FILISTI nebã le waame n na n zab ne Israɛll nebã. A Davɩɩd kẽem dãmb a tãab n lebg a Sayull sodaase. Daar a yembre, a Zese yeela a Davɩɩd t’a tall ka-​sãrdɩ la bur n tɩ kõ a kẽem dãmbã la a bãng b keelem.

A Davɩɩd sẽn ta zabrã zĩigẽ wã, a kẽnga a kẽem dãmbã sẽn beẽ wã. Filisti nin-​wobg a Goliat kolgame n na n yaal Israɛll nebã. Yaa rasem 40 masã la a sẽn maand woto wã. A ra maanda rẽ yibeoog fãa la zaabr fãa. A zẽka a koɛɛg n yeel Israɛll nebã yaa: ‘Bɩ y yãk y ned a ye t’a wa tɩ maam ne yẽ zab ne taaba. Yẽ sã n tõog maam n kʋ, tõnd na n yɩɩ yãmb yembse, la mam sã n tõog yẽ n kʋ, yãmb na n yɩɩ tõnd yembse. Yãmb sã n yaa rapa, bɩ y yãk ned t’a wa tɩ d zabe.’

A Davɩɩd soka sodaasã yaa: ‘Ned sã n kʋ Filisti nedã n yiis Israɛll nebã yãnde, bõe la b na n kõ a soaba?’

Tɩ sodaag a ye leok-⁠a yaa: ‘Rĩma na n kõo a soab arzɛk wʋsgo, la a rɩk a bi-​pugl n kõ-a t’a maan a paga.’

La Israɛll nebã fãa ra zoeta a Goliate, bala a ra yaa nin-​wobgo. A woglmã ra kolga metr a 3, tɩ sodaag me ra be taoor n zãad a gãongã.

Israɛll sodaas n kẽng n tɩ yeel rĩm a Sayull t’a Davɩɩd rat n tɩ zaba ne a Goliate. La a Sayull yeela a Davɩɩd yaa: ‘Fo ka tõe n kẽng n tɩ zab ne Filisti nin-​kãngã ye. Bala fo yaa biiga, la yẽ yaa sodaag hal a yãadmẽ.’ A Davɩɩd leokame yaa: ‘Mam sẽn da wa n gũud m ba wã piisã, bõn-​yẽeg ne urs n yõk piis tɩ mam dig-⁠b n tɩ kʋ. Mam na n kʋʋ Filisti nin-​kãngã me woto. A Zeova na n sõnga maam.’ T’a Sayull yeel-⁠a yaa: ‘Bɩ f kẽng t’a Zeova bee ne foom.’

A Davɩɩd kẽnga kʋɩlg noor n tɩ rɩgs kug-​saals a nu n sui a korgẽ wã. La yẽ zãa a loaabg n na n tɩ zab ne Filisti nedã. A Goliat sẽn yã a Davɩɩdã, a tagsame t’a na n tõog-⁠a-⁠la faag-​faaga.

A yeela a Davɩɩd yaa: ‘Bɩ f wa tɩ m na n kʋ-⁠f lame n kõ yɩbred ne we-​rũms tɩ b wãbe.’ La a Davɩɩd leokame yaa: ‘Fo zãada sʋʋg ne kãnd la munmun n wat mam nengẽ. La mam wata fo nengẽ ne a Zeova yʋʋre. Rũndã, a Zeova na n kɩtame tɩ m tõog n kʋ foo.’

A Davɩɩd wudgame n kolgd a Goliate, n tʋm a nug a korgã pʋgẽ n yãk kugr a ye n ning a loaabgã pʋgẽ, n wɩsg a meng n lobg-⁠a, tɩ kugrã tɩ wẽ a Goliat rĩirã n sud n kẽ pʋgẽ t’a lʋɩ tẽng n ki. Filisti nebã sẽn yã tɩ b gãndaoogã lʋɩɩme wã, b lebgame n sɩng zoeese. Israɛll nebã rig-⁠b lame n tõog zabrã.

A DAVƖƖD sẽn kʋ a Goliatã poore, Israɛll sodaasã naab a Abneer tall-⁠a lame n kẽng a Sayull nengẽ. A Sayull sũur yɩɩ noog ne a Davɩɩd wʋsgo. A kɩtame tɩ yẽ me paam naam a sodaasã sʋka, la a kɩt t’a wa zĩnd na-​zakẽ wã.

Israɛll sodaasã wa n yii raar a ye n tɩ zab ne Filisti nebã n tõog-⁠ba. B sẽn wa n lebgdẽ wã, pagbã ra yɩɩndame n yetẽ yaa: ‘A Sayull kʋʋ neb tusri, t’a Davɩɩd kʋ neb tus piiga.’ Gom-​kãensã kɩtame tɩ sũ-kiir yõk a Sayulli, bala pagbã ra waoogda a Davɩɩd n yɩɩd yẽ. La a Sayull biig a Zonatã ra pa maand sũ-kiir ye. A ra nonga a Davɩɩd wʋsgo, t’a Davɩɩd me nong-⁠a. B yiibã pʋlma taab tɩ b na n kell n yɩɩ zo-​rãmb wakat fãa.

A Davɩɩd ra mii pɛndg wẽeb hal tɩ noom a Sayulli. La raar a yembre, sũ-kiirã yĩng kɩtame t’a Sayull maan bũmb sẽn pa sõma. A Davɩɩd sẽn wa n zĩ n wẽed pɛndgã, a Sayull rɩka a kãndã n tão n yeel yaa: ‘M na n kaa a Davɩɩd ne lalgã.’ La a Davɩɩd kuugame tɩ kãndã ka paam-⁠a ye. Raar a to me, a Sayull le tãoa a Davɩɩd ne kãndã n yõsge. Rẽ tɛkã, a Davɩɩd bãngame t’a segd n gũusa a meng wʋsg ne a Sayulli.

Yãmb ket n tẽra a Sayull sẽn da pʋlem bũmb ningã bɩ? A ra pʋlmame t’a na n dɩka a bi-​pugl n kõ ned ning sẽn na n tõog n kʋ a Goliatã. A Sayull pa kõ a Davɩɩd a pagã tao-​tao ye. La a wa n yeela a Davɩɩd t’a sã n dat yẽ bi-​pugl a Mikalle, a segd n deng n kʋʋ Filisti neb koabga. Yãmb we n ges koe! A Sayull ra tẽedame tɩ Filisti nebã na n kʋʋ a Davɩɩde, la pa yɩ woto ye. Masa wã a kong n dɩka a Mikall n kõ a Davɩɩd t’a maan a paga.

Raar a yembre, a Sayull yeela a Zonatã la a sõgen dãmbã fãa t’a rat n kʋʋ a Davɩɩde. La a Zonatã yeela a ba wã yaa: ‘Ra maan a Davɩɩd wẽng ye. Bala a zɩ n maan foo wẽng ye. Yẽ maana foo neer wʋsgo. A gẽnega a yõor n kʋ a Goliate, la fo meng sũur yɩɩ noogo.’

A Sayull kelga a biigã goamã, n yeel t’a pa na n kʋ a Davɩɩd ye. A Davɩɩd lebg n waa a Sayull zakẽ wã n le tʋmd be wa pĩndã. La daar a yembre, a Davɩɩd ra wẽeda pɛndgã yɛsa, t’a Sayull le rɩk a kãndã n na n tão-⁠a. A Davɩɩd kuugame tɩ kãndã tɩ sel lalgã. Yaa naoor a tãab la woto a Sayull sẽn mak n na n kʋ-⁠a. A Davɩɩd bãngame tɩ masã wã, rẽnda a zoe.

Baraar yʋngã, a Davɩɩd zoee n kẽnga yẽ mengã zakẽ wã. La a Sayull tʋma neb tɩ b tɩ kʋ-⁠a. A Mikall bãnga tiir n yeel a sɩdã yaa: ‘Fo sã n ka zoe yʋngã, b na n kʋʋ foo beoogo.’ A Mikall sõnga a Davɩɩd t’a tũ fenetr n yi n zoe. Sẽn na maan yʋʋm a yopoe, a Davɩɩd ra zoet n soondame sẽn na yɩl t’a Sayull ra paam-⁠a n kʋ ye.