KOM-​DIBLI a yiibã sẽn be fotã zugã pa wõnd taab ye. Ka sɩda? Yãmb mii b yʋyã bɩ? Sẽn tãood-⁠a tãpã yʋʋr la a Ezayu, tɩ sẽn gãda pesgã yʋʋr yaa a Zakoobe.

A Ezayu ne a Zakoob yaa kinkirsi. Yaa a Izaak ne a Rebeka kamba. A Izaak nonga a Ezayu wʋsgo, bala a yaa tãoos sẽn mi a tʋʋmdã sõma, hal n wat ne nemd wʋsg tɩ zaka rãmb dɩtẽ. A Rebeka yẽ ra nonga a Zakoob n yɩɩda, bala a ra yaa bi-​sõng n pa fir-​fir soab ye.

A Ezayu ne a Zakoob yaab-​raoog a Abrahaam ra ket n vɩɩme. A Zakoob ra nong n kẽnda a nengẽ n kelgd-⁠a t’a gomd a Zeova yelle. A Abrahaam wa n kiime. A sẽn wa n kiidẽ wã t’a tara yʋʋm koabg la pis-​yopoe la a nu, tɩ kinkirsã tar yʋʋm 15.

A Ezayu sẽn wa n tar yʋʋm 40, a kẽe kãadem ne Kanaã kom-​pugli a yiibu. A Izaak ne a Rebeka sũur sãama wʋsgo, bala pʋg-​kãensã ra pa tũud a Zeova ye.

Raar a yembre, a Ezayu sũurã puuga wʋsg ne a yao a Zakoobe. B ba a Izaak ra rat n ninga a bi-​kãsengã barka. Sẽn yaa a Ezayu la kãsmã yĩnga, a ra tẽedame tɩ yẽ n na n paam barkã. La a ra zoe n dɩka a bi-​kãseng pʋɩɩrã n kõ a Zakoob n tek ne rɩɩbo. Sẽn paas me, a Ezayu ne a Zakoob sẽn wa n dogã, Wẽnnaam yeelame tɩ yaa a Zakoob n na n paam barkã. La sɩd yɩɩ woto. Yaa a Zakoob la a Izaak ning barkã.

A Ezayu sẽn wʋm dẽ wã, a sũurã puuga ne a Zakoob hal t’a rat n kʋ-⁠a. A Rebeka sẽn bãng t’a Ezayu rat n kʋʋ a Zakoobã, a yɛɛsame. A yeela a sɩd a Izaak woto: ‘A Zakoob me sã n kẽ kãadem ne Kanaã kom-​pugli wã, mam vɩɩmã ka le tar yõod ye.’

Rẽ poore, a Izaak boola a biig a Zakoob n yeel-⁠a yaa: ‘Ra kẽ kãadem ne Kanaã bi-​pugl ye. Kẽng Harã, f yaab-​raoog a Betuɛll nengẽ, n tɩ bao a biig a Labã bi-​pugl a ye n kẽ kãadem ne.’

A Zakoob saka a ba wã noore, n yik n na n tog so-​wok n kẽng a buudã neb nengẽ Harã.

YÃMB mii rap nins sẽn yas n gomd ne a Zakoobã bɩ? A Zakoob toga sor rasem ka tɛk n wa seg-⁠b bulg noor tɩ b gũud b piisi. A Zakoob sok-⁠b lame yaa: ‘Yãmb yita yɛ?’

B leokame tɩ b yita Harã.

T’a Zakoob sok-⁠b yaa: ‘Yãmb mii a Labã bɩ?’

Tɩ b leok tɩ: ‘N-⁠ye, tõnd mi-⁠a lame. Ad a bi-​pugl a Rasɛll sẽn wat ne a piisã.’ Yãmb nee a Rasɛll fotã zug t’a kẽnd n watẽ bɩ?

A Zakoob sẽn yã a Rasɛll sẽn kẽnd n wat ne a ba a Labã piisã, a tɩ laka kugrã sẽn pag bulgã noorã, n wi koomã n kõ piisã tɩ b yũ. Rẽ poore a moka a Rasɛlle, la a togs-⁠a a sẽn yaa ned ninga. A Rasɛll sũurã yɩɩ noog wʋsgo, t’a zoe n kul n tɩ togs a ba a Labã.

A Labã sũur yɩɩ noog wʋsgo, a Zakoob sẽn sig a yirã. A sẽn wa n yeel t’a ratame t’a Rasɛll lebg a pagã me yɩɩ a Labã noogo. La a Labã yeela a Zakoob t’a sã n dat a Rasɛlle, a segd n tʋm n kõo yẽ yʋʋm a yopoe. A Zakoob sakame, bala a ra nonga a Rasɛll wʋsgo. La yãmb mii bũmb ning sẽn maan kãadmã daar bɩ?

A Labã pa rɩk a Rasɛll n kõ a Zakoob ye. A rɩka a bi-​pugl kãseng a Lea n kõ-a. Rẽ poore, a Labã yeel-⁠a lame t’a sã n sak n na n tʋm yʋʋm a yopoe n paase, a na n kõ-a-⁠la a Rasɛll me. A Zakoob sakame. Bãmb wakatẽ wã, Wẽnnaam da basame tɩ rapã tõe n kẽ kãadem ne pagb wʋsgo. La masã, Biiblã yetame tɩ rao segd n kẽe kãadem ne pag a ye bala.