KOM-​DIBLI nins fãa sẽn zĩ ne a Zakoob foto wã zugã yaa yẽ kamba. B yaa bãmb 12. A tara kom-​pugli me. Yãmb mii a Zakoob kambã kẽer yʋy bɩ? Kẽer yʋy la woto:

A Lea roga a Rubɛn, a Simeõ, a Levi la a Zida. A Rasɛll sẽn da pa tõe n dogã yĩnga, a sũurã sãama hal wʋsgo. A rɩka a yemb-​poak a Bila n kõ a Zakoob t’a rog a Dan ne a Naftali. A Lea me rɩka a yemb-​poak a Zilpa n kõ a Zakoob t’a rog a Gaad ne a Azɛɛr. A Lea roga kom-​dibli a yiib n paase. Yaa a Isakaar ne a Zabulõ.

A Rasɛll wa n tõog n doga biiga, n pʋd a yʋʋr t’a Zozɛf. D na n wa goma a Zozɛf yell taoorã, bala a wa n lebga nin-​kãsenga. A Zakoob kom-​dibli 11 yʋy la woto.

A Zakoob ra tara kom-​pugli me, la Biiblã gomda bi-​pugl a ye bal yelle. A yʋʋr la a Dina.

A Zakoob ne a pagbã la a kambã ra bee a rɛɛmb a Labã zakẽ wã. La a Zakoob wa n yikame n na n leb a tẽngẽ wã Kanaã. A tigma a zaka rãmba, a piisã ne a niisã, n na n leb Kanaã sẽn zãr ne Harã wã.

A Zakoob ne a zaka rãmb taa Kanaã. Kaoosg poore, b wa n yikame n na n tɩ zĩnd Kanaã tẽng a to pʋgẽ. A Rasɛll tek n doga bi-​ribl a to sorẽ. A rogmã yɩɩ toogo, hal tɩ tũ ne a yõore. La bũmb da pa tar biigã ye. A Zakoob pʋd-⁠a lame t’a Bẽnzame.

D modg n da yĩm a Zakoob kom-​dibli 12 wã yʋy ye. Bala yaa Israɛll nebã yaab rãmba. Israɛll buud 12 wã sʋka, 10 yʋy n yaa a Zakoob kom-​dibli piigã yʋya, t’a yiib yʋy yaa a Zozɛf kom-​dibli a yiibã yʋya. Kom-​dibli kãensã rogem poor menga, a Izaak vɩɩmdame n kaoose, la a sũurã tog n yɩɩ noogo, a yagensã sẽn da waoogã yĩnga. D ges bũmb ning sẽn paam a yageng a Dina.

YÃMB mii a Dina sẽn debd neb nins nengẽ wã bɩ? Yaa Kanaã kom-​pugli wã nengẽ. Yãmb tagsdame t’a ba a Zakoob sã n bãng rẽ a sũur na n yɩɩ noog bɩ? D tẽeg a Abrahaam ne a Izaak sẽn da tagsd bũmb ning Kanaã pagbã zugu.

A Abrahaam da ratame t’a biig a Izaak kẽ kãadem ne Kanaã bi-​pugl sɩda? Ayo. A Izaak ne a Rebeka da ratame tɩ b biig a Zakoob kẽ kãadem ne Kanaã bi-​pugl sɩda? Ayo, bãmb me ra pa rat ye. Bõe yĩnga?

Kanaã nebã ra pʋʋsda ziri wẽnnaam dãmba. B ra pa tõe n yɩ sɩd-​sõma la pʋg-​sõma ye. B leb n da pa tõe n yɩ zo-​sõma ye. Rẽnd a Zakoob sã n da bãng t’a bi-​puglã zo-​rãmb yaa Kanaã kom-​pugli, a sũurã ra na n sãamame.

Sɩd me, yell n paam a Dina. Yãmb nee Kanaã rao ning sẽn get a Dina wã bɩ? A yʋʋr la a Sikɛm. A Dina kẽnga Kanaã kom-​pugli wã nengẽ daar a yembre, t’a Sikɛm modg-⁠a n gãand-⁠a. Woto yaa wẽng wʋsgo, bala yaa rao ne pag sẽn kẽ kãadem bal n tõe n gãand taaba. Yel-​wẽnd ning a Sikɛm sẽn maanã waa ne yɛl a taab n paase.

A Dina kẽem dãmbã sẽn wʋm kibarã, b sũurã puuga hal wʋsgo. A Simeõ ne a Levi sũurã yikame tɩ b rɩk sʋʋs n kẽ tẽngã pʋgẽ tɩ ned ka bãng ye. Bãmb ne b ba-​biis a taabã kʋʋ a Sikɛm la rap a taabã fãa. A Zakoob kom-​dibli wã sẽn maan woto wã yika a sũur wʋsgo.

La yaa bõe n wa ne yel-​kãensa fãa? Yaa a Dina sẽn yõg zood ne neb sẽn pa tũud Wẽnnaam noyã. Tõnd pa rat zo-​rãmb sẽn yaa woto ye. Ka sɩda?