GES-⁠Y rasaar sẽn ning puud la sẽn wom biisi. Yaa a Aarõ rasaare. A toba vãad n ning puud n wẽneg n wom biis yʋng a ye bala. Bɩ d ges bũmb ning sẽn kɩt tɩ woto maanã.

Israɛll nebã sẽn sɩng n yeebd rasempʋɩɩgã pʋgẽ wã kaoosa bilf masã. B neb kẽer n pa tẽed t’a Moiiz n segd n lʋɩ b taoore, la t’a Aarõ n segd n yɩ maan-​kʋʋdbã kãsem ye. Yaa a Koore, a Datã, a Abiram la Israɛll nin-​kãsems kobs-⁠yi la pis-⁠nu wã n tagsd woto. B naaga taab n wa yeel a Moiiz yaa: ‘Fo zẽkda f meng wʋsgo.’

A Moiiz yeela a Koore ne a nebã yaa: ‘Beoog yibeoogo, bɩ y rɩk wisd yõogr laas n ning wisd n wa a Zeova sɛk-​roogẽ wã, tɩ d ges a Zeova sẽn na n yãk ned ninga.’

Beoogã sẽn vẽege, a Koore ne a neb 250 waa sɛk-​roogẽ wã. Neb wʋsg me n tũ n wa n na n sõng-⁠ba. A Zeova sũurã puuga wʋsgo. A Moiiz yeela nebã yaa: ‘Bɩ y zãag ne nin-​wẽn-​kãensã roto, la y ra sɩɩs b bũmb ba a yembr ye.’ Nebã kelga a Moiiz n zãag ne a Koore, a Datã la a Abiram dãmb fu-​rotã.

Rẽ poore, a Moiiz yeela woto: ‘Ad bũmb ninga sẽn na n wilg a Zeova sẽn yãk ned ninga. Tẽngã na n yaaga a noor n vel nin-​wẽn-​kãensã.’

A Moiiz sẽn gom n sa wã bal la tẽngã sẽn pãrge, t’a Koore zakã neb ne b teedã fãa, n paas a Datã ne a Abiram la neb nins fãa sẽn da be ne-​bã sʋʋg be. Nebã sẽn wʋm tẽngã sẽn vel-⁠b rãmbã kelemsã, bãmb me kelemame n yeel yaa: ‘D zoe tɩ tẽngã tõe n vela tõnd me.’

La a Koore ne a neb kobs-⁠yi la pis-⁠nu wã ra ket n bee sɛk-​roogã sɛɛgẽ. A Zeova kɩtame tɩ bugum sig n dɩ-⁠ba. Rẽ poore, a yeela a Aarõ biig a Eleazaar t’a rɩk a Koore ne a nebã wisd laas n kud tɩ lebg paklga, n dɩk n tabl tẽn-​kugrã. Woto ra na n tẽegda Israɛll nebã tɩ yaa a Aarõ ne a kom-​dibli wã bal n segd n yɩ a Zeova maan-​kʋʋdba.

A Zeova ra ratame n maan bũmb a to n wilg nebã vẽeneg tɩ yaa a Aarõ ne a kom-​dibli wã bal la yẽ yãk-​yã. A yeela a Moiiz yaa: ‘Kɩt tɩ buud piig la a yiibã naab fãa wa ne rasaare. A Aarõ na n waa ne rasaar Levi buudã yĩnga. Bɩ f bĩng rasabã kãabg koglgã taoore, sɛk-​roogã pʋgẽ. Mam sẽn yãk a soab t’a yɩ maan-​kʋʋdã rasaar na n tobame.’

A Moiiz sẽn yik vẽkembeoogã yibeoogo, a mikame t’a Aarõ rasaarã ninga puud la a wom biisi. Yãmb mii bũmb ning sẽn kɩt t’a Zeova maan t’a Aarõ rasaarã ning puudã masã bɩ?

MAANA yʋʋm 39 tɩ Israɛll nebã ket n gilgd rasempʋɩɩgẽ wã. Yʋʋm kãensã fãa pʋgẽ, a Zeova gesa b yelle. A kõ-b-⁠la maanã tɩ b rɩ. Wĩndga, a kɩtdame tɩ sawad-​taok lʋɩ b taoor n yãagd-⁠ba. La yʋngo, sawad-​taokã lebgda bugum n kõt-⁠b vẽenem. La yʋʋmã fãa pʋsẽ, b futã ka ki, b naoã ka mod me.

Israɛll nebã sẽn yi Eziptã taa yʋʋm 40 masã. B yeeba rasempʋɩɩgẽ wã n lebg n wa Kadɛs yɛsa. Yaa be la b sẽn da kɩt tɩ rap 12 wã yi n tɩ ges Kanaã tẽngã sẽn na maan yʋʋm 40 masã wã. A Moiiz kẽem a Miryam kii Kadɛse. La wala d sẽn na n yã wã, yell n maan ka me.

Nebã yẽgmame, bala b ra pa tar koom n na n yũ ye. B yeela a Moiiz yaa: ‘Tõnd sã n da ki n são. Bõe yĩng tɩ fo yiis tõnd Ezipt n wa zĩ-wẽng kãngã pʋgẽ? A ka zĩig ned sẽn tõe n ko la a sel viyn ne grenadin tɩɩs la kankams ye. Koom meng ka be n na n yũ ye.’

A Moiiz ne a Aarõ kẽnga sɛk-​roogẽ wã n tɩ pʋʋs a Zeova t’a yeel-⁠b yaa: ‘Tigm-⁠y nebã pĩ-kãngã taoore, n gom ne pĩigã bãmb nifẽ tɩ koom yi wʋsg tɩ nebã ne b rũmsã fãa paam n yũ.’

La a Moiiz tigma nebã n yeel-⁠b yaa: ‘Tõatbã, kelg-⁠y-​yã. Yãmb datame tɩ maam ne a Aarõ kɩt tɩ koom yi pĩ-kãngã pʋgẽ n kõ yãmb bɩ?’ A Moiiz zẽka a dasaarã n wẽ pĩigã naoor a yiibu. La koom n pusg n yi wʋsg tɩ nebã ne b rũmsã na n paam n yũ.

La a Zeova sũurã puuga ne a Moiiz la ne a Aarõ. Yãmb mii sẽn yaa bũmb ning yĩng bɩ? A Moiiz ne a Aarõ yeelame tɩ yaa bãmb n na n kɩt tɩ koomã yi pĩigã pʋgẽ. Yaool n yaa a Zeova n kɩt tɩ koomã yi. A Moiiz ne a Aarõ sẽn pa togs sɩdã yĩnga, a Zeova yeelame t’a na n sɩbg-⁠b lame. A yeel-⁠b lame tɩ ka bãmb n na n tall Israɛll nebã n kẽes Kanaã tẽngã pʋgẽ ye.

Rẽ poor bilfu, Israɛll nebã yii Kadɛs. Rasem a wãn poore, b taa Hor tãngẽ wã. A Aarõ rʋʋ tãngã zug n ki be. A ra tara yʋʋm koabg la pisi la a tãabo. Israɛll nebã sũur sãamame tɩ b yãb rasem 30. A Aarõ bi-​ribl a Eleazaar n lebg Israɛll maan-​kʋʋdbã kãsma.