YƲƲM a yiib loogr poore, a Zozɛf ra keta bãensã roogẽ. Rã-​kɩtã ra yĩma a yelle. La yʋng a yembre, a Faraõ gãand n zãmsa zãmsd a yiibu, la a sẽn wa n nekã, a ra rat n bãnga a zãmsdã võore. Yãmb pa ne-⁠a fotã zug t’a gãe sɩda? Vẽkembeoogã, a Faraõ boola a bag-​bʋgdbã n togs a sẽn gãand n zãms n yã bũmb ningã. La b baa a ye pa tõog n togs a zãmsdã võor ye.

Masã la rã-kɩtã yaool n tẽeg a Zozɛf yelle. A yeela a Faraõ tɩ yẽ sẽn wa n be bãensã roogẽ wã, rao n da be be n tar tõog n tõe n togs zãmsd võore. A Faraõ kɩtame tɩ b tɩ yiis a Zozɛf bãensã roogẽ tao-​tao t’a wa.

A Faraõ yeela a Zozɛf woto: ‘Mam deng n zãms n yãa nag-​nobds a yopoe, la nag-​wag a yopoe. Nag-​wagã wãba nag-​nobdsã.’

‘Mam le zãms n yãa kaaf a ye sẽn wom ka-​zut a yopoe sẽn bɩ sõma n yaa neere, la m yã ka-⁠zu-​faad a yopoe me. La ka-⁠zu-​faad a yopoe wã rɩɩ ka-⁠zu-​sõma a yopoe wã.’

A Zozɛf yeela a Faraõ yaa: ‘Zãmsd a yiibã fãa võor yaa a yembre. Nag-​nobds a yopoe wã la ka-​zut a yopoe sẽn bɩ sõma wã yaa yʋʋm a yopoe. Nag-​wag a yopoe wã la ka-⁠zu-​faad a yopoe wã me yaa yʋʋm a yopoe. Yʋʋm a yopoe n wat tɩ rɩɩb wʋsg na n zĩnd Ezipti. La rẽ poore, yʋʋm a yopoe n wat tɩ kom na n zĩndi.’

Rẽ n so t’a Zozɛf yeel a Faraõ yaa: ‘Bɩ y bao rao sẽn tar bãngr la yam, n kɩt t’a tigs rɩɩbã yʋʋm a yopoe nins sẽn na n yɩ tɩgr sasa wã. Woto, yʋʋm a yopoe komã sã n wa, nebã pa na n ki kom ye.’

A Zozɛf goamã yɩɩ a Faraõ noogo, t’a kell n yãk-⁠a t’a na n tigs rɩɩbã n bĩngi. Masã, a Zozɛf lebga nin-​kãseng Ezipti. A Faraõ sẽn yãk a toogo, yẽ n yɩɩd neb a taabã fãa.

Yʋʋm a nii loogr poore, komã sẽn wa n kẽ tẽngã, a Zozɛf wa n zĩi raar a ye n ne rap sẽn wate. Yãmb mii sẽn yaa neb nins bɩ? Yaa a Zozɛf kẽem dãmbã. B ba a Zakoob tʋm-⁠b lame tɩ b wa bao rɩɩb Ezipti, bala rɩɩb ra pa le be Kanaã ye. A Zozɛf bãnga a kẽem dãmbã, la bãmb ka bãng-⁠a ye. Yãmb mii bũmb ning sẽn kɩt tɩ b pa bãng-⁠a wã bɩ? Yaa a Zozɛf sẽn lebg kãsmã yĩnga. Sẽn paas me, a ra yeelga naam futu.

Tõnd ra zoe n yãame t’a Zozɛf sẽn da wa n yaa biigã, a ra zãmsame n yã a kẽem dãmbã tɩ b wõgemd a taoore. Masã, a sẽn yã a kẽem dãmbã, a tẽega rẽ yelle. A Zozɛf bãngame tɩ yaa Wẽnnaam n tʋm yẽ Ezipti, la pa zaalem yĩng ye. La yãmb tagsdame t’a Zozɛf na n maana bõe masã? Bɩ d ges sẽn pʋgdã.

A ZOZƐF ratame n bãng a kẽem dãmbã sã n ket n yaa nin-​wẽnse, bɩ b sã n toeemame. A yeel-⁠b-⁠la woto: ‘Yãmb waame n na n soos n ges tõnd tẽnga zĩis nins sẽn ka pãngã.’

La b leokame yaa: ‘Ayo, tõnd ka wa n na n ges tẽngã ye. Tõnd pa nin-​wẽns ye. Tõnd fãa yaa rao a ye kamba. Tõnd ba wã roga tõnd piig la a yiibu. D yao-​zʋʋgã paa ne tõnd ba wã yiri, la a ye n ka le be.’

La a Zozɛf maana wa a pa tẽed a kẽem dãmbã goam ye. A kɩtame tɩ b kẽes a kẽem a Simeõ bãens roogo, la a bas a taabã tɩ b tall rɩɩbã n looge. La a yeel-⁠b-⁠la woto: ‘Y sã n wa lebg n watẽ bɩ y zã y yao-​zʋʋgã n wa.’

A Zozɛf kẽem dãmbã sẽn lebg n kul Kanaã wã, b togsa b ba a Zakoob yɛlã fãa. A Zakoob sũurã sãamame t’a yeel woto: ‘A Zozɛf kae ye, a Simeõ me kae ye. Mam biig a Bẽnzame ka na n tũ yãmb n kẽng be ye.’ La b rɩɩbã sẽn wa n kolgd saabã, a Zakoob kong n basame t’a Bẽnzame na n tũ a kẽem dãmbã n kẽng Ezipti, tɩ b paam dɩɩbo.

Raar a yembre, a Zozɛf wa n nee a ba-​biisã sẽn wate. A sẽn yã a yao a Bẽnzame wã, a sũurã yɩɩ noog wʋsgo. La b ned baa a ye ra pa mi tɩ nin-​kãsengã yaa a Zozɛf ye. A Zozɛf maana bũmb n na n ges a kẽem dãmbã sã n toeema zʋgo.

A kɩtame t’a sõgen dãmbã pids a ba-​biisã yond ne rɩɩbo. A leb n kɩtame tɩ b ning a wanzuri wũmblã a Bẽnzame yolgã pʋgẽ n naag rɩɩbã, tɩ b baa a ye ka bãng ye. B sẽn pids b yondã n sa tɩ b loog n zãag bilfu, a Zozɛf tʋma a sõgen dãmbã tɩ b babs-⁠ba. Sõgen dãmbã sẽn ta b nengẽ wã, b yeel-⁠b-⁠la woto: ‘Bõe yĩng tɩ yãmb zuk tõnd zu-​soabã wanzuri wũmblã?’

La a Zozɛf kẽem dãmbã yeela woto: ‘Tõnd pa zuk bũmb ye. Yãmb sã n vaees n yã-a tõnd nin-⁠yend yolgẽ fãa, bɩ y kʋ a soaba.’

Sõgen dãmbã vaeesa yondã fãa n tɩ yã wũmblã a Bẽnzame yolgã pʋgẽ. Sõgen dãmbã yeel-⁠b lame yaa: ‘Bɩ neb a taabã looge, tɩ tõnd na n talla a Bẽnzame n lebe.’ A Zozɛf kẽem dãmbã na n maana wãn masã?

B fãa tũu a Bẽnzame n leb a Zozɛf nengẽ. B sẽn ta wã, a Zozɛf yeel-⁠b lame t’a Bẽnzame na n paame n lebg yẽ yamba, la tɩ bãmb tõe n kulame.

La a Zida yeela woto: ‘Mam sã n lebg n kul n pa tall biigã, mam ba wã na n kiime, bala a nong-⁠a-⁠la wʋsgo. Yaa rẽ yĩng la mam kot yãmb masã tɩ y bas tɩ mam pa ka n yɩ yãmb yamba, la y bas tɩ biigã tũ a kẽem dãmbã n kuli.’

A Zozɛf bãngame masã t’a kẽem dãmbã toeema zʋgo. B lebga nin-​sõma. D ges a Zozɛf sẽn na n maan bũmb ning masã.