A Sayull n yɩ Israɛll pipi rĩma. La a Zeova wa n bas-⁠a lame n yãk a Davɩɩd t’a ledg-⁠a. D na n goma a Davɩɩd yell wʋsgo. A sẽn wa n yaa bi-​bɩɩga, a zaba ne nin-​wobg a Goliate. Kaoosg zugẽ, a wa n zoeeme, bala rĩm a Sayull da maanda sũ-kiir ne-⁠a. Pʋg-​sõng a Abigayill me kɩtame t’a pa maan wẽng ye.

Rẽ poore, d na n goma a Davɩɩd biig a Salomo yelle. A Davɩɩd kũumã poore, a Salomo n lebg Israɛll rĩma. A Sayull rɩɩ a naamã yʋʋm 40, a Davɩɩd ne a Salomo me yɩɩ woto. A Salomo kũumã poore, Israɛll soolmã welga zĩis a yiibu. A yembr bee rɩtg t’a ye be goabga.

Rɩtg soabã yaa buud piiga, tɩ goabg soabã yaa buud a yiibu. Rɩtg soabã kaoosa yʋʋm kobs-⁠yi la pis-⁠nu la a yopoe tɩ Asiri nebã yaool n wa sãam-⁠a. Yʋʋm koabg la pis-​tã la a tãab poore, b sãama goabg soabã me. Wakat kãnga, b talla Israɛll nebã n kẽng yembd Babilon. Dẽnd babg a naasã gomda yel-​kãsems sẽn zĩnd yʋʋm kobs-⁠nu la piig pʋgẽ yelle.

YÃMB nee a Sãmwɛll sẽn pʋdgd kaamã raoã zugã bɩ? Pĩnd wẽndẽ wã, yaa woto la b ra maand Israɛlle, n na n wilg tɩ b yãka ned t’a na n lebg rĩma. A Zeova yeela a Sãmwɛll t’a ning a Sayull zugã kaam. La pa kaam yaar ye. Sẽn paase, a yũuga ra yaa noogo.

A Sayull ra tagsdame tɩ yẽ pa tõe n yɩ rĩm ye. A yeela a Sãmwɛll yaa: ‘Mam yaa Bẽnzame buudã neda, la mam buudã yaa bilf n yɩɩd Israɛll buud a taabã. Yaa bõe tɩ fo yet tɩ maam n na n lebga rĩma?’ A Zeova ra nonga a Sayulli, bala a ra pa wuk-⁠m-​meng soab ye. Yaa rẽ yĩng la a Zeova sẽn yãk-⁠a t’a na n lebg rĩmã.

A Sayull ra pa nin-​bil ye. A ra yaa ra-​woko. A woglmã ra yɩɩda Israɛll nebã fãa. A ra pa naong soab ye. A zakã rãmb da yaa arzɛk rãmba. A Sayull da leb n yaa ned sẽn zoet tʋʋl-​tʋʋle, la ned sẽn tar pãng wʋsgo. A Zeova sẽn yãk-⁠a t’a na n yɩ rĩma yɩɩ Israɛll nebã noogo. Nebã fãa kelmame n yeel tɩ: ‘Wẽnd na kõ rĩmã yõore!’

Israɛll nebã bɛɛb ra ket n tara pãnga. B ra ket n namsda Israɛll nebã. A Sayull sẽn lebg rĩmã poor bilf bala, Amõ nebã yikame n na n zab ne-⁠ba. La a Sayull tigma sodaas wʋsg tɩ b tɩ zab ne Amõ nebã n tõoge. Nebã sũur da yaa noogo, b sẽn paam t’a Sayull yaa b naabã yĩnga.

A Sayull lʋɩɩ taoor tɩ Israɛll nebã tõog zab wʋsgo. A Sayull da tara bi-​ribl yʋʋr sẽn yaa a Zonatã. A Zonatã ra yaa gãndaoogo. A sõnga Israɛll nebã tɩ b tõog zab wʋsgo. Filisti nebã ra ket n yaa Israɛll nebã bɛɛb meng-​menga. Raar a yembre, Filisti neb wʋsg n wa n na n zab ne Israɛll nebã.

A Sãmwɛll yeela a Sayull t’a yaas t’a wa maan maoong n kõ a Zeova tɩ b yaool n kẽng zabrã. La a Sãmwɛll ra kaoosdame n pa watẽ ye. A Sayull me ra zoetame tɩ Filisti nebã na n wa sɩng zabrã tɩ bãmb nan pa yõog maandã n kõ a Zeova ye. Rẽ n so t’a yõog maandã a toore. A Sãmwɛll sẽn wa n ta wã, a yeela a Sayull t’a kɩɩsame, la t’a Zeova na n yãka ned a to t’a lebg Israɛll rĩma.

Raar a to yɛsa, a Sayull kɩɩsame. A Sãmwɛll yeel-⁠a lame yaa: ‘Fo sã n sak a Zeova n são fo sẽn na n dɩk piis sẽn nob n maan maand n kõ-a. Fo sẽn pa kelg a Zeova wã, yẽ me yeelame tɩ f ka na n le yɩ rĩm ye.’

Kiba-​kãngã zãmsda tõnd tɩ d segd n saka a Zeova noorã wakat fãa. Sẽn leb n paase, woto wilgdame tɩ wa sẽn yɩ to-⁠to ne a Sayullã, ned tõe n yaa nin-​sõngo, n wa yik n lebg nin-​wẽnga. D modg n da wa yɩ nin-​wẽng ye.