A MOIIZ da rat n naaga Israɛll nebã n tɩ kẽ Kanaã tẽngã pʋgẽ. A yeela a Zeova woto: ‘Mam kotame tɩ f bas maam tɩ m kẽng n tɩ ges tẽn-​neer ning sẽn be Zʋrdẽ kʋɩlgã poorã.’ La a Zeova leok-⁠a lame yaa: ‘Ra le gom yel-​kãngã yell ne maam ye.’ Yãmb mii bũmb ning sẽn kɩt t’a Zeova yeel woto wã bɩ?

Tẽeg-⁠y t’a Moiiz ne a Aarõ pa yeel Israɛll nebã tɩ yaa a Zeova n kɩt tɩ koomã yi pĩigã pʋgẽ ye. B yeelame tɩ yaa bãmb n maane. Dẽnd b pa waoog a Zeova ye. Yaa rẽ yĩng la a Zeova sẽn yeel tɩ b pa na n kẽ Kanaã tẽngã.

A Aarõ kũumã kiis a wãn poore, a Zeova yeela a Moiiz yaa: ‘Peeg a Zozue n kẽng n tɩ yaas maan-​kʋʋd a Eleazaar la nebã taoore, n yeel-⁠b t’a Zozue n na n lʋɩ b taoor masã.’ Wala yãmb sẽn ne fotã zugã, a Moiiz kell n maana a Zeova sẽn yeel-⁠a bũmb ningã.

Rẽ poore, a Zeova yeela a Zozue yaa: ‘Nang pãnga, keng f sũuri. Tɩ bõe, yaa foo n na n tall Israɛll nebã n kẽ tẽng ninga mam sẽn da wẽen tɩ mam na n kõo bãmbã. La mam bee ne foom.’

Rẽ poore, a Zeova yeela a Moiiz t’a rʋ tãng ning sẽn be Moaab tẽngã pʋgẽ tɩ b boond tɩ Nebo wã zugu. A sẽn dʋ wã, a yãa Kanaã tẽngã sẽn yaa neer to-⁠to wã. A Zeova yeel-⁠a lame yaa: ‘Tẽng ningã mam sẽn da wẽen ne a Abrahaam ne a Izaak la a Zakoob tɩ m na n kõo b yagensã la woto. Mam kɩtame tɩ f yã-a, la f pa na n kẽ a pʋgẽ ye.’

A Moiiz kii Nebo tãngã zugu. Rẽ t’a ra tara yʋʋm koabg la pisi, la a ra ket n tara pãnga, t’a ninã me ket n ne sõma. A Moiiz kũumã sãama nebã sũy wʋsg tɩ b yãbe. La b sẽn paam t’a Zozue na n lʋɩ b taoorã yɩ-⁠b-⁠la noogo.

YELL n pak rap nins sẽn be fotã zugã. B sã n pa zoe, b na n kiime. Rapã yaa Israɛll neba, la pag ning sẽn sõngd-​bã yʋʋr la a Rahaabe. A Rahaab roogã bee Zeriko lalgã zugu. Bɩ d ges yell ning sẽn pak rapã.

Israɛll nebã rat n dʋʋga Zʋrdẽ kʋɩlgã n kẽ Kanaã tẽngã masã. La nananda, a Zozue tʋma rap a yiibã tɩ b tɩ ges Zeriko tẽngã n bãng a sẽn yaa to-⁠to n wa togse.

Rapã sẽn ta Zeriko wã, b kẽnga a Rahaab nengẽ. La ned n yã-b n tɩ togs Zeriko naabã tɩ Israɛll neb n wa baraar yʋngã n na n ges tẽngã. Naabã tʋma neb tɩ b tɩ yeel a Rahaab t’a yiis neb nins sẽn sig a zakẽ wã. La a Rahaab solga rap a yiibã a roogã zug la a yeel naabã neb yaa: ‘Yaa sɩda, neb a yiib n wa mam nengẽ, la mam ka mi b sẽn yi zĩig ning ye. Zĩigã sẽn sobg tɩ b rat n pag kʋɩlensã, rapã soosame n yi. Bɩ y zoe n babs bãmb tao-​tao tɩ y na n paam-⁠b lame.’ Naabã neb sɩd zoeeme n na n babs rap a yiibã.

B loogrã poore, a Rahaab bʋʋga rapã a roogã zug n yeel-⁠b yaa: ‘Mam miime t’a Zeova na n kõo yãmb tẽn-​kãngã. Tõnd wʋma a sẽn kɩt tɩ Mog-​miuugã lebg koɛɛng wakat ning yãmb sẽn yi Ezipt tẽngã. La d wʋma yãmb sẽn kʋ Amoor nanambs a Sihõ ne a Oogã me. La masã, mam kota yãmb tɩ y wẽen tɩ y na n wa maana maam neer wa mam sẽn maan yãmb me neerã. Fãag-⁠y mam ba wã ne m ma wã, la m yapã ne m kẽem dãmbã.’

Rap a yiibã pʋlmame tɩ b na n fãag-⁠b lame, la rẽnda a Rahaab me maan bũmbu. B yeel-⁠a lame yaa: ‘Rɩk wĩ-miu-​kãngã n loe f roogã fenetre, la f bool f ba wã ne f ma wã ne f kẽem dãmbã la f yapã, la f ba wã zakã rãmb fãa tɩ b wa tigim fo nengẽ. Dẽ, tõnd sã n lebg n wa n na n deeg Zeriko tẽngã, d sã n yã wĩirã, d pa na n kʋ neb nins sẽn be fo roogẽ wã ye.’ Rap a yiibã sẽn leb a Zozue nengẽ wã, b togs-⁠a-⁠la bũmb nins sẽn maanã fãa.