YÃMB nee rapã fotã zug bɩ? Yaa Israɛll sodaase. Rap nins sẽn zõrã yũuda koom. Rao ning sẽn yas b poorẽ wã yaa bʋ-​kaood a Zedeõ. A geta b sẽn yũud koomã to-⁠to wã.

Ges-⁠y nebã sẽn yũud koomã to-⁠to. Kẽer fõgna b nensã koomẽ wã n yũuda. La ned a ye n kaag koomã ne a nug n nak a neng n getẽ la a yũuda. A sẽn yũud to-⁠to wã yaa sõma, bala a Zeova yeela a Zedeõ t’a yãk rap nins sẽn na n getẽ la b yũudã bala, la a kɩt tɩ neb a taabã lebg n kuli. Bɩ d ges bũmb ning sẽn kɩt t’a Zeova yeel woto wã.

Israɛll nebã le tara zu-​loeese, bala b pa tũ a Zeova noyã ye. Madiã nebã soog-⁠b lame n namsd-⁠b wʋsgo. Rẽ n so tɩ b bõos a Zeova t’a sõng-⁠ba, t’a Zeova sake.

A Zeova yeela a Zedeõ t’a tigim sodaase. A Zedeõ tigma bãmb tus pis-​tã la a yiibu. Yaool n yaa sodaas tus koabg la tus pis-​tã la a nu n da rat n zab ne Israɛll nebã. La a Zeova yeela a Zedeõ t’a sodaasã yaa wʋsgo. Bõe yĩng t’a Zeova yet woto?

Bala Israɛll nebã sã n tõog zabrã, b na n wa tagsame tɩ yaa ne bãmb meng pãng la b sẽn tõogã. B tõe n wa tẽedame t’a Zeova sõngr ka tɩlae ye. Yaa rẽ yĩng la a Zeova yeel a Zedeõ yaa: ‘Moon koɛɛg n yeel nebã tɩ rabeem sẽn tar-⁠a soab t’a rigd bɩ a kul a yiri.’ A Zedeõ sẽn yeel woto wã, sodaas tus pisi la a yiib n lebg n kuli. Ra keta sodaas tus piig bal sẽn segd n zab ne sodaas tus koabg la tus pis-​tã la a nu.

La a Zeova yeelame t’a Zedeõ sodaasã ket n yaa wʋsgo. A yeela a Zedeõ t’a kɩt t’a sodaasã tɩ yũ koom kʋɩlgẽ wã, la a kɩt tɩ neb nins sẽn na n fõgen b nensã koomẽ wã n yũ wã lebg n kuli. Yaa sodaas kobs-​tã bal n da nak b neng n getẽ la b yũuda. La a Zeova yeelame t’a na n kɩtame t’a Zedeõ ne sodaas kobs-​tã wã tõog zabrã.

Zabrã daar sẽn ta wã, a Zedeõ pʋɩya a sodaasã zĩis a tãabo. A kõo bãmb ned kam fãa baorg ne rʋg-​vɩʋʋgo, tɩ bug-​vɩleng sag a pʋgẽ. Yʋn-​sʋkã sẽn ta, yẽ ne a sodaasã karg n gũbga Madiã sodaasã sikã zĩiga. B fãa naaga taab n peeb b bardã, n wẽ rʋgdã n wã la b kelem tɩ: ‘Sʋʋgã yaa a Zeova ne a Zedeõ n so.’ Madiã sodaasã nekame n yɛɛs n pa mi b sẽn maand ye. B fãa sɩnga zoeese, tɩ Israɛll nebã tõog zabrã.

YÃMB zoe n pʋlma ned bũmb n wa mik tɩ yaa toog tɩ y pids y pʋlengã bɩ? A buud n paam rao ning yãmb sẽn ne fotã zugã. Yaa rẽ la a sũurã sẽn pa noomã. A ra yaa Israɛll bʋ-​kaood sẽn tar raood wʋsgo. A yʋʋr la a Zɛfte.

A Zɛfte wakatẽ wã tɩ Israɛll nebã ra basa a Zeova n tũud wẽnnaam dãmb a taaba. B ra maanda sẽn yaa wẽng wʋsgo. Yaa rẽ yĩng la a Zeova bas tɩ Amõ nebã na n nams-⁠ba. La Israɛll nebã kelmame n yeel a Zeova yaa: ‘Tõnd kongame. D kotame tɩ f fãag tõndo.’

Israɛll nebã sũur sãama b beegrã yĩnga. Rẽ n kɩt tɩ b lebg n tũud a Zeova, t’a Zeova me na n le sõng-⁠b yɛsa.

Yaa a Zɛfte la nebã yãk t’a na n lʋɩ b taoor tɩ b zab ne Amõ nebã. A Zɛfte ra rata ne a sũur fãa t’a Zeova sõng-⁠a. A pʋlma a Zeova yaa: ‘Fo sã n sõng maam tɩ m tõog Amõ nebã, mam sã n tɩ tõog n wa, ned ning fãa sẽn na n deng n yi m zakẽ wã n seg maamã, nin-​kãng yaa foo n so.’

A Zeova saka a Zɛfte sẽn yeelã n sɩd sõng-⁠a t’a tõog zabrã. A Zɛfte sẽn wa n kulã, yãmb mii ned ning sẽn yɩ pipi n seg-⁠a bɩ? Yaa a bi-​puglã sẽn da yaa a bi-​yendã. A Zɛfte sẽn yã-a wã a kelmame: ‘M ba ye! M biiga, fo waa ne sũ-sãoong n kõ-ma. Mam da pʋlma a Zeova. La m ka tõe n bas m noorã tɩ vaal ye.’

A Zɛfte bi-​puglã sẽn wʋm a ba wã sẽn pʋlem a Zeova bũmb ningã, a sũurã reng n sãamame. Bala a ra na n basa a zo-​rãmbã ne a ba wã n tɩ vɩɩmd Silo, n tʋm a Zeova sɛk-​roogẽ wã a yõor tɛka. La a yeela a baaba yaa: ‘Yãmb sã n pʋlma a Zeova, y segd n pidsa y pʋlengã.’

A Zɛfte bi-​puglã kẽnga Silo n tɩ tʋm a Zeova sɛk-​roogã pʋgẽ a yõor tɛka. La yʋʋmd fãa, Israɛll pagbã kẽngda a nengẽ n tɩ pẽg-⁠a la b sõs ne-⁠a rasem a naase. Israɛll nebã ra nonga a Zɛfte bi-​puglã, bala a ra tũuda a Zeova sõma.