A MOIIZ sẽn ta Eziptã, a togsa a kẽem a Aarõ Wẽnnaam sẽn maan yel-​soalem nins fãa n wilg-⁠a wã. A Moiiz ne a Aarõ maana yel-​soalmã n wilg Israɛll nebã, tɩ b fãa tẽ tɩ yaa a Zeova n sɩd tʋm-⁠ba.

A Moiiz ne a Aarõ kẽnga a Faraõ nengẽ n tɩ yeel-⁠a yaa: ‘Israɛll Wẽnnaam a Zeova yeelame tɩ f bas a nebã tɩ b kẽng weoogẽ wã n tɩ maan kibs n waoog-⁠a rasem a tãabo.’ La a Faraõ leokame yaa: ‘Mam ka mi a Zeova ye. M ka na n bas Israɛll nebã tɩ b loog ye.’

A Faraõ sũurã puugame, bala Israɛll nebã da rat n basa b tʋʋmã n tɩ waoog a Zeova. A modg-⁠b lame tɩ b tʋm wʋsg n paase. Israɛll nebã yeelame tɩ yaa a Moiiz n kɩt tɩ b namsd-⁠b woto. Rẽ sãama a Moiiz sũurã. La a Zeova yeela a Moiiz t’a ra sãam a sũur t’a na n modga a Faraõ t’a bas a nebã tɩ b looge.

A Moiiz ne a Aarõ kẽnga a Faraõ nengẽ yɛsa. La so-​kãnga, b maana yel-​solemde. A Aarõ loba a rasaarã tẽng tɩ lebg waafo. A Faraõ bag-​bʋgdbã me loba b rasabã tẽng tɩ lebg wiisi. La a Aarõ waafã vela bag-​bʋgdbã wiisã. Baasg zãnga, a Faraõ ka bas Israɛll nebã tɩ b loog ye.

Masã, a Zeova na n wilga a Faraõ yam. Yãmb mii a sẽn maan bũmb ning bɩ? A kɩtame tɩ yel-​beed 10 paam Ezipt nebã.

Yel-​beed sã n wa fãa, a Faraõ boonda a Moiiz n yeel-⁠a yaa: ‘Fo sã n kɩt tɩ yel-​beedã looge, m na n basa Israɛll nebã tɩ b looge.’ La yel-​beedã sã n loog fãa, a Faraõ toeemda yam. A pa basd Israɛll nebã tɩ b loog ye. La yel-​beed 10 soabã poore, a Faraõ basa Israɛll nebã tɩ b na n looge.

Yãmb mii yel-​beed 10 fãa sẽn yaa b rãmb bɩ? Lak-⁠y seb-​neng ning sẽn pʋgdã tɩ y na bãnge.

GES-⁠Y foto rãmbã. Yaa yel-​beed piig nins a Zeova sẽn kɩt tɩ paam Ezipt nebã la woto. Pipi fotã zugu, a Aarõ rɩka a rasaarã n wẽ Nill kʋɩlgã koomã tɩ lebg zɩɩm. Zĩmã kiime n põog tɩ koomã lebg yũugu.

A Zeova kɩtame me tɩ loms yi Nill kʋɩlgã pʋgẽ n kẽ tẽngã. Lomsã ra bee zĩig fãa. B ra bee Ezipt nebã wʋmsẽ wã, b laasẽ wã la b gãasã zutu. Lomsã kiime tɩ Ezipt nebã wʋk-⁠b wʋsg n zame. B põogame tɩ tẽngã fãa lebg yũugu.

A Aarõ leb n dɩka a rasaarã n wẽ tẽngã tɩ tomã lebg rũmpigli n wãbd Ezipt tẽngã neb fãa. Woto n yɩ yel-​beed a tãab-⁠n-​soabã.

Yel-​beed a tãabã fãa paama Ezipt nebã ne Israɛll nebã. La yel-​beed a taabã paama Ezipt nebã bala. Yel-​beed a naas-⁠n-​soabã yɩɩ nag-​zõos wʋsg n kẽ Ezipt nebã fãa rot pʋsẽ. Nu soabã paama rũmsã. Ezipt nebã niisi, b bõense, b piis la bʋʋs wʋsg n ki.

Rẽ poore, a Moiiz ne a Aarõ wʋka tom-​pɛglem n fãeeg tɩ ninsaalbã ne rũmsã fãa yĩns lebg nod-​tãoodense. Yaa yel-​beed a yoob-⁠n-​soabã la rẽ.

Yopoe soabã, a Moiiz tẽega a nugã yĩngr t’a Zeova kɩt tɩ saagã tãsdẽ la a yãgda, tɩ sapɩlem rʋʋgdẽ. B ra nan zɩ n yã sapɩlem a woto buud Ezipt soolmã pʋgẽ ye.

Nii soabã yɩɩ sʋy wʋsg sẽn wa n dɩ sapɩlmã sẽn pa sãam bũmb ningã. Sʋy ra nan zɩ n yɩ wʋsg woto ye. A buud me pa le zĩnd ye.

Yel-​beed a wɛ soabã yɩɩ lika. Ezipt nebã zĩnda lik bida pʋgẽ rasem a tãabo, tɩ Israɛll nebã sẽn da beẽ wã yaool n da tar vẽenem.

Sẽn na n baase, Wẽnnaam yeela a nin-​buiidã tɩ b kodg bull bɩ pe-​bil n yãk a zɩɩmã n bol b rig-​noyã. Rẽ poore, Wẽnnaam kɩtame t’a malɛk a ye pɩʋʋg Ezipt tẽngã pʋgẽ. Malɛkã sã n pɩʋʋg n yã zɩɩm sẽn taag rig-​noore, a pa kʋʋd ro-​kãng ned ye. La zɩɩmã sẽn pa taag rig-​noor ning fãa, a kʋʋda nebã kom-​dẽemsã la rũng fãa pipi biig sẽn be zag-​kãng pʋgẽ wã. Yaa yel-​beed piig soabã la rẽ.

Yel-⁠be-​kãngã poore, a Faraõ yeela Israɛll nebã tɩ b looge. Wẽnnaam nin-​buiidã ra zoe n segla b mens n sa. Yʋn-​kãng bal la b yi Ezipti.