A NOWE ra tara pag la kom-​dibli a tãabo. A kom-​dibli wã yʋy yaa a Sɛm, a Kam la a Zafɛt. Bãmb me ra tara pagba. Dẽnd a Nowe zaka rãmb fãa ra yaa neb a nii.

Wẽnnaam yeela a Nowe t’a ka koom koglg sẽn yaa bedre. Nebã ra nan zɩ n yã koom koglg ye. Koglgã ra yaa bedr wa batayo, n yaa woko. Wẽnnaam yeela a Nowe t’a ka koglgã ‘tɩ yɩ rot a tãab n dogl taab zutu, la a maan ro-​pʋse.’ Ro-​pʋsã ra yaa a Nowe ne a zaka rãmb yĩnga, la rũmsã ne rɩɩbã me yĩnga.

Wẽnnaam leb n yeela a Nowe t’a yẽneg sũud n bol koglgã pʋgã ne a poorã fãa, tɩ koomã ra kẽ ye. Wẽnnaam le yeela a Nowe woto: ‘Mam na n waa ne sa-​kãseng dũniyã zugu, n sãam bõn-​vɩɩs nins fãa sẽn be tẽngã zugã. Neb nins fãa sẽn pa na n kẽ koglgã pʋgẽ wã na n kiime.’

A Nowe ne a kom-​dibli wã kelga a Zeova n sɩng koglgã kaabo. La neb a taabã ra laad-⁠b lame, la b ra ket n tʋmd tʋʋm-​yoodo. A Nowe sẽn yeel nebã tɩ Wẽnnaam na n kɩtame tɩ sa-​kãseng ni wã, b pa tẽ ye.

Koglgã sẽn da yaa bedr wʋsgã yĩnga, a kaabã kaoosa yʋʋm wʋsgo. La b wa n ka-⁠a lame n sa. Yaa wakat kãng la Wẽnnaam yeel a Nowe t’a kẽes rũmsã koglgã pʋgẽ. A yeelame t’a kẽes rũmsã yiib-​yiibu, raoog la yãanga, la a kẽes rũms kẽer yopoe-​poe. Wẽnnaam leb n yeela a Nowe t’a kẽes liuuli wã buud toor-​toore. A Nowe maana wa Wẽnnaam sẽn yeel-⁠a t’a maanã bal kɛpɩ.

A Nowe ne a zaka rãmb me kẽe koglgã pʋgẽ. Rẽ poore, Wẽnnaam paga kʋɩlengã. A Nowe ne a zaka rãmb ra bee koglgã pʋgẽ n gũudẽ masã. Mams-⁠y n ges-⁠y yãmb me sẽn da na n be koglgã pʋgẽ ne a Nowe rãmb n gũudẽ. Wẽnnaam da na n sɩd kɩtame tɩ sa-​kãsengã ni bɩ?

NEB nins sẽn da ka be koglgã pʋgẽ wã ra ket n maanda b toor kae. B ra ket n pa tẽed tɩ sa-​kãsengã na n sɩd niime ye. Tõeeme meng tɩ b ra laada a Nowe n yɩɩd pĩndã. La wa n yɩɩ tɩlae tɩ b bas b laadã.

Zĩig pʋgẽ bala, saaga sɩnga niibu. A ra niidame tɩ yaa wa fo sẽn toog koom ne so n kiigd rʋk pʋgẽ. Ad a Nowe ra bee bʋʋm! La ned baa ye ra pa le tõe n kẽ koglgã pʋgẽ ye. A Zeova meng n da pag kʋɩlengã.

Pa yã n kaoos la koomã lim tẽngã hal tɩ lebg wa kʋɩl-​kãseng ye. Koomã ra lubda tɩɩsã la a vuud kug-​bɛdã, tɩ maand bʋʋr wʋsgo. Rabeemã kẽe nebã tɩ b zoe n dʋ tãensã zutu. Sasa kãnga, nebã ra yetame tɩ b sã n da bãngẽ, b ra na n kelga a Nowe n kẽ koglgã pʋgẽ. La b ra ka le tõe n kẽ ye.

Koomã ra lebgda wʋsg n paasdẽ. Saagã nii rasem 40, wĩndg la yʋngo. Koomã zẽk n taa tãensã zutu, hal n lim tã-bɛdã menga. Wa Wẽnnaam sẽn da yeelã, nebã la rũms nins fãa sẽn da ka be koglgã pʋgẽ wã kiime. La neb nins sẽn da be koglgã pʋgẽ wã põsame.

A Nowe ne a kom-​dibli wã kaa koglgã sõma. Koomã zẽka koglgã t’a rugda. Raar a yembre, saagã yoogame tɩ wĩntoogã puki. Zĩigã fãa ra yaa koom bala. Yaa koglgã bal n da rugd koomã zugu.

Nin-​wobdã ra pa ye be n na n nams nebã ye. Bãmb ne b ma rãmbã la nin-​wẽns a taabã fãa kiime. La b baaba rãmbã yẽ?

Yãmb ket n tẽra b baaba rãmbã sẽn da yaa b rãmb bɩ? Yaa malɛgs nins sẽn da yi saasẽ n wa tẽng zug n lebg wa ninsaalb n vɩɩmd nebã sʋkã. Sa-​kãsengã sasa, b pa naag nin-​wẽnsã n ki ye. B le lebga malɛgs n dʋ saasẽ. La Wẽnnaam ka sak tɩ b ye naag yẽ malɛgs a taabã sẽn yaa sõma wã ye. B lebga a Sʋɩtãan malɛgse. Biiblã pʋgẽ, b boond-⁠b lame tɩ zĩn-​dãmba.

Wẽnnaam kɩtame tɩ seb-​kẽeng fugi, tɩ saagã koom sɩng boogre. Kiis a nu poore, koglgã tɩ yalsa tãng a ye zugu. Rẽ loogr poore, kaoosa wʋsg tɩ neb nins sẽn da be koglgã pʋgẽ wã yaool n wa yã tãensã sẽn pukdi. Koomã me ra tara boogr bala.

Wakat kãnga, a Nowe basa gãabg t’a yi koglgẽ wã. La a yɩkame n zãag bilf n lebg n wa, bala a ka paam zĩ-koɛɛng n na n zaoond ye. A ra yɩgdame, n kẽngdẽ la a lebgd n watẽ.

La a Nowe sẽn da rat n bãng koomã sã n boogame tɩ tẽn-​gãonga pukã, a basa wall t’a yi koglgẽ wã. La wallã me lebg n waame, bala a pa yã zĩ-koɛɛng ye. A Nowe le bas-⁠a lame t’a looge, la a lebg n waa ne oliiv vãoogo. Rẽ kɩtame t’a Nowe bãng tɩ koomã booga wʋsgo. A Nowe le basa wallã t’a looge, la wallã pa lebg n wa ye, bala a yãa zĩ-koɛɛng n pa be.

Rẽ poore, Wẽnnaam yeela a Nowe yaa: ‘Bɩ foo ne f zaka rãmb la rũmsã yi koglgã pʋgẽ masã.’ B sẽn zĩnd koglgã pʋgẽ wã yɩɩda yʋʋmd tõre. Yaa vẽeneg tɩ b sẽn paam n yi koglgã pʋgẽ wã yɩ-⁠b-⁠la noogo!