SEBR a ye n be Biiblã pʋgẽ tɩ b boond tɩ Rut sebre. Seb-​kãng gomda zak a ye neb sẽn zĩnd Israɛll bʋ-​kaoodbã sasa yelle. A Rut ra yaa Moaab neda. A ra pa Israɛll ned ye. La a sẽn wa n bãng tɩ yaa a Zeova la Wẽnnaam sɩd-​sɩdã, a sũur yɩɩ noog t’a sak n na n tũ-a ne a sũur fãa. Yaa pʋg-​yãang a Naomi n sõng a Rut t’a bãng a Zeova.

A Naomi yaa Israɛll neda. Kom n wa n kẽ Israɛlle, tɩ yẽ ne a sɩdã la b kom-​dibli a yiibã yik n kẽng Moaab tẽngẽ wã. La a Naomi sɩdã wa n kiime. A kom-​dibli wã kẽe kãadem ne Moaab kom-​pugli, a Rut ne a Orpa. La yʋʋm 10 poore, a Naomi kom-​dibli wã me kiime. A Naomi ne a bi-​pagb a yiibã sũur sãamame. Bõe la a Naomi na n maan masã?

Raar a yembre, a Naomi yikame n na n leb a tẽngẽ wã Israɛlle. Zĩigã ra zãra wʋsgo. A Rut ne a Orpa me yikame n na n tũ-a. B sẽn wa n kẽnd n kẽndã, a Naomi wẽnegame n yeel a bi-​pagbã yaa: ‘Lebg-⁠y n kul-⁠y n tɩ zĩnd ne y ma rãmba.’

A mobg-⁠b lame la a pʋʋs-⁠b wẽnd-⁠na-​taase. La a Rut ne a Orpa sɩnga yãbre, bala b ra nonga a Naomi wʋsgo. B yeel-⁠a lame yaa: ‘Ayo, tõnd na n tũu foo n kuli.’ La a Naomi yeelame yaa: ‘Lebg-⁠y n kul-⁠y tɩ rẽ n são, m kamba.’ A Orpa lebgame n kuisẽ la a Rut yẽ pa lebg ye.

A Naomi wẽnegame n yeel-⁠a yaa: ‘A Orpa lebgame n kuisẽ. Tũ-a tɩ y kuli.’ La a Rut yeel-⁠a lame yaa: ‘Da pẽdg maam tɩ m lebg n bas foom ye. Tɩ bõe, zĩig ninga fo sẽn na n kẽngã, mam me na n kẽnga be, la zĩig ninga fo sẽn na n sigã, mam me na n siga be. Fo nebã na n yɩɩ mam neba, la fo Wẽnnaamã me na n yɩɩ mam Wẽnnaam. Zĩig ninga fo sẽn na n ki wã, mam me na n kii be, la b na n muma maam beenẽ.’ A Rut sẽn gom woto wã, a Naomi pa le modg-⁠a t’a lebg n kul ye.

A Naomi ne a Rut taa Israɛll n na n zĩnd be. A Rut kell n sɩnga tʋʋm pʋtã pʋsẽ, bala ra yaa ki wã kẽebg sasa. Rao a ye yʋʋr sẽn yaa a Boaaz n sak t’a na n yiis ki wã a pʋtã pʋsẽ. Yãmb mii a Boaaz ma sẽn yaa ned ning bɩ? Yaa a Rahaab sẽn da yit Zeriko wã.

Raar a yembre, a Boaaz yeela a Rut yaa: ‘Mam wʋma fo yelle, la bũmb nins fãa fo sẽn maan n sõng a Naomi wã. Mam miime tɩ fo basa f ba ne f ma la f meng tẽng n wa n na n zĩnd ne buud ninga fo sẽn ka mi. Bɩ a Zeova rol foom f tʋʋmdã zãnga.’

A Rut leok-⁠a lame yaa: ‘Fo yaa nin-​sõng wʋsgo. Fo goamã belsa maam.’ A Boaaz ra nonga a Rut wʋsgo. Pa yã n kaoos la b kẽ kãadem ne taab ye. A Naomi sũurã segd n yɩɩ noog koe! A Rut ne a Boaaz roga b pipi bi-​riblã n pʋd a yʋʋr t’a Obɛd. A Naomi sũurã yɩɩ noog n paase. A Obɛd yaa a Davɩɩd yaab-​raoogo. D na n wa goma a Davɩɩd yelle.

YÃMB nee rapã fotã zug bɩ? Yaa Israɛll sodaase. Rap nins sẽn zõrã yũuda koom. Rao ning sẽn yas b poorẽ wã yaa bʋ-​kaood a Zedeõ. A geta b sẽn yũud koomã to-⁠to wã.

Ges-⁠y nebã sẽn yũud koomã to-⁠to. Kẽer fõgna b nensã koomẽ wã n yũuda. La ned a ye n kaag koomã ne a nug n nak a neng n getẽ la a yũuda. A sẽn yũud to-⁠to wã yaa sõma, bala a Zeova yeela a Zedeõ t’a yãk rap nins sẽn na n getẽ la b yũudã bala, la a kɩt tɩ neb a taabã lebg n kuli. Bɩ d ges bũmb ning sẽn kɩt t’a Zeova yeel woto wã.

Israɛll nebã le tara zu-​loeese, bala b pa tũ a Zeova noyã ye. Madiã nebã soog-⁠b lame n namsd-⁠b wʋsgo. Rẽ n so tɩ b bõos a Zeova t’a sõng-⁠ba, t’a Zeova sake.

A Zeova yeela a Zedeõ t’a tigim sodaase. A Zedeõ tigma bãmb tus pis-​tã la a yiibu. Yaool n yaa sodaas tus koabg la tus pis-​tã la a nu n da rat n zab ne Israɛll nebã. La a Zeova yeela a Zedeõ t’a sodaasã yaa wʋsgo. Bõe yĩng t’a Zeova yet woto?

Bala Israɛll nebã sã n tõog zabrã, b na n wa tagsame tɩ yaa ne bãmb meng pãng la b sẽn tõogã. B tõe n wa tẽedame t’a Zeova sõngr ka tɩlae ye. Yaa rẽ yĩng la a Zeova yeel a Zedeõ yaa: ‘Moon koɛɛg n yeel nebã tɩ rabeem sẽn tar-⁠a soab t’a rigd bɩ a kul a yiri.’ A Zedeõ sẽn yeel woto wã, sodaas tus pisi la a yiib n lebg n kuli. Ra keta sodaas tus piig bal sẽn segd n zab ne sodaas tus koabg la tus pis-​tã la a nu.

La a Zeova yeelame t’a Zedeõ sodaasã ket n yaa wʋsgo. A yeela a Zedeõ t’a kɩt t’a sodaasã tɩ yũ koom kʋɩlgẽ wã, la a kɩt tɩ neb nins sẽn na n fõgen b nensã koomẽ wã n yũ wã lebg n kuli. Yaa sodaas kobs-​tã bal n da nak b neng n getẽ la b yũuda. La a Zeova yeelame t’a na n kɩtame t’a Zedeõ ne sodaas kobs-​tã wã tõog zabrã.

Zabrã daar sẽn ta wã, a Zedeõ pʋɩya a sodaasã zĩis a tãabo. A kõo bãmb ned kam fãa baorg ne rʋg-​vɩʋʋgo, tɩ bug-​vɩleng sag a pʋgẽ. Yʋn-​sʋkã sẽn ta, yẽ ne a sodaasã karg n gũbga Madiã sodaasã sikã zĩiga. B fãa naaga taab n peeb b bardã, n wẽ rʋgdã n wã la b kelem tɩ: ‘Sʋʋgã yaa a Zeova ne a Zedeõ n so.’ Madiã sodaasã nekame n yɛɛs n pa mi b sẽn maand ye. B fãa sɩnga zoeese, tɩ Israɛll nebã tõog zabrã.