RAP nins sẽn yasã modgda nebã tɩ b tʋmdẽ. Yãmb pa ne rao a yembrã sẽn pãbd tʋm-​tʋmd a ye ne sãbsg sɩda? Tʋm-​tʋmdbã yaa Israɛll nebã. Yaa a Zakoob yagense. Neb nins sẽn modgd-⁠b tɩ b tʋmdẽ wã yaa Ezipt neba. Israɛll nebã lebga Ezipt nebã yembse. La maana wãn tɩ wa lebg woto?

A Zakoob zakã rãmb ra vɩɩ sõma Ezipti. A Zozɛf sẽn da yaa nin-​kãseng Eziptã, a ra geta b yelle. La a Zozɛf sẽn wa n ki tɩ Faraõ ning sẽn yaa na-​sõngã me ki wã, bõe n maane? Faraõ a to n deeg naamã, la a ra pa nong Israɛll nebã ye.

Yaa Faraõ wẽngã n kɩt tɩ Israɛll nebã lebg yembse. A yãka nin-​toos tɩ b get Israɛll nebã tʋʋmã yelle. Nin-​toosã ra modgda Israɛll nebã tɩ b tʋmd wʋsg-​wʋsgo. B modgd-⁠b lame tɩ b met ro-​bɛd wʋsg n kõt a Faraõ. Ne rẽ fãa, Israɛll nebã ra lebgda wʋsg n paasdẽ. Ezipt nebã ra pa rat tɩ Israɛll nebã wa lebg wʋsg n paam pãng n yɩɩg-⁠b ye.

Yãmb mii a Faraõ sẽn maan bũmb ning bɩ? A yeela Israɛll pʋg-​roagsdbã tɩ b sã n dogs Israɛll ned pag tɩ yaa bi-​ribla, bɩ b kʋ bi-​pɛɛlgã. La pʋg-​roagsdbã ra yaa nin-​sõma. B pa sak n kʋ kom-​peelsã ye.

A Faraõ sẽn bãng rẽ wã, a yeela a nebã yaa: ‘Kʋ-⁠y Israɛll kom-​peels nins fãa sẽn yaa kom-​dibli wã, la y bas kom-​pugli wã.’ A sẽn yeel tɩ b maan bũmb ningã yaa wẽng wʋsgo! La bi-​pɛɛlg a ye n paam n põse. D ges sẽn yɩ to-⁠to.

YÃMB nee bi-​pɛɛlg ning sẽn gãd pagã nugã n yãbdã bɩ? Yaa a Moiizi. Yãmb mii pʋg-⁠ne-​kãngã sẽn yaa ned ning bɩ? Yaa Ezipt naab a Faraõ bi-​pugla.

A Moiiz ma wã solg-⁠a lame hal t’a wa paam kiis a tãabo. A ra pa rat tɩ Ezipt nebã kʋ-⁠a ye. La a sẽn da mi tɩ b na n wa baas n yãa a biigã yĩnga, a maana bũmb n na n kogl-⁠a sẽn na yɩl tɩ b ra kʋ-⁠a ye.

A rɩka peoog n maneg sõma tɩ koom pa tõe n kẽ ye. A sagla a Moiiz peoogã pʋga, n yaool n dɩk peoogã n tɩ rɩgl Nill kʋɩlgã noore, moodã sʋka. A yeela a Moiiz kẽem a Miryam t’a yaas be sɛɛg n ges bũmb ning sẽn na n maane.

A Faraõ bi-​puglã waa Nill kʋɩlgẽ wã n na n so, n yã peoogã sẽn be moodã sʋka. A yeela a yemb-​poak a ye t’a tɩ rɩk peoogã n wa kõ-a. A Faraõ bi-​puglã sẽn fõk peoogã, a yãame tɩ yaa bi-​pɛɛlg sẽn yaa neer n sag be. Ra yaa a Moiizi. A ra yãbdame. A nimbãanegã yõka bi-​puglã, t’a ra pa rat tɩ b kʋ-⁠a ye.

A Miryam sẽn yã rẽ wã, a kolgame. Yãmb pa ne-⁠a fotã zug sɩda? A Miryam soka a Faraõ bi-​puglã yaa: ‘Yãmb datame tɩ mam tɩ bool Israɛll pag a yembr t’a wa reeg biigã n yẽsem n kõ-y bɩ?’

A Faraõ bi-​puglã leokame t’a kẽng n tɩ bool pag t’a wa.

A Miryam wudga tao-​tao n tɩ bool a ma. A Moiiz ma wã sẽn wa n ta, a Faraõ bi-​puglã yeel-⁠a lame t’a reeg biigã n yẽsm-⁠a la a ges a yell t’a na n yao-⁠a lame.

A Moiiz ma wã sɩd gesa a biigã yelle. A Moiiz sẽn wa n lebg bedr bilfu, a ma tall-⁠a lame n tɩ kɩs a Faraõ bi-​puglã, t’a wub-⁠a wa a meng biiga. A Moiiz bɩɩ a Faraõ zakẽ wã.