A ZOZƐF ratame n bãng a kẽem dãmbã sã n ket n yaa nin-​wẽnse, bɩ b sã n toeemame. A yeel-⁠b-⁠la woto: ‘Yãmb waame n na n soos n ges tõnd tẽnga zĩis nins sẽn ka pãngã.’

La b leokame yaa: ‘Ayo, tõnd ka wa n na n ges tẽngã ye. Tõnd pa nin-​wẽns ye. Tõnd fãa yaa rao a ye kamba. Tõnd ba wã roga tõnd piig la a yiibu. D yao-​zʋʋgã paa ne tõnd ba wã yiri, la a ye n ka le be.’

La a Zozɛf maana wa a pa tẽed a kẽem dãmbã goam ye. A kɩtame tɩ b kẽes a kẽem a Simeõ bãens roogo, la a bas a taabã tɩ b tall rɩɩbã n looge. La a yeel-⁠b-⁠la woto: ‘Y sã n wa lebg n watẽ bɩ y zã y yao-​zʋʋgã n wa.’

A Zozɛf kẽem dãmbã sẽn lebg n kul Kanaã wã, b togsa b ba a Zakoob yɛlã fãa. A Zakoob sũurã sãamame t’a yeel woto: ‘A Zozɛf kae ye, a Simeõ me kae ye. Mam biig a Bẽnzame ka na n tũ yãmb n kẽng be ye.’ La b rɩɩbã sẽn wa n kolgd saabã, a Zakoob kong n basame t’a Bẽnzame na n tũ a kẽem dãmbã n kẽng Ezipti, tɩ b paam dɩɩbo.

Raar a yembre, a Zozɛf wa n nee a ba-​biisã sẽn wate. A sẽn yã a yao a Bẽnzame wã, a sũurã yɩɩ noog wʋsgo. La b ned baa a ye ra pa mi tɩ nin-​kãsengã yaa a Zozɛf ye. A Zozɛf maana bũmb n na n ges a kẽem dãmbã sã n toeema zʋgo.

A kɩtame t’a sõgen dãmbã pids a ba-​biisã yond ne rɩɩbo. A leb n kɩtame tɩ b ning a wanzuri wũmblã a Bẽnzame yolgã pʋgẽ n naag rɩɩbã, tɩ b baa a ye ka bãng ye. B sẽn pids b yondã n sa tɩ b loog n zãag bilfu, a Zozɛf tʋma a sõgen dãmbã tɩ b babs-⁠ba. Sõgen dãmbã sẽn ta b nengẽ wã, b yeel-⁠b-⁠la woto: ‘Bõe yĩng tɩ yãmb zuk tõnd zu-​soabã wanzuri wũmblã?’

La a Zozɛf kẽem dãmbã yeela woto: ‘Tõnd pa zuk bũmb ye. Yãmb sã n vaees n yã-a tõnd nin-⁠yend yolgẽ fãa, bɩ y kʋ a soaba.’

Sõgen dãmbã vaeesa yondã fãa n tɩ yã wũmblã a Bẽnzame yolgã pʋgẽ. Sõgen dãmbã yeel-⁠b lame yaa: ‘Bɩ neb a taabã looge, tɩ tõnd na n talla a Bẽnzame n lebe.’ A Zozɛf kẽem dãmbã na n maana wãn masã?

B fãa tũu a Bẽnzame n leb a Zozɛf nengẽ. B sẽn ta wã, a Zozɛf yeel-⁠b lame t’a Bẽnzame na n paame n lebg yẽ yamba, la tɩ bãmb tõe n kulame.

La a Zida yeela woto: ‘Mam sã n lebg n kul n pa tall biigã, mam ba wã na n kiime, bala a nong-⁠a-⁠la wʋsgo. Yaa rẽ yĩng la mam kot yãmb masã tɩ y bas tɩ mam pa ka n yɩ yãmb yamba, la y bas tɩ biigã tũ a kẽem dãmbã n kuli.’

A Zozɛf bãngame masã t’a kẽem dãmbã toeema zʋgo. B lebga nin-​sõma. D ges a Zozɛf sẽn na n maan bũmb ning masã.

A ZOZƐF ra pa le tõe n yõk a meng ye. A mak n kong n yeela a sõgen dãmbã fãa tɩ b yi. A sõgen dãmbã sẽn yi n bas yẽ ne a ba-​biisã, a sɩnga yãbre. A ba-​biisã yɛɛsame, bala b pa mi bũmb ning sẽn kɩt t’a yãbdã ye. A Zozɛf wa n baas n yeel-⁠b lame yaa: ‘Yaa maam la a Zozɛfe. M ba wã ket n vɩɩme bɩ?’

La a ba-​biisã ra pa tõe n leok ye. B yɛɛsa wʋsgo. La a Zozɛf yeel-⁠b lame yaa: ‘Wa-⁠y n kolg-⁠y ka.’ La b sẽn kolgã, a yeel-⁠b lame yaa: ‘Mam yaa yãmb yao a Zozɛf yãmb sẽn koos tɩ b tall n wa Ezipt tẽngã.’

‘La masã, ra ning-⁠y y meng taale, yãmb sẽn koos maam tɩ b tall maam n wa ka wã yĩng ye. Tɩ bõe, yaa Wẽnnaam n tʋm maam Ezipti, tɩ m wa fãag nebã vɩɩm. A Faraõ kɩtame tɩ mam lebg Ezipt soolmã fãa taoor soaba. Masã, bɩ y leb m ba wã nengẽ tao-​tao n tɩ togs-⁠a mam sẽn yeel yãmb bũmb ningã fãa, la y yeel-⁠a t’a wa zĩnd Ezipt ka.’

Rẽ poore, a Zozɛf mobga a ba-​biisã fãa sõma n mok-⁠ba. A Faraõ sẽn wʋm t’a Zozɛf ba-​biisã waame wã, a yeela a Zozɛf yaa: ‘Yeel bãmb tɩ b rɩk sarɛt rãmb n tɩ rɩk b kom-​bõonegã ne b pagbã, la b tall b ba wã n wa. Mam na n baoa zĩ-sõng Ezipt tẽngã pʋgẽ n kõ-ba.’

A Zozɛf ba-​biisã sɩd maana woto. Ges-⁠y fotã zugu. Yãmb pa ne a Zakoob ne a zaka rãmb sẽn wat Ezipt t’a Zozɛf seg-⁠b n mobg a ba wã sɩda?

A Zakoob zakã rãmb lebga wʋsgo. A Zakoob ne a kambã la a yagensã fãa ra yaa neb 70, pagbã la tʋm-​tʋmdbã toor sẽn ka be. B fãa tɩ zĩnda Ezipti. B wa n boond-⁠b lame tɩ Israɛll neba, bala Wẽnnaam toeema a Zakoob yʋʋrã tɩ lebg Israɛlle. Wa d sẽn na n yã taoorã, Wẽnnaam yãka Israɛll nin-​buiidã tɩ yaa a neba.