GES-⁠Y a Zozue. A gomda ne wĩndgã n yetẽ yaa: ‘Wĩndga, yalse!’ Wĩntoogã sɩd yalsa zug tẽn-​sʋk raarã tõre. Yaa a Zeova n maan woto. D ges bũmb ning sẽn kɩt t’a Zozue ra rat tɩ wĩntoogã yalsã.

Kanaã nanambs a nu wã sẽn wa n naag taab n na n zab ne Gabaõ nebã, Gabaõ nebã tʋma ned t’a tɩ yeel a Zozue yaa: ‘Wa-⁠y tao-​tao n wa fãag-⁠do. Nanambs nins sẽn be tãensã sʋkã tigma taab n dat n zab ne yãmb tʋm-​tʋmdbã.’

Tao-​tao bala, a Zozue ne a sodaasã fãa yikame n na n kẽnge. B kẽna yʋng tõre. B sẽn wa n ta Gabaõ wã, nanambs a nu wã sodaas yɛɛsame n sɩng zoeese. A Zeova kɩtame tɩ sapɩlem bɛd rʋʋg n pãb-⁠b hal tɩ b ki. Sapɩlmã sẽn kʋ neb ninsã yaa wʋsg n yɩɩd a Zozue sodaasã sẽn kʋ wã.

La a Zozue wa n yãame tɩ wĩntoogã rat n kẽeme. A sã n yaool n kẽ tɩ zĩigã sobge, nanambs a nu wã sodaas wʋsg na n paam n zoe n põsame. Yaa rẽ yĩng la a Zozue sẽn pʋʋs a Zeova la a yeel wĩntoogã t’a yalsã. Wĩntoogã sɩd yalsame, tɩ b paam n zab zabrã n tõoge.

Nanambs a taab me n be Kanaã tẽngẽ wã n kis Wẽnnaam nin-​buiidã. A Zozue ne a sodaasã rɩka yʋʋm a yoob n na n zab ne nanambs 31 n tõoge. Rẽ poore, a Zozue pʋɩya Kanaã tẽngã tɩ Israɛll buud nins sẽn da pa tar zĩisã paame.

Yʋʋm wʋsg loogr poore, a Zozue kiime. A ra tara yʋʋm koabg la piiga. Yẽ ne a zo-​rãmbã sẽn da ket n vɩ wã sasa, Israɛll nebã ra tũuda a Zeova noyã. La bãmb fãa sẽn wa n ki wã, nebã yikame n maand sẽn yaa wẽnga, tɩ zu-​loees paam-⁠ba. Rẽndame tɩ Wẽnnaam sõng-⁠ba.

ISRAƐLL nebã sẽn wa n tar zu-​loeesã, b kelmame n bõos a Zeova t’a sõng-⁠ba. A Zeova yãka neb sẽn tar raood tɩ b lʋɩ b taoor n sõng-⁠ba. Biiblã boonda nin-​kãens tɩ bʋ-​kaoodba. A Zozue n yɩ pipi bʋ-​kaooda. A kũumã poore, neb a taab me n yɩ bʋ-​kaoodba. Wala makre, d tõe n sõdga a Otniɛll, a Ehud ne a Sãmgaar. La pagb a yiib me n sõng Israɛll nebã. Yaa a Debora ne a Zayɛlle.

A Debora yɩɩ no-​rɛɛsa. A Zeova ra wilgda pʋg-​kãngã bũmb ning sẽn na n maane, t’a togsd nebã. A Debora ra leb n yaa bʋ-​kaooda. A ra zĩi koang tẽngre, tɩ nebã wat n togsd b yɛlã t’a sõngd-⁠ba.

Wakat kãng tɩ ra yaa a Zabẽ n yaa Kanaã naaba. A ra tara kut saar dãmb kobs-⁠wɛ. A sodaasã sẽn da waoogã yĩnga, Israɛll nebã kong n lebga a yembse. A Zabẽ sodaasã naab yʋʋr la a Sizera.

Daar a yembre, a Debora boola bʋ-​kaood a Barak n yeel-⁠a t’a Zeova yeelame t’a tigim neb tus piig n kẽng Taboor tãngẽ wã, t’a na n kɩtame t’a tõog a Sizera ne a sodaasã.

A Barak yeela a Debora yaa: ‘Yãmb sã n yãag maam, mam na n kẽngame.’ A Debora yãag-⁠a lame, la a yeel-⁠a-⁠la woto: ‘Ka foo n na n kɩt tɩ b tõog ye, bala a Zeova na n kɩtame tɩ pag tõog a Sizera.’ Sɩd yɩɩ woto.

A Barak siga Taboor tãngã n na n sɛg a Sizera sodaasã. A Zeova kɩtame tɩ saag ni wʋsg zĩig pʋgẽ, tɩ koomã rɩ a Sizera sodaas wʋsgo. La a Sizera siga a saarã zug n zoe.

A Sizera zoeeme n ta a Zayɛll fu-​roogẽ wã, t’a Zayɛll yeel-⁠a t’a kẽ. A kõ-a-⁠la bĩisim t’a yũ, la a sẽn yũ wã a sɩnga suusgu, n wa gũsi. A Zayɛll rɩka a fu-​roogã kãntĩig a ye ne marto n ka a Sizera zugã t’a ki. A Barak sẽn wa n ta wã, a Zayɛll wilg-⁠a-⁠la a Sizera sẽn ki n dɩga. Dẽnd a Debora sẽn yeel bũmb ningã sɩd pidsame.

B wa n kʋʋ naab a Zabẽ me, tɩ Israɛll nebã tõog n le paam laafɩ.