BÕE n kɩt tɩ Zeriko lalsã lʋɩtẽ? Wõnda bõmb n lʋɩ b zutu. La wakat kãng tɩ bõmb la bug-​raad meng ka be ye. Dẽnd yaa a Zeova n maan yel-​solemd tɩ lalsã lʋɩtẽ. Bɩ d ges sẽn yɩ to-⁠to.

A Zeova yeela a Zozue yaa: ‘Bɩ foo ne f sodaasã gilg tẽngã vugr daar fãa, tɩ ta rasem a yoobe. Zã-y kãabg koglgã n gilg tẽngã. Bɩ maan-​kʋʋdb a yopoe tall bard a yopoe n lʋɩ kãabg koglgã taoor n peebdẽ.’

‘La rasem a yopoe daarã, bɩ y gilg tẽngã naoor a yopoe. Rẽ poor bɩ maan-​kʋʋdbã peeb bardã wʋsgo, tɩ ned kam fãa zẽk a koɛɛg n kaas wʋsgo, tɩ tẽngã lalsã na n lʋɩɩme.’

A Zozue ne Israɛll nebã maana wa a Zeova sẽn yeelã. Rasem a yoobã fãa b sẽn wa n gilgd tẽngã, ned baa a ye ra pa gomd ye. Ra yaa bardã peebg la kẽnã bʋʋr bal la b wʋmda. Wẽnnaam nebã bɛɛb sẽn da be Zeriko wã segd n yɛɛsame. Yãmb nee wĩ-miuugã sẽn yag fenetrẽ wã bɩ? Yaa ãnd roog fenetre? Yaa a Rahaab. A maana rap a yiibã sẽn yeel-⁠a t’a maanã. A zakã rãmb fãa bee ne-⁠a a roogã pʋgẽ n gũudẽ.

Rasem a yopoe daarã, b sẽn gilg tẽngã naoor a yopoe wã poore, b peeba bardã tɩ sodaasã kaas tɩ lalsã lʋɩ. A Zozue yeela sodaasã yaa: ‘Kʋ-⁠y tẽngã nebã fãa, la y yõog tẽngã la bũmb nins fãa sẽn be a pʋgẽ wã bugum. Tall-⁠y wanzuri wã ne sãnemã la zũudã ne kutã bal n wa a Zeova sɛk-​roogã pʋgẽ, tɩ b bĩng laogã bĩngr zĩigẽ.’

A Zozue yeela rap a yiibã sẽn da wa n ges Zeriko tẽngã tɩ b kẽng a Rahaab roogẽ wã n tɩ yiis yẽ ne a buudã fãa. A Rahaab ne a zakã rãmb põsame, wa rap a yiibã sẽn da pʋlm-⁠a wã.

GES-⁠Y raoã sẽn busd bũmb ning a fu-​roogã pʋgẽ wã! Yaa fu-​neer ne sãnem gilg la wanzuri la a sẽn busdã. A rɩka te-​kãensã Zeriko. La yãmb ket n tẽra b sẽn da segd n maan bũmb ning ne Zeriko teedã bɩ?

B ra segd n yõog-⁠b lame, la b tall sãnemã ne wanzuri wã n wa a Zeova sɛk-​roogã pʋgẽ, tɩ b bĩng laogã bĩngr zĩigẽ. Dẽnd ra-​kãnga ne neb nins sẽn be ne yẽ fotã zugã kɩɩsa Wẽnnaam, bala b zuu a teedo. Raoã yʋʋr la a Akã, la neb a taabã yaa a zakã rãmba. Bɩ d ges bũmb ning sẽn na n maane.

A Akã sẽn zu teedã poore, a Zozue tʋma neb tɩ b tɩ zab ne Ai tẽngã neba. La b ka tõog zabrã ye. Neb kẽer kiime tɩ sẽn kell-​bã lebg n zoe. A Zozue sũurã sãama wʋsg t’a fõgen a neng tẽng n pʋʋs a Zeova n sok-⁠a yaa: ‘Bõe yĩng tɩ fo bas tɩ woto paam tõndo?’

A Zeova leok-⁠a lame yaa: ‘Yiki, Israɛll nebã kongame. B rɩka bũmb nins b sẽn da segd n yõogã, la bũmb ning b sẽn da segd n tall n wa mam sɛk-​roogã pʋgẽ wã. B zuu fu-​neer n solge. Yãmb sã n ka yiis nebã ne bũmb nins bãmb sẽn zuka yãmb sʋka, mam ka na n le zĩnd ne yãmb ye.’ A Zeova yeelame t’a na n wilga a Zozue ned ning sẽn maana woto wã.

A Zozue tigma nin-​buiidã, t’a Zeova yãk a Akã nebã sʋka. A Akã yeela woto: ‘Sɩda, yaa maam n beege. Mam yãa fu-​neer ne sãnem gilg la wanzuri. Bõn yõka maam, tɩ mam dɩk-⁠b n wa bus m fu-​roogã pʋgẽ.’

A Zozue sẽn tʋm tɩ b tɩ wʋk teedã n wa wã poore, a yeela a Akã yaa: ‘Yaa bõe tɩ fo bao yel-​kãngã n kõ tõndo? Rũndã, a Zeova na n kɩtame tɩ toog paam foo.’ A Zozue sẽn gom woto n sa wã, Israɛll nebã fãa loba a Akã ne a zakã rãmb ne kug tɩ b ki. Woto wilgdame tɩ d pa segd n dɩk bũmb d sẽn pa so ye.

Rẽ poore, Israɛll nebã leb n tɩ zaba ne Ai nebã. So-​kãnga, a Zeova sõnga a nin-​buiidã tɩ b tõog zabrã.