SA-​KÃSENGÃ poore, neb n da tɩ vɩ Uur tẽngã pʋgẽ. Uur lebga tẽn-​bedre, n tar ro-​neeba, la a nebã ra pʋʋsda ziri wẽnnaam dãmba, wa Babɛll nebã me sẽn da pʋʋsd ziri wẽnnaam dãmbã. Uur la Babɛll nebã ra pa tũud a Zeova ye. La a Nowe ne a bi-​ribl a Sɛm yẽ ra tũuda a Zeova.

A Nowe kell n saka Wẽnnaam wakat fãa. La yʋʋm kobs-​tã la pis-⁠nu sa-​kãsengã niib poore, a kiime. Yaa a kũumã yʋʋm a yiib poor la rao ning sẽn be fotã zugã rog-​yã. Wẽnnaam da nonga ra-​kãngã wʋsgo. A yʋʋr la a Abrahaam. Yẽ ne a zaka rãmb ra vɩɩ Uur tẽngã pʋgẽ.

Raar a yembre, a Zeova yeela a Abrahaam woto: ‘Yik n bas f tẽnga ne f buudã la f zakã n kẽng tẽng ninga mam sẽn na n wilg foo wã.’ A Abrahaam kelga Wẽnnaam n sak n loog n bas a te-​neebã la a ro-​neerã bɩ? N-⁠ye, a sakame. Yaa a Abrahaam sẽn da sakd Wẽnnaam wakat fãa wã yĩng la Wẽnnaam sẽn da boond-⁠a t’a zoa wã.

A Abrahaam zaka neb kẽer tũ-a lame n yi Uur. Yaa a ba a Teera, a Lot sẽn da yaa a kẽem biigã, la a pag a Saara. B kẽname n wa ta zĩig b sẽn boond tɩ Harã. Harã ra zãra ne Uur wʋsgo. A Teera kii be.

Wakat a wãn poore, a Abrahaam ne a zaka rãmb yii Harã n kẽng Kanaã. B sẽn ta be wã, a Zeova yeela a Abrahaam woto: ‘Yaa tẽn-​kãngã la mam na n kõ fo yagensã.’ A Abrahaam tilga fu-​rot Kanaã n vɩɩmd be.

Wẽnnaam sõnga a Abrahaam t’a paam piis la rũms a taab wʋsgo, la a paam tʋm-​tʋmdb wʋsg me. La yẽ ne a pag a Saara ra pa tar biig ye.

A Abrahaam sẽn wa n tar yʋʋm 99, a Zeova yeel-⁠a-⁠la woto: ‘Ad kãabg mam sẽn kãabd foom. Fo na n lebga buud wʋsg ba.’ La a Abrahaam ne a Saara yaool n da kʋʋla wʋsgo. B ra na n maana wãn n paam biiga?

YÃMB nee a Abrahaam sẽn dat n maan bũmb ningã bɩ? A zãada sʋʋga, la wõnda a rat n kʋʋ a bi-​riblã. Bõe yĩng t’a rat n maan woto? D reng n ges sẽn yɩ to-⁠to t’a Abrahaam ne a Saara wa paam b biigã.

Tẽeg-⁠y tɩ Wẽnnaam da kãabame tɩ b na n paama biiga. La a Abrahaam ne a Saara sẽn da kʋʋl wʋsgã yĩnga, wõnda b ra pa tõe n paam biig ye. La a Abrahaam ra tẽedame tɩ Wẽnnaam tõe n kɩtame tɩ b paam biiga. D ges sẽn yɩ to-⁠to.

Wẽnnaam sẽn yeel tɩ b na n paama biigã poore, maana yʋʋmde. A Abrahaam sẽn wa n tar yʋʋm 100 t’a Saara tar yʋʋm 90 wã, b roga bi-​ribl n pʋd-⁠a t’a Izaak. Wẽnnaam sɩd maana wa a sẽn da yeelã bal kɛpɩ!

La a Izaak sẽn wa n bɩ n lebg bedre, a Zeova kosa a Abrahaam bũmb n na n ges a sã n sɩd tẽeda yẽ. A boola a Abrahaam, t’a Abrahaam sake. T’a yeel-⁠a yaa: ‘Rɩk a Izaak sẽn yaa fo bi-​yendã, n kẽng tãng ning mam sẽn na n wilg foomã zug n tɩ maan maoongo.’

A Abrahaam sẽn wʋm woto wã, a sũurã sãamame. A ra nonga a bi-​riblã hal wʋsgo. Tẽeg-⁠y me tɩ Wẽnnaam da yeelame t’a Abrahaam kamb ne a yagens n na n vɩɩmd Kanaã. La a Izaak sã n ki, rẽ pa le tõe ye. A Abrahaam da pa wʋmd Wẽnnaam goamã võor ye, la a maana a sẽn yeelã bala.

A Abrahaam sẽn ta tãngã zugã, a mee tẽn-​kugri. Rẽ poore, a sẽba a Izaak n dogl tẽn-​kugrã zugu, n dɩk sʋʋgã n na n kodg-⁠a. La Wẽnnaam malɛk a ye yeelame: ‘Abrahaam, Abrahaam!’ T’a Abrahaam sak tɩ: ‘Naaba!’

Tɩ malɛkã yeel-⁠a tɩ Wẽnnaam yeelame yaa: ‘Ra maan biigã bũmb ye. Masã, mam bãngame tɩ fo tẽeda maam, bala fo ka mong maam fo biigã sẽn yaa fo bi-​yendã ye.’

Ad a Abrahaam sɩd ra tẽeda Wẽnnaam ne a sũur fãa koe! A ra kɩsa sɩd t’a Zeova tõee bũmb fãa, la t’a tõeeme meng n vʋʋg a Izaake. La Wẽnnaam da pa rat t’a Abrahaam sɩd kʋ a Izaak ye. A kɩtame tɩ pesg yɩɩl gaag ne tuugu, t’a yeel a Abrahaam t’a yõk pesgã n maan maoong la a bas a biigã.