ISRAƐLL nebã sẽn yi Eziptã kiis a yiib loogr poore, b taa Sinayi tãngẽ wã b sẽn boond me tɩ Horɛbã. Yaa be la a Zeova sẽn gom ne a Moiiz tuugã pʋgẽ wã. Israɛll nebã zĩnda be wakat bilfu.

Israɛll nebã paa tãnga sɛɛga, t’a Moiiz rʋ tãngã. A Moiiz sẽn ta tãngã zugã, a Zeova yeel-⁠a lame t’a ratame tɩ Israɛll nebã sak a noyã la b lebg a nin-​buiidu. A Moiiz sẽn sigã, a togsa Israɛll nebã a Zeova sẽn yeel bũmb ningã. Israɛll nebã yeelame tɩ b na n saka a Zeova noyã, bala b ratame n lebg a nin-​buiidu.

Rẽ poore, a Zeova maana yel-​solemde. A kɩtame tɩ bug-​zõos yit tãngã zugu, la a kɩt tɩ saagã tãsdẽ. Sasa kãnga, a yeel-⁠b-⁠la woto: ‘Mam yaa a Zeova, mam yaa yãmb Wẽnnaam, la yaa maam n yiis yãmb Ezipti.’ La a kõo bãmb no-​kãngã: ‘Ra pʋʋs-⁠y wẽnnaam dãmb a taab ye, sã n ka maam bala.’

Wẽnnaam kõo Israɛll nebã noy a wɛ n paase. Rabeem yõka nebã tɩ b yeel a Moiiz yaa: ‘Tõnd ratame tɩ fo gomd ne tõndo, bala Wẽnnaam sã n gomd ne tõndo, d yɛɛsda d na n wa ki.’

Rẽ poore, a Zeova yeela a Moiiz yaa: ‘Rʋ tãngã n kolg maam n yaas be. M na n kõ-f-⁠la kug-​wals sẽn tar mam noyã mam sẽn gʋls n dat tɩ nebã tũ wã.’ A Moiiz leb n dʋʋ tãngã zug n pa be rasem 40.

Wẽnnaam kɩtame t’a Moiiz gʋls noy wʋsg n na n kõ Israɛll nebã. A leb n kõo a Moiiz kug-​wals a yiibã. Yaa kug-​wals a yiibã zut la Wẽnnaam meng gʋls noy 10 nins a sẽn da togs Israɛll nebã. B boonda no-​kãensã tɩ noy piigã.

Noy piigã yaa noy sẽn yaa kãsems la sẽn tar yõod wʋsgo. Noy a taab me la Wẽnnaam kõ Israɛll nebã. Bãmb me tara yõodo. Wala makre, noor a ye n yet woto: ‘Nong a Zeova fo Wẽnnaam ne f sũur fãa, ne f yamã fãa, ne f sɩɩgã fãa, la ne f pãngã fãa.’ T’a to yet woto: ‘Nong f to wa f menga.’ Wẽnnaam biig a Zezi Kirist yeelame tɩ noy nins a Zeova sẽn kõ Israɛll nebã sʋka, no-​kãensã b yiibã n yaa kãsems n yɩɩda. D na n wa goma Wẽnnaam biigã yelle, la a sẽn zãms nebã bũmb ningã me yelle.

KAETO, ges-⁠y nebã sẽn maand bũmb ningã! B pʋʋsda nag-​bila. Bõe yĩng tɩ b maand woto?

A Moiiz sẽn dʋ tãngã zug n kaoosd n pa sigdã yĩnga, nebã yeelame yaa: ‘Wa-⁠y tɩ d maan wẽnnaam t’a lʋɩ d taoor n yiis-⁠d ka, bala tõnd ka mi bũmb ning sẽn maan a Moiiz ye.’

A Moiiz kẽem a Aarõ yeel-⁠b lame yaa: ‘Bɩ y yãgs y sãnem tʋb-​londã n kõ-ma.’ A Aarõ reega sãnem tʋb-​londã n maan nag-​bila. Rẽ poore, nebã yeelame yaa: ‘Yãoã yaa tõnd Wẽnnaam sẽn yiis tõnd Ezipt tẽngã.’ Israɛll nebã maana kibs kãseng n waoog sãnem nag-​bilã.

A Zeova sẽn yã rẽ wã, a sũurã yikame t’a yeel a Moiiz yaa: ‘Kẽng n sig tao-​tao tɩ nebã maanda sẽn yaa wẽnga. B basa mam noyã n wõgemd sãnem nag-​bil taoore.’

A Moiiz yɩɩ tao-​tao n sigi. A sẽn wa n kolgdẽ wã, a yãa nebã sẽn yɩɩnd la b saood n gilgd sãnem nag-​bilã. A Moiiz sũurã puuga wʋsg t’a rɩk kug-​wals nins Wẽnnaam sẽn da kõ-a wã n lob tẽng tɩ kell n wã zõg-​zõge. A rɩka sãnem nag-​bilã me n yẽneg n sãam-⁠a zãng-​zãnga.

Nebã sẽn da maand bũmb ningã yaa wẽng wʋsgo. Rẽ n so t’a Moiiz yeel rap kẽer tɩ b rɩk b sʋʋsã n kʋ neb nins sẽn da waoog sãnem nag-​bilã. Neb tus a tãab n ki baraarã. Kiba-​kãngã wilgdame tɩ d segd n waooga Wẽnnaam a Zeova a ye tãa. Bala sẽn ket-​bã fãa pa wẽnnaam dãmb sɩd-​sɩd ye.