YÃMB nee we-​rũngã sẽn gãe fotã zugã bɩ? Yaa urs. A ra yõka pe-​bil n na n tɩ wãb tɩ bi-​riblã pʋgl-⁠a n tak pe-​bilã n fãage. La ursã baoome n na n yõk bi-​riblã, tɩ bi-​riblã kʋ-⁠a. Raar a to me, bi-​riblã fãaga pesg tɩ bõn-​yẽeg ka paam-⁠a n wãb ye. Ad bi-​ribl kãngã sɩd pa yɛɛsd baa fʋɩ koe! Yãmb mi-⁠a lame bɩ?

Yaa a Davɩɩde. A yita Betlehɛm. A yaab-​raoogã yʋʋr da yaa a Obɛd. A Obɛd ra yaa a Rut ne a Boaaz biiga. Yãmb ket n tẽrame bɩ? A Davɩɩd ba la a Izayi bɩ a Zese. A Davɩɩd ra gũuda a ba wã piisi. Yaa a Zeova sẽn yãk a Sayull t’a lebg rĩmã yʋʋm 10 poor la a Davɩɩd rog-​yã.

A Zeova wa n yeela a Sãmwɛll raar a ye yaa: ‘Rɩk kaam ning b sẽn tar n zaeed rĩm dãmbã n kẽng a Zese nengẽ Betlehɛm. Mam yãka a bi-​ribl a ye t’a na n lebg rĩma.’ A Sãmwɛll sẽn ta n yã a Zese bi-​kãseng a Eliaabã, a yeela a sũurẽ tɩ ‘segd n yaa yãoã la a Zeova sẽn yãkã.’ La a Zeova yeel-⁠a lame yaa: ‘Ra ges a rasãndã ne a woglmã ye. Bala, ka yẽ la mam yãk t’a yɩ rĩm ye.’

A Zese boola a bi-​ribl a Abinadaabe, la a Sãmwɛll yeelame tɩ pa yẽ me ye. T’a Zese bool a Sama, la pa yɩ yẽ me ye. A Zese boola a kom-​dibli a yopoe tɩ b wa a Sãmwɛll taoore, la a Zeova pa yãk b baa a yen ye. A Sãmwɛll soka a Zese yaa: ‘Yaa fo kom-​dibli wã fãa la woto bɩ?’

T’a Zese leok yaa: ‘B yao-​zʋʋgã n kete, la a gũuda piisi.’ B sẽn bool a Davɩɩd t’a wa ta a Sãmwɛll taoorã, a Sãmwɛll yãame t’a yaa rasãnga. A Zeova yeela a Sãmwɛll yaa: ‘Yaa yẽ la mam yãk-​yã. Ning a zugã kaamã.’ A Sãmwɛll sɩd zaea a Davɩɩd zugã kaamã. Wakat n na n wa zĩnd t’a Davɩɩd lebg Israɛll rĩma.

FILISTI nebã le waame n na n zab ne Israɛll nebã. A Davɩɩd kẽem dãmb a tãab n lebg a Sayull sodaase. Daar a yembre, a Zese yeela a Davɩɩd t’a tall ka-​sãrdɩ la bur n tɩ kõ a kẽem dãmbã la a bãng b keelem.

A Davɩɩd sẽn ta zabrã zĩigẽ wã, a kẽnga a kẽem dãmbã sẽn beẽ wã. Filisti nin-​wobg a Goliat kolgame n na n yaal Israɛll nebã. Yaa rasem 40 masã la a sẽn maand woto wã. A ra maanda rẽ yibeoog fãa la zaabr fãa. A zẽka a koɛɛg n yeel Israɛll nebã yaa: ‘Bɩ y yãk y ned a ye t’a wa tɩ maam ne yẽ zab ne taaba. Yẽ sã n tõog maam n kʋ, tõnd na n yɩɩ yãmb yembse, la mam sã n tõog yẽ n kʋ, yãmb na n yɩɩ tõnd yembse. Yãmb sã n yaa rapa, bɩ y yãk ned t’a wa tɩ d zabe.’

A Davɩɩd soka sodaasã yaa: ‘Ned sã n kʋ Filisti nedã n yiis Israɛll nebã yãnde, bõe la b na n kõ a soaba?’

Tɩ sodaag a ye leok-⁠a yaa: ‘Rĩma na n kõo a soab arzɛk wʋsgo, la a rɩk a bi-​pugl n kõ-a t’a maan a paga.’

La Israɛll nebã fãa ra zoeta a Goliate, bala a ra yaa nin-​wobgo. A woglmã ra kolga metr a 3, tɩ sodaag me ra be taoor n zãad a gãongã.

Israɛll sodaas n kẽng n tɩ yeel rĩm a Sayull t’a Davɩɩd rat n tɩ zaba ne a Goliate. La a Sayull yeela a Davɩɩd yaa: ‘Fo ka tõe n kẽng n tɩ zab ne Filisti nin-​kãngã ye. Bala fo yaa biiga, la yẽ yaa sodaag hal a yãadmẽ.’ A Davɩɩd leokame yaa: ‘Mam sẽn da wa n gũud m ba wã piisã, bõn-​yẽeg ne urs n yõk piis tɩ mam dig-⁠b n tɩ kʋ. Mam na n kʋʋ Filisti nin-​kãngã me woto. A Zeova na n sõnga maam.’ T’a Sayull yeel-⁠a yaa: ‘Bɩ f kẽng t’a Zeova bee ne foom.’

A Davɩɩd kẽnga kʋɩlg noor n tɩ rɩgs kug-​saals a nu n sui a korgẽ wã. La yẽ zãa a loaabg n na n tɩ zab ne Filisti nedã. A Goliat sẽn yã a Davɩɩdã, a tagsame t’a na n tõog-⁠a-⁠la faag-​faaga.

A yeela a Davɩɩd yaa: ‘Bɩ f wa tɩ m na n kʋ-⁠f lame n kõ yɩbred ne we-​rũms tɩ b wãbe.’ La a Davɩɩd leokame yaa: ‘Fo zãada sʋʋg ne kãnd la munmun n wat mam nengẽ. La mam wata fo nengẽ ne a Zeova yʋʋre. Rũndã, a Zeova na n kɩtame tɩ m tõog n kʋ foo.’

A Davɩɩd wudgame n kolgd a Goliate, n tʋm a nug a korgã pʋgẽ n yãk kugr a ye n ning a loaabgã pʋgẽ, n wɩsg a meng n lobg-⁠a, tɩ kugrã tɩ wẽ a Goliat rĩirã n sud n kẽ pʋgẽ t’a lʋɩ tẽng n ki. Filisti nebã sẽn yã tɩ b gãndaoogã lʋɩɩme wã, b lebgame n sɩng zoeese. Israɛll nebã rig-⁠b lame n tõog zabrã.