A DAVƖƖD sẽn sɩng a naamã rɩɩb Zerizalɛmmã tɛka, a Zeova kɩtame t’a sodaasã tõog bɛɛb wʋsgo. A Zeova ra pʋlmame t’a na n kõo Israɛll nebã Kanaã tẽngã tɩ b sooge. A Zeova sɩd sõng-⁠b lame tɩ b reeg tẽngã gill masã.

A Davɩɩd ra yaa na-​sõngo. A ra nonga a Zeova. Rẽ n so t’a sẽn deeg Zerizalɛm tẽngã n soogã poor bala, a kɩtame tɩ b tall a Zeova kãabg koglgã n wa Zerizalɛm. A da ratame n me wẽnd-​doog n ning koglgã be.

La kaoosg zugẽ, a Davɩɩd maana bũmb sẽn pa sõma. A Davɩɩd ra miime tɩ pa sõma tɩ f rɩk f sẽn pa so ye. La zaabr a yembre, a rʋʋ a roogã zug n na n kok pemsem, la a zĩnda be n yã pʋg-​neere. Pagã yʋʋr la a Batseba, t’a sɩdã yʋʋr yaa a Uri. A Uri yaa a Davɩɩd sodaaga.

A Davɩɩd yamã kẽe a Batseba wʋsgo, t’a kɩt tɩ b tɩ tall-⁠a n wa. A Batseba sɩdã ra kẽnga zabre. A Davɩɩd gãanda a Batseba, t’a rɩk pʋga. Yellã paka a Davɩɩd masã. A gʋlsa sebr n tool sodaasã naab a Zoaab n yeel t’a ning a Uri zabrã zĩig ning a sẽn mi t’a pa na n põsã. A Uri kũumã poore, a Davɩɩd rɩka a Batseba n maan a paga.

A Zeova sũurã puuga wʋsg ne a Davɩɩde, t’a tʋm a Natã t’a tɩ togs-⁠a t’a sẽn maanã yaa yel-​wẽnde. Yãmb pa ne a Natã sẽn yas n gomd ne a Davɩɩd sɩda? A Davɩɩd sũurã sãama wʋsg ne yell ning a sẽn maanã. Rẽ n so t’a Zeova pa kʋ-⁠a ye. La a Zeova yeel-⁠a lame yaa: ‘Fo sẽn maan yel-​kãensã wã yĩnga, zu-​loees wʋsg n na n kẽ fo zakã.’ Sɩd yɩɩ woto.

Pipi, a Batseba sẽn dog biig ningã kiime. Sẽn pʋgde, a Davɩɩd bi-​kãseng a Amnõ modga a yao a Tamaar n gãand-⁠a. A Davɩɩd biig a Absalom sũurã puuga ne rẽ t’a kʋ a Amnõ. Rẽ poore, a Absalom maana a sẽn na n maaneg tɩ nebã nong-⁠a, t’a yik n yeel tɩ yaa yẽ la rĩm masã. La a Davɩɩd wa n kong n zaba ne a Absalom, t’a Absalom ki zabrã pʋgẽ. Vẽenega, a Davɩɩd zu-​loeesã yɩɩ wʋsgo.

La a Batseba wa n doga bi-​ribl tɩ b pʋd a yʋʋr t’a Salomo. A Davɩɩd sẽn wa n kʋʋl n bẽedẽ wã, a biig a Adoniza yikame n dat n deeg naamã. La a Davɩɩd kɩtame tɩ maan-​kʋʋd a Zadok ning a Salomo zugã kaam n wilg tɩ yaa yẽ la b kõ naamã. Rẽ poor bilfu, a Davɩɩd kiime. A sẽn wa n kiidẽ wã t’a tara yʋʋm 70. A rɩɩ naamã yʋʋm 40. La masã yaa a Salomo n lebg Israɛll rĩmã.

A SALOMO sẽn wa n deegd naamã t’a yaa bi-​bɩɩga. A ra nonga a Zeova. A sak n tũu a ba a Davɩɩd sẽn sagl-⁠a bũmb ningã. A Zeova ra nonga a Salomo hal n vẽneg a meng zãmsd pʋgẽ n yeel-⁠a yaa: ‘Wilg maam fo sẽn dat bũmb ning tɩ m kõ-fo.’

A Salomo yeela a Zeova yaa: ‘Zeova, mam nan yaa biiga, m ka mi m sẽn segd n dɩ naamã to-⁠to ye. Bɩ f kõ maam yam tɩ m tõog n zã f nebã sõma.’

A Salomo sẽn kos bũmb ningã yɩɩ a Zeova noog t’a yeel-⁠a yaa: ‘Fo ka kos yõ-wok bɩ arzegs ye. Fo kosa yam. Woto yĩnga, mam na n kõo foo yam. Neb nins sẽn deng foomã ka tol n paam yam a woto ye. La neb nins sẽn na n pʋgl foomã me ka na n tol n paam yam a woto ye. Mam na n kõo foom bũmb nins fo sẽn ka kosã me. Mam na n kõo foom arzegs ne naam.’

Rẽ poor bilfu, pagb a yiib n wa n yã a Salomo n yeel-⁠a t’a welg b yel-​kãseng n kõ-ba. A yembr yeelame yaa: ‘Maam ne pʋg-​kãngã bee roog a ye pʋgẽ ne taaba. Mam doga m bi-​ribla. Mam sẽn dog tɩ rab-​tãtẽ, la yẽ me rog a bi-​riblã. La pʋg-​kãngã biigã kii yʋngẽ. La a yika yʋn-​sʋka, n dɩk biig ning sẽn ki wã n gãneg mam taoor la a rɩk mam biigã. Beoogã sẽn vẽege, mam yikame n mik tɩ biig ning sẽn be mam taoorã ka mam biigã ye.’

La pag a to wã yeelame yaa: ‘Ka woto ye, biig ning sẽn ket n vɩ wã la mam biigã la biig ning sẽn ki wã yaa fo rẽnda.’ La pipi soabã yeelame yaa: ‘Ayo, biig ning sẽn ki wã yaa fo biiga, tɩ sẽn vɩ-⁠a wã yaa mam biiga.’ B ra yas n wẽeda no-​koeemd ne taaba. La bõe la a Salomo maan-​yã?

A yeelame tɩ b wa ne sʋʋga. B sẽn wa ne sʋʋgã a yeelame yaa: ‘Pasg-⁠y biig ning sẽn vɩ wã a yiib n kõ pag a ye pʋɩ-​sʋk la b kõ a to wã me pʋɩ-​sʋka.’

La biigã ma meng-​mengã kelmame n yeel yaa: ‘Maan-⁠y sugr la y kõ-a biigã la y ra kʋ-⁠a ye.’ La pag a to wã yeelame yaa: ‘Bɩ b pasg-⁠a tɩ tõnd d yiibã fãa konge.’

Rẽ poore a Salomo yeelame yaa: ‘Ra kʋ-⁠y biigã ye. Rɩk-⁠y-​yã n kõ pipi pagã tɩ yaa yẽ la biigã ma.’ A Salomo bãngame tɩ pipi pagã la biigã ma, bala pʋg-​kãng ra nonga biigã wʋsgo, hal n sak n yet tɩ b rɩk biigã n kõ pag a to wã la b ra kʋ-⁠a ye. Nebã sẽn wʋm a Salomo sẽn welg yellã to-⁠to wã, b sũurã yɩɩ noogo, bala b ra tara rĩm sẽn yaa yam soaba.

A Salomo naamã sasa, Wẽnnaam ninga Israɛll nebã barka. A kɩtame tɩ ki, kankam ne viyn tɩɩs la rɩɩb a taab zĩnd wʋsgo. Nebã ra yera fu-​neeb la b vɩ ro-​neeb pʋsẽ. Nebã fãa vɩɩm ra yaa noogo.