A SAYULL le makame n na n yõk a Davɩɩde. A yãka sodaas tus a tãab sẽn mi zabr sõma tɩ b na n yãag-⁠a tɩ b tɩ bao a Davɩɩde. A Davɩɩd sẽn wʋm rẽ wã, a kɩtame tɩ neb na n tɩ gũus n ges a Sayull ne a sodaasã sẽn na n gãand zĩig ning yʋn-​kãngã. Rẽ poore, a soka a neb a yiib woto: ‘Ãnda n na n tũ maam n kẽng a Sayull sika zĩigẽ?’

A Abisayi leokame tɩ yẽ n na n tũ. A Abisayi yaa a Davɩɩd kẽem a Zeruiya biiga. A Davɩɩd ne a Abisayi ta n mikame t’a Sayull ne a sodaasã ra gõeeme. B soosame n kẽ sikã zĩigẽ n dɩk a Sayull kãndã ne a lɩngã sẽn da rɩg a zugẽ wã. B fãa sẽn da gõe sõma wã yĩnga, ned baa a ye ka bãng ye.

Ges-⁠y a Davɩɩd ne a Abisayi sẽn be zĩig ning masã. B lebg n yii sikã zĩigẽ tɩ bũmb ka paam-⁠b ye. Masã, b bee tãngã zugu. A Davɩɩd zẽka a koɛɛg n yeel Israɛll sodaasã naab yaa: ‘Abneer, bõe yĩng tɩ fo pa gũ rĩmã sẽn yaa f zu-​soabã? A kãndã ne a lɩngã bee yɛ?’

A Sayull nekame, n bãng a Davɩɩd koɛɛgã n sok-⁠a yaa: ‘Yaa m biig a Davɩɩd bɩ?’ Foto ning sẽn be rɩtgã pʋgẽ, yãmb pa ne a Sayull ne a Abneer sɩda?

A Davɩɩd yeela a Sayull yaa: ‘N-⁠ye, m zu-​soab la m dĩma, yaa maam. Yaa bõe tɩ y rigd maam? Mam maana yãmb bõe? Naaba, ad y kãndã, tʋm-⁠y ned a ye t’a wa reege.’

A Sayull yeelame yaa: ‘Mam kongame. Mam maana yalemdo.’ Rẽ poore, a Davɩɩd rɩka a sor t’a Sayull me lebg n kuli. La a Davɩɩd tagsame t’a sã n pa zoe n kẽng Filisti rãmbã tẽngẽ, a Sayull na n wa kʋ-⁠a-⁠la raar a yembre. A sɩd kẽnga Filisti rãmbã nengẽ, n belg Filisti nebã tɩ b tẽ t’a lebga b zoa.

Kaoosg zugẽ Filisti nebã wa n zaba ne Israɛll nebã. A Sayull ne a Zonatã kii zabrã pʋgẽ, t’a Davɩɩd sũurã sãam wʋsgo. A gʋlsa yɩɩll b yĩnga, la yɩɩlã pʋgẽ a yeelame yaa: ‘M saam-​biig a Zonatã, mam sũurã sãamame. Mam da nonga foo wʋsgo.’

Rẽ poore, a Davɩɩd leba Israɛll n tɩ zĩnd Hebrõ. Zabr n zĩnd neb nins sẽn da rat t’a Sayull biig a Isbosɛt reeg naamã ne neb nins sẽn da rat tɩ yɩ a Davɩɩdã sʋka. La yaa a Davɩɩd n lebg rĩmã. A sẽn wa n deegd naamã t’a tara yʋʋm 30. A rɩɩ naam Hebrõ yʋʋm a yopoe la pʋɩ-​sʋka. A roga kom-​dibli kẽer Hebrõ. Bãmb kẽer yʋy la woto: A Amnõ, a Absalom la a Adoniza.

A Davɩɩd ne a sodaasã yika raar a ye n na n tɩ zab n deeg Zerizalɛm. Ra yaa tẽn-​neere. Yaa a Davɩɩd kẽem a Zeruiya bi-​ribl a Zoaab n lʋɩ zabrã taoore. Rẽ poore, a Davɩɩd kɩtame t’a Zoaab lebg a sodaasã naaba. A Davɩɩd sɩnga naam dɩɩb Zerizalɛm masã.

A DAVƖƖD sẽn sɩng a naamã rɩɩb Zerizalɛmmã tɛka, a Zeova kɩtame t’a sodaasã tõog bɛɛb wʋsgo. A Zeova ra pʋlmame t’a na n kõo Israɛll nebã Kanaã tẽngã tɩ b sooge. A Zeova sɩd sõng-⁠b lame tɩ b reeg tẽngã gill masã.

A Davɩɩd ra yaa na-​sõngo. A ra nonga a Zeova. Rẽ n so t’a sẽn deeg Zerizalɛm tẽngã n soogã poor bala, a kɩtame tɩ b tall a Zeova kãabg koglgã n wa Zerizalɛm. A da ratame n me wẽnd-​doog n ning koglgã be.

La kaoosg zugẽ, a Davɩɩd maana bũmb sẽn pa sõma. A Davɩɩd ra miime tɩ pa sõma tɩ f rɩk f sẽn pa so ye. La zaabr a yembre, a rʋʋ a roogã zug n na n kok pemsem, la a zĩnda be n yã pʋg-​neere. Pagã yʋʋr la a Batseba, t’a sɩdã yʋʋr yaa a Uri. A Uri yaa a Davɩɩd sodaaga.

A Davɩɩd yamã kẽe a Batseba wʋsgo, t’a kɩt tɩ b tɩ tall-⁠a n wa. A Batseba sɩdã ra kẽnga zabre. A Davɩɩd gãanda a Batseba, t’a rɩk pʋga. Yellã paka a Davɩɩd masã. A gʋlsa sebr n tool sodaasã naab a Zoaab n yeel t’a ning a Uri zabrã zĩig ning a sẽn mi t’a pa na n põsã. A Uri kũumã poore, a Davɩɩd rɩka a Batseba n maan a paga.

A Zeova sũurã puuga wʋsg ne a Davɩɩde, t’a tʋm a Natã t’a tɩ togs-⁠a t’a sẽn maanã yaa yel-​wẽnde. Yãmb pa ne a Natã sẽn yas n gomd ne a Davɩɩd sɩda? A Davɩɩd sũurã sãama wʋsg ne yell ning a sẽn maanã. Rẽ n so t’a Zeova pa kʋ-⁠a ye. La a Zeova yeel-⁠a lame yaa: ‘Fo sẽn maan yel-​kãensã wã yĩnga, zu-​loees wʋsg n na n kẽ fo zakã.’ Sɩd yɩɩ woto.

Pipi, a Batseba sẽn dog biig ningã kiime. Sẽn pʋgde, a Davɩɩd bi-​kãseng a Amnõ modga a yao a Tamaar n gãand-⁠a. A Davɩɩd biig a Absalom sũurã puuga ne rẽ t’a kʋ a Amnõ. Rẽ poore, a Absalom maana a sẽn na n maaneg tɩ nebã nong-⁠a, t’a yik n yeel tɩ yaa yẽ la rĩm masã. La a Davɩɩd wa n kong n zaba ne a Absalom, t’a Absalom ki zabrã pʋgẽ. Vẽenega, a Davɩɩd zu-​loeesã yɩɩ wʋsgo.

La a Batseba wa n doga bi-​ribl tɩ b pʋd a yʋʋr t’a Salomo. A Davɩɩd sẽn wa n kʋʋl n bẽedẽ wã, a biig a Adoniza yikame n dat n deeg naamã. La a Davɩɩd kɩtame tɩ maan-​kʋʋd a Zadok ning a Salomo zugã kaam n wilg tɩ yaa yẽ la b kõ naamã. Rẽ poor bilfu, a Davɩɩd kiime. A sẽn wa n kiidẽ wã t’a tara yʋʋm 70. A rɩɩ naamã yʋʋm 40. La masã yaa a Salomo n lebg Israɛll rĩmã.