A NOWE kom-​dibli wã roga kamb wʋsgo. Kom-​kãens me lebga bɛd n dog kamba. Tarẽ-n-​tarẽ, neba lebga wʋsg tẽngã zugu.

A Nowe yageng a ye n da boond t’a Nimrood. A ra yaa tãoos sẽn yaa nin-​wẽnga, n kʋʋd rũms la neba. A maana a meng rĩm n na n soog nebã. La Wẽnnaam da pa nong a Nimrood ye.

Wakat kãnga, neba fãa ra gomda gom-​yende. A Nimrood da ratame tɩ nebã fãa pa zĩ-yend tɩ yẽ paam n soog-⁠ba. Yãmb mii a sẽn maan bũmb ning bɩ? A yeela nebã tɩ b wa tɩ b naag taab n zĩnd tẽng a yembre, la b me gasg a pʋgẽ. Yãmb pa ne nebã sẽn wẽed tãn-​koɛɛm fotã zug sɩda?

La Wẽnnaam a Zeova ra pa rat woto ye. A ra ratame tɩ nebã sãeeg n pid tẽngã. La nebã yeelame yaa: ‘Wa-⁠y tɩ d me tẽnga, la gãsg t’a woglem ta saasẽ, n bao yʋʋre.’ B ra ratame n bao yʋʋre, b pa rat n waoog Wẽnnaam ye.

La Wẽnnaam kɩtame tɩ b ka me gasgã n baas ye. Yãmb mii a sẽn maan bũmb ning bɩ? A kɩtame tɩ b goamã lebg toɛy-​toɛya. B tiig n gomda goam toɛy-​toɛy masã, n pa le wʋmd taab goam ye. Rẽ n so tɩ b boond b tẽngã tɩ Babɛll bɩ Babilon, sẽn dat n yeel tɩ “kalem-​kalem.”

Nebã yii Babɛll n sãeeg n kẽng zĩis toor-​toore. Neb nins sẽn da wʋmd taab goamã tũu taab n tɩ vɩɩmd zĩ-yende.

SA-​KÃSENGÃ poore, neb n da tɩ vɩ Uur tẽngã pʋgẽ. Uur lebga tẽn-​bedre, n tar ro-​neeba, la a nebã ra pʋʋsda ziri wẽnnaam dãmba, wa Babɛll nebã me sẽn da pʋʋsd ziri wẽnnaam dãmbã. Uur la Babɛll nebã ra pa tũud a Zeova ye. La a Nowe ne a bi-​ribl a Sɛm yẽ ra tũuda a Zeova.

A Nowe kell n saka Wẽnnaam wakat fãa. La yʋʋm kobs-​tã la pis-⁠nu sa-​kãsengã niib poore, a kiime. Yaa a kũumã yʋʋm a yiib poor la rao ning sẽn be fotã zugã rog-​yã. Wẽnnaam da nonga ra-​kãngã wʋsgo. A yʋʋr la a Abrahaam. Yẽ ne a zaka rãmb ra vɩɩ Uur tẽngã pʋgẽ.

Raar a yembre, a Zeova yeela a Abrahaam woto: ‘Yik n bas f tẽnga ne f buudã la f zakã n kẽng tẽng ninga mam sẽn na n wilg foo wã.’ A Abrahaam kelga Wẽnnaam n sak n loog n bas a te-​neebã la a ro-​neerã bɩ? N-⁠ye, a sakame. Yaa a Abrahaam sẽn da sakd Wẽnnaam wakat fãa wã yĩng la Wẽnnaam sẽn da boond-⁠a t’a zoa wã.

A Abrahaam zaka neb kẽer tũ-a lame n yi Uur. Yaa a ba a Teera, a Lot sẽn da yaa a kẽem biigã, la a pag a Saara. B kẽname n wa ta zĩig b sẽn boond tɩ Harã. Harã ra zãra ne Uur wʋsgo. A Teera kii be.

Wakat a wãn poore, a Abrahaam ne a zaka rãmb yii Harã n kẽng Kanaã. B sẽn ta be wã, a Zeova yeela a Abrahaam woto: ‘Yaa tẽn-​kãngã la mam na n kõ fo yagensã.’ A Abrahaam tilga fu-​rot Kanaã n vɩɩmd be.

Wẽnnaam sõnga a Abrahaam t’a paam piis la rũms a taab wʋsgo, la a paam tʋm-​tʋmdb wʋsg me. La yẽ ne a pag a Saara ra pa tar biig ye.

A Abrahaam sẽn wa n tar yʋʋm 99, a Zeova yeel-⁠a-⁠la woto: ‘Ad kãabg mam sẽn kãabd foom. Fo na n lebga buud wʋsg ba.’ La a Abrahaam ne a Saara yaool n da kʋʋla wʋsgo. B ra na n maana wãn n paam biiga?