MAANA yʋʋm 39 tɩ Israɛll nebã ket n gilgd rasempʋɩɩgẽ wã. Yʋʋm kãensã fãa pʋgẽ, a Zeova gesa b yelle. A kõ-b-⁠la maanã tɩ b rɩ. Wĩndga, a kɩtdame tɩ sawad-​taok lʋɩ b taoor n yãagd-⁠ba. La yʋngo, sawad-​taokã lebgda bugum n kõt-⁠b vẽenem. La yʋʋmã fãa pʋsẽ, b futã ka ki, b naoã ka mod me.

Israɛll nebã sẽn yi Eziptã taa yʋʋm 40 masã. B yeeba rasempʋɩɩgẽ wã n lebg n wa Kadɛs yɛsa. Yaa be la b sẽn da kɩt tɩ rap 12 wã yi n tɩ ges Kanaã tẽngã sẽn na maan yʋʋm 40 masã wã. A Moiiz kẽem a Miryam kii Kadɛse. La wala d sẽn na n yã wã, yell n maan ka me.

Nebã yẽgmame, bala b ra pa tar koom n na n yũ ye. B yeela a Moiiz yaa: ‘Tõnd sã n da ki n são. Bõe yĩng tɩ fo yiis tõnd Ezipt n wa zĩ-wẽng kãngã pʋgẽ? A ka zĩig ned sẽn tõe n ko la a sel viyn ne grenadin tɩɩs la kankams ye. Koom meng ka be n na n yũ ye.’

A Moiiz ne a Aarõ kẽnga sɛk-​roogẽ wã n tɩ pʋʋs a Zeova t’a yeel-⁠b yaa: ‘Tigm-⁠y nebã pĩ-kãngã taoore, n gom ne pĩigã bãmb nifẽ tɩ koom yi wʋsg tɩ nebã ne b rũmsã fãa paam n yũ.’

La a Moiiz tigma nebã n yeel-⁠b yaa: ‘Tõatbã, kelg-⁠y-​yã. Yãmb datame tɩ maam ne a Aarõ kɩt tɩ koom yi pĩ-kãngã pʋgẽ n kõ yãmb bɩ?’ A Moiiz zẽka a dasaarã n wẽ pĩigã naoor a yiibu. La koom n pusg n yi wʋsg tɩ nebã ne b rũmsã na n paam n yũ.

La a Zeova sũurã puuga ne a Moiiz la ne a Aarõ. Yãmb mii sẽn yaa bũmb ning yĩng bɩ? A Moiiz ne a Aarõ yeelame tɩ yaa bãmb n na n kɩt tɩ koomã yi pĩigã pʋgẽ. Yaool n yaa a Zeova n kɩt tɩ koomã yi. A Moiiz ne a Aarõ sẽn pa togs sɩdã yĩnga, a Zeova yeelame t’a na n sɩbg-⁠b lame. A yeel-⁠b lame tɩ ka bãmb n na n tall Israɛll nebã n kẽes Kanaã tẽngã pʋgẽ ye.

Rẽ poor bilfu, Israɛll nebã yii Kadɛs. Rasem a wãn poore, b taa Hor tãngẽ wã. A Aarõ rʋʋ tãngã zug n ki be. A ra tara yʋʋm koabg la pisi la a tãabo. Israɛll nebã sũur sãamame tɩ b yãb rasem 30. A Aarõ bi-​ribl a Eleazaar n lebg Israɛll maan-​kʋʋdbã kãsma.

WAAF ning sẽn vil raoogã pa waaf sɩd-​sɩd ye. B maan-⁠a-⁠la ne zũudu. A Zeova yeela a Moiiz t’a rɩk waaf ning a sẽn maan ne zũudã n vil raoog zugu, tɩ nebã zẽk b nens n ges-⁠a sẽn na yɩl n da ki ye. La wiis nins sẽn be tẽngã yaa wiis sɩd-​sɩda. B kɛɛ nebã tɩ b lebg bãad rãmba. Yãmb mii sẽn yaa bũmb ning yĩng bɩ?

Yaa Israɛll nebã sẽn kɩɩs Wẽnnaam ne a Moiizã yĩnga. B yeelame yaa: ‘Yaa bõe tɩ y yiis tõnd Ezipt tɩ d wa ki weoogã pʋgẽ? Rɩɩb ne koom kae ye. La tõnd yam yii ne mannã.’

Mannã yaool n da yaa rɩ-​noogo. A Zeova maana yel-​solemd tɩ b paam dẽ n dɩtẽ. A ra leb n maana yel-​solemd tɩ b paam koom n na n yũ. La Israɛll nebã ka pʋʋs Wẽnnaam bark rẽ fãa yĩng ye. Rẽ n so t’a Zeova tʋm wag-​toos tɩ b wa kɛ-⁠b tɩ wʋsg ki.

La Israɛll nebã wa n yeela a Moiiz yaa: ‘Tõnd kongame. Bala, tõnd goma a Zeova ne foo wẽnga. Bɩ f pʋʋs a Zeova t’a yiis wag-​toosã tõnd sʋka.’

A Moiiz pʋʋsa nebã yĩnga, t’a Zeova yeel-⁠a t’a maan waaf ne zũud n vil raoog zugu, tɩ waaf sẽn kɛ ned ning fãa bɩ a soab zẽk a neng n gese. A Moiiz maana Wẽnnaam sẽn yeelã. Wiisã sẽn kɛ neb ninsã sã n zẽk b nens n ges waaf sẽn maan ne zũudã bala, b sãoogdame.

Kiba-​kãngã zãmsda tõnd bũmbu. Tõnd me wõnda Israɛll nebã wiisã sẽn da kɛ tɩ b kiidẽ wã. Yãmb sã n gese, nebã bẽedame, n kʋʋndẽ la b kiidẽ. Yaa a Ãdem ne a Hawa sẽn kɩɩs a Zeova noorã tɩ tõnd yaool n yaa b kambã yĩnga. La a Zeova maana bũmb n na n fãag-⁠do.

A Zeova tʋma a biig a Zezi Kirist t’a wa tẽngã zugu. B kaa a Zezi raoog zugu, bala neb wʋsg ra tẽedame t’a pa nin-​sõng ye. La a Zeova tʋma a Zezi t’a wa fãag-⁠do. D sã n sak-⁠a la d tũ-a, d na n paama vɩɩm sẽn ka sate. D na n wa goma rẽ yell n paase.