dogdẽ, la tarẽ-n-tarẽ a piisã wa n lebga wʋsgo.

Raar a yembre, a Kayẽ ne a Abɛll kõo Wẽnnaam kũuni. A Kayẽ kõo a koodã biisi, t’a Abɛll kõ a pesg ning sẽn yaa sõma n yɩɩd a taabã. A Abɛll kũunã taa a Zeova yam. La a Kayẽ kũunã pa taa a yam ye. Yãmb mii sẽn yaa bũmb ning yĩng bɩ?

Pa yet t’a Abɛll kũunã yaa sõma n yɩɩd a Kayẽ rẽndã ye. Yaa a Abɛll sẽn yaa nin-​sõngã yĩnga. A nonga a Zeova la a nong a kẽemã me. La a Kayẽ yaa nin-​wẽnga. A pa nong a yaoã ye.

Rẽ n so tɩ Wẽnnaam yeel a Kayẽ t’a segd n toeema a zʋgã. La a Kayẽ pa kelg ye. Wẽnnaam sẽn nong a Abɛll n yɩɩd-⁠a wã yĩnga, a sũurã puugame. A Kayẽ yeela a Abɛll yaa: ‘Wa tɩ d kẽng weoogẽ.’ A Kayẽ sẽn wa n mik tɩ yaa yẽ ne a Abɛll bal n be weoogẽ wã, a wẽe a Abɛll ne lar buud n kʋ. A Kayẽ sẽn maanã pa wẽng sɩda?

Yaa sɩd t’a Abɛll kiime, la Wẽnnaam ket n tẽra a yelle. A Abɛll yɩɩ nin-​sõngo, la a Zeova pa yĩmd nin-​sõng yell ye. Dẽnd raar n wate, tɩ Wẽnnaam a Zeova na n vʋʋg a Abɛlle. Wakat kãnga, a Abɛll pa na n tol n le ki ye. A na n vɩɩmda tẽngã zug wakat fãa. Tõnd sã n wa paam n na n bãng a Abɛll la nin-​sõma a taabã, d sũur pa na n yɩ noog sɩda?

La Wẽnnaam pa nong neb nins sẽn yaa wẽns wa a Kayẽ wã ye. A Kayẽ sẽn kʋ a yaoã poore, Wẽnnaam sɩbg-⁠a lame. A rig-⁠a lame t’a zãag ne a zaka rãmba. A sẽn wa n loogdẽ wã, a talla a yao a yembr n tɩ maan a paga.

A Kayẽ ne a pagã roga kamba. A Ãdem ne a Hawa kamb a taabã me kẽe kãadem n dog kamba. Tarẽ-n-​tarẽ, nebã wa n lebga wʋsg tẽngã zugu. D na n goma neb kẽer yell masã.