YÃMB nee bi-​pɛɛlg ning sẽn gãd pagã nugã n yãbdã bɩ? Yaa a Moiizi. Yãmb mii pʋg-⁠ne-​kãngã sẽn yaa ned ning bɩ? Yaa Ezipt naab a Faraõ bi-​pugla.

A Moiiz ma wã solg-⁠a lame hal t’a wa paam kiis a tãabo. A ra pa rat tɩ Ezipt nebã kʋ-⁠a ye. La a sẽn da mi tɩ b na n wa baas n yãa a biigã yĩnga, a maana bũmb n na n kogl-⁠a sẽn na yɩl tɩ b ra kʋ-⁠a ye.

A rɩka peoog n maneg sõma tɩ koom pa tõe n kẽ ye. A sagla a Moiiz peoogã pʋga, n yaool n dɩk peoogã n tɩ rɩgl Nill kʋɩlgã noore, moodã sʋka. A yeela a Moiiz kẽem a Miryam t’a yaas be sɛɛg n ges bũmb ning sẽn na n maane.

A Faraõ bi-​puglã waa Nill kʋɩlgẽ wã n na n so, n yã peoogã sẽn be moodã sʋka. A yeela a yemb-​poak a ye t’a tɩ rɩk peoogã n wa kõ-a. A Faraõ bi-​puglã sẽn fõk peoogã, a yãame tɩ yaa bi-​pɛɛlg sẽn yaa neer n sag be. Ra yaa a Moiizi. A ra yãbdame. A nimbãanegã yõka bi-​puglã, t’a ra pa rat tɩ b kʋ-⁠a ye.

A Miryam sẽn yã rẽ wã, a kolgame. Yãmb pa ne-⁠a fotã zug sɩda? A Miryam soka a Faraõ bi-​puglã yaa: ‘Yãmb datame tɩ mam tɩ bool Israɛll pag a yembr t’a wa reeg biigã n yẽsem n kõ-y bɩ?’

A Faraõ bi-​puglã leokame t’a kẽng n tɩ bool pag t’a wa.

A Miryam wudga tao-​tao n tɩ bool a ma. A Moiiz ma wã sẽn wa n ta, a Faraõ bi-​puglã yeel-⁠a lame t’a reeg biigã n yẽsm-⁠a la a ges a yell t’a na n yao-⁠a lame.

A Moiiz ma wã sɩd gesa a biigã yelle. A Moiiz sẽn wa n lebg bedr bilfu, a ma tall-⁠a lame n tɩ kɩs a Faraõ bi-​puglã, t’a wub-⁠a wa a meng biiga. A Moiiz bɩɩ a Faraõ zakẽ wã.

YÃMB nee rapã sẽn digd a Moiiz t’a zoet n yit Eziptã bɩ? Bõe yĩng tɩ b rat n kʋ a Moiizi? Bɩ d naag taab n gese.

A Moiiz bɩɩ Ezipt naab a Faraõ zakẽ wã. A lebga nin-​kãseng sẽn tar yam wʋsgo. A Moiiz ra miime t’a yaa Israɛll neda, la t’a pa Ezipt ned ye. A roagdbã meng-​meng ra yaa Israɛll neb sẽn yaa yembse.

A Moiiz sẽn wa n ta yʋʋm 40, a yika raar a ye n kẽng n na n tɩ ges a buudã neba. A yãame tɩ b ra namsd-⁠b-⁠la hal wʋsgo. A yãa Ezipt ned sẽn da pãbd Israɛll neda. A sẽn wẽnemd goabg la rɩtg n mik tɩ ned pa getã, a pãba Ezipt nedã n kʋ, n bus-⁠a bĩisrã pʋgẽ.

Vẽkembeoogã yɛsa, a tɩ gesa a buudã neba. A ra tẽedame t’a tõe n yiis-⁠b-⁠la yembdã pʋgẽ. La a yãa Israɛll neb a yiib sẽn da zabd taab t’a yeel sẽn da pa tar-⁠a bʋʋmã yaa: ‘Yaa bõe tɩ fo pãbd f saam-​biigã?’

Tɩ raoã leok yaa: ‘Ãnda n kõ foo noor tɩ f soog tõnd la f yɩ tõnd bʋ-​kaooda? Fo rat n kʋʋ maam wa fo sẽn kʋ Ezipt nedã bɩ?’

A sẽn gom woto wã a Moiiz yɛɛsame. A bãngame tɩ nebã ra miime t’a kʋʋ Ezipt neda. A Faraõ meng bãngame hal n tʋm neb tɩ b tɩ kʋ a Moiizi. Yaa rẽ yĩng la a Moiiz sẽn zoet n yit Eziptã.

A Moiiz sẽn yi Eziptã, a zoe n kẽnga hal Madiã. A tɩ zĩnda a Zetro zakẽ wã, n kẽ kãadem ne a Zetro bi-​pugl a ye sẽn boond t’a Zipora. A Moiiz lebga pe-​kɩɩma. Yẽ n get a Zetro piisã yelle. A zĩnda Madiã yʋʋm 40. Dẽnd a tara yʋʋm 80 masã. Raar a yembre, a sẽn wa n tall a Zetro piisã n kẽng weoogẽ wã, a yãa bũmb a sẽn zɩ n yã. Wakat kãng tɛk la yɛl wʋsg na n toeem a vɩɩmã pʋgẽ. D ges bũmb ning a sẽn yã weoogẽ wã.