DAAR a yembre, a Moiiz talla a piisã n kẽng hal Horɛb tãngẽ wã tɩ b na n tɩ wãb yamdo. A sẽn ta tãngã sɛɛga, a yãa tuug sẽn wit bugum, n yaool n pa rɩtẽ ye.

A Moiiz yeelame yaa: ‘Mam zɩ n yã yãoã ye. M na n kolg n gesame.’ La a sẽn yeel t’a na n kolgã bala, koɛɛg n yi tuugã pʋgẽ n yeel-⁠a yaa: ‘Ra kolg ka ye. Piid f neooda wã, bala zĩig ning fo sẽn yasa yaa zĩ-sõngo.’ Yaa Wẽnnaam n da kɩt tɩ malɛk gomda. A Moiiz pila a nengã.

Wẽnnaam kɩtame tɩ malɛkã le yeel a Moiiz yaa: ‘Mam yãa m nebã sẽn be Eziptã namsgo. Mam na n tʋma foo tɩ f tɩ yiis-⁠b Ezipt soolmã pʋgẽ.’ A Zeova rat n talla a nin-​buiidã tɩ b tɩ zĩnd Kanaã sẽn yaa tẽn-​neerã pʋgẽ.

La a Moiiz leokame yaa: ‘Maam la ãnd n na n tɩ yiis Israɛll nebã Ezipt soolmã pʋgẽ? La mam sã n kẽng Israɛll nebã nengẽ n na n tɩ yiis-⁠b tɩ b sok maam tɩ ãnd n tʋm maam, m na n leokame tɩ bõe?’

Wẽnnaam leok-⁠a lame t’a tɩ yeel Israɛll nebã woto: ‘A ZEOVA sẽn yaa a Abrahaam ne a Izaak la a Zakoob Wẽnnaamã n tʋm maam yãmb nengẽ.’ A Zeova paasa woto: ‘Yãoã na n yɩɩ mam yʋʋr wakat fãa.’

T’a Moiiz yeel yaa: ‘La mam sã n tɩ yeel-⁠b tɩ foo n tʋm maam tɩ b ka tẽeda?’

Wẽnnaam lebg n soka a Moiiz yaa: ‘Bõe la fo sẽn zãadã?’

T’a Moiiz leok tɩ yaa rasaare.

Tɩ Wẽnnaam yeel-⁠a t’a lob rasaarã tẽnga. A Moiiz loba rasaarã tẽnga, tɩ lebg waafo. A Zeova wilga a Moiiz yel-​solemd a to. A yeel-⁠a lame t’a sui a nugã a fuugã pʋgẽ. A Moiiz sẽn sui a nugã a fuugã pʋgẽ n lebg n yiisã, lebga wa wãood n tar-⁠a. A Zeova leb n kõo a Moiiz tõogo, t’a na n tɩ tõog n maan yel-​solemd a to n paase. Rẽ poore, a yeela a Moiiz yaa: ‘Fo sã n maan woto fãa, Israɛll nebã na n tẽeme tɩ maam n tʋm foo.’

A Moiiz sẽn kul yirã a yeela a Zetro yaa: ‘M bõosda sor n tɩ ges m buudã neb sẽn be Eziptã.’ A Zetro pʋʋsa a Moiiz wẽnd na n sik-⁠a laafɩ, t’a Moiiz rɩk sor n na n leb Ezipti.

A MOIIZ sẽn ta Eziptã, a togsa a kẽem a Aarõ Wẽnnaam sẽn maan yel-​soalem nins fãa n wilg-⁠a wã. A Moiiz ne a Aarõ maana yel-​soalmã n wilg Israɛll nebã, tɩ b fãa tẽ tɩ yaa a Zeova n sɩd tʋm-⁠ba.

A Moiiz ne a Aarõ kẽnga a Faraõ nengẽ n tɩ yeel-⁠a yaa: ‘Israɛll Wẽnnaam a Zeova yeelame tɩ f bas a nebã tɩ b kẽng weoogẽ wã n tɩ maan kibs n waoog-⁠a rasem a tãabo.’ La a Faraõ leokame yaa: ‘Mam ka mi a Zeova ye. M ka na n bas Israɛll nebã tɩ b loog ye.’

A Faraõ sũurã puugame, bala Israɛll nebã da rat n basa b tʋʋmã n tɩ waoog a Zeova. A modg-⁠b lame tɩ b tʋm wʋsg n paase. Israɛll nebã yeelame tɩ yaa a Moiiz n kɩt tɩ b namsd-⁠b woto. Rẽ sãama a Moiiz sũurã. La a Zeova yeela a Moiiz t’a ra sãam a sũur t’a na n modga a Faraõ t’a bas a nebã tɩ b looge.

A Moiiz ne a Aarõ kẽnga a Faraõ nengẽ yɛsa. La so-​kãnga, b maana yel-​solemde. A Aarõ loba a rasaarã tẽng tɩ lebg waafo. A Faraõ bag-​bʋgdbã me loba b rasabã tẽng tɩ lebg wiisi. La a Aarõ waafã vela bag-​bʋgdbã wiisã. Baasg zãnga, a Faraõ ka bas Israɛll nebã tɩ b loog ye.

Masã, a Zeova na n wilga a Faraõ yam. Yãmb mii a sẽn maan bũmb ning bɩ? A kɩtame tɩ yel-​beed 10 paam Ezipt nebã.

Yel-​beed sã n wa fãa, a Faraõ boonda a Moiiz n yeel-⁠a yaa: ‘Fo sã n kɩt tɩ yel-​beedã looge, m na n basa Israɛll nebã tɩ b looge.’ La yel-​beedã sã n loog fãa, a Faraõ toeemda yam. A pa basd Israɛll nebã tɩ b loog ye. La yel-​beed 10 soabã poore, a Faraõ basa Israɛll nebã tɩ b na n looge.

Yãmb mii yel-​beed 10 fãa sẽn yaa b rãmb bɩ? Lak-⁠y seb-​neng ning sẽn pʋgdã tɩ y na bãnge.