NED sã n kẽnd n segd yãmb t’a woglmã ta y roogã, yãmb na n yeelame tɩ bõe? Y na n yeelame tɩ nin-​kãngã yaa nin-​wobgo, ka sɩda? Wakat n zĩnd tɩ nin-​wobd ra be tẽngã zugu. Biiblã yetame tɩ nin-​wobdã baaba rãmb ra yaa malɛgse. Maana wãn tɩ b ba rãmbã wa yaa malɛgse?

Tẽeg-⁠y tɩ malɛg-​wẽng a Sʋɩtãan ratame tɩ wẽngã pid zĩig fãa. Rẽ kɩtame t’a mak n na n belg Wẽnnaam malɛgsã meng tɩ b maan wẽnga. La tarẽ-n-​tarẽ, malɛgs kẽer wa n basame t’a Sʋɩtãan tõog-⁠ba. B basa tʋʋmd ning Wẽnnaam sẽn kõ-b saasẽ wã, n sig tẽngã zug n lebg wa ninsaalba. Yãmb mii sẽn yaa bũmb ning yĩng bɩ?

Biiblã yetame tɩ malɛgsã yãa pʋg-​neebã sẽn be tẽngã zugã, n dat tɩ b lebg b pagba. Yaa rẽ yĩng la b sẽn wa tẽngã zug n dɩgs pʋg-​neebã n maan b pagba. Biiblã yetame tɩ b sẽn maanã yaa wẽng wʋsgo, bala Wẽnnaam naana malɛgsã tɩ b vɩɩmd saasẽ.

Malɛgsã pagb sẽn dog kamb ninsã pa wõnd kamb a taabã ye. B sẽn wa n yaa bõonesã, tõe tɩ b ra wõnda kamb a taabã. La b sẽn wa n bɩtẽ wã, b ra lebgda wogd la bɛd tɩ b pãngã tar paasg wʋsg hal tɩ b wa lebg nin-​wobdo.

Nin-​wobdã ra yaa wẽnse. B sẽn da yaa bɛd la b tar pãngã yĩnga, b ra maanda nebã pãnga. B ra ratame n modga nebã fãa tɩ b maan wẽng wa bãmba.

A Enok ra kiime, la ned a to n da be n yaa nin-​sõngo. A yʋʋr la a Nowe. A Nowe ra maanda Wẽnnaam sẽn datã wakat fãa.

Daar a yembre, Wẽnnaam yeela a Nowe t’a na n kʋʋ nin-​wẽnsã fãa masã. La Wẽnnaam da na n kogla a Nowe ne a zaka rãmba, la a kogl rũms wʋsg me. D ges Wẽnnaam sẽn maan rẽ to-⁠to.

A NOWE ra tara pag la kom-​dibli a tãabo. A kom-​dibli wã yʋy yaa a Sɛm, a Kam la a Zafɛt. Bãmb me ra tara pagba. Dẽnd a Nowe zaka rãmb fãa ra yaa neb a nii.

Wẽnnaam yeela a Nowe t’a ka koom koglg sẽn yaa bedre. Nebã ra nan zɩ n yã koom koglg ye. Koglgã ra yaa bedr wa batayo, n yaa woko. Wẽnnaam yeela a Nowe t’a ka koglgã ‘tɩ yɩ rot a tãab n dogl taab zutu, la a maan ro-​pʋse.’ Ro-​pʋsã ra yaa a Nowe ne a zaka rãmb yĩnga, la rũmsã ne rɩɩbã me yĩnga.

Wẽnnaam leb n yeela a Nowe t’a yẽneg sũud n bol koglgã pʋgã ne a poorã fãa, tɩ koomã ra kẽ ye. Wẽnnaam le yeela a Nowe woto: ‘Mam na n waa ne sa-​kãseng dũniyã zugu, n sãam bõn-​vɩɩs nins fãa sẽn be tẽngã zugã. Neb nins fãa sẽn pa na n kẽ koglgã pʋgẽ wã na n kiime.’

A Nowe ne a kom-​dibli wã kelga a Zeova n sɩng koglgã kaabo. La neb a taabã ra laad-⁠b lame, la b ra ket n tʋmd tʋʋm-​yoodo. A Nowe sẽn yeel nebã tɩ Wẽnnaam na n kɩtame tɩ sa-​kãseng ni wã, b pa tẽ ye.

Koglgã sẽn da yaa bedr wʋsgã yĩnga, a kaabã kaoosa yʋʋm wʋsgo. La b wa n ka-⁠a lame n sa. Yaa wakat kãng la Wẽnnaam yeel a Nowe t’a kẽes rũmsã koglgã pʋgẽ. A yeelame t’a kẽes rũmsã yiib-​yiibu, raoog la yãanga, la a kẽes rũms kẽer yopoe-​poe. Wẽnnaam leb n yeela a Nowe t’a kẽes liuuli wã buud toor-​toore. A Nowe maana wa Wẽnnaam sẽn yeel-⁠a t’a maanã bal kɛpɩ.

A Nowe ne a zaka rãmb me kẽe koglgã pʋgẽ. Rẽ poore, Wẽnnaam paga kʋɩlengã. A Nowe ne a zaka rãmb ra bee koglgã pʋgẽ n gũudẽ masã. Mams-⁠y n ges-⁠y yãmb me sẽn da na n be koglgã pʋgẽ ne a Nowe rãmb n gũudẽ. Wẽnnaam da na n sɩd kɩtame tɩ sa-​kãsengã ni bɩ?