YÃMB mii bũmb ning sẽn kɩt tɩ ra-​kãngã pãrsd a fuugã bɩ? Yaa a Zeova n yeel-⁠a t’a maan woto. Ra-​kãngã yaa Wẽnnaam no-​rɛɛs a Ahiza. Wẽnnaam no-​rɛɛs yaa bõe? Yaa ned Wẽnnaam sẽn yãk n kɩtdẽ t’a rengd n togsd nebã yɛl sẽn wate.

A Ahiza yas n gomda ne a Zeroboam. A Salomo ra yãka a Zeroboam t’a get meebã tʋʋm kẽer yelle. A Ahiza sẽn seg a Zeroboam sorã zugã, a maana bũmb sẽn ling a Zeroboam. A yeega fu-​paal ning a sẽn da yelgã n pãrs zĩis 12. Rẽ poore a yeela a Zeroboam t’a reeg bãmb 10 n sooge. Yãmb mii bũmb ning sẽn kɩt t’a Ahiza kõ a Zeroboam fuugã peen-​gɩrs 10 bɩ?

A Ahiza wilgame t’a Zeova na n deega a Salomo soolmã n bas-⁠a. A yeelame t’a Zeova na n kõo a Zeroboam Israɛll buud piig t’a sooge. Rat n yeelame tɩ yaa buud a yiib bal la a Salomo biig a Roboam na n sooge.

A Salomo sẽn wʋm a Ahiza sẽn yeel a Zeroboam goam ninsã, a sũurã puugame t’a baood n na n kʋ a Zeroboam. La a Zeroboam zoeeme n kẽng Ezipti. Rẽ poor bilfu, a Salomo kiime. A rɩɩ naamã yʋʋm 40. A biig a Roboam n dɩt naam masã. A Zeroboam sẽn zĩnd Ezipt n wʋm t’a Salomo kiime wã, a lebg n waa Israɛlle.

A Roboam pa rĩm-sõng ye. A namsda nebã n yɩɩd a ba a Salomo meng sẽn nams-⁠b to-⁠to wã. A Zeroboam ne tẽngã nin-​kãsems a taab kẽnga rĩm a Roboam nengẽ n na n tɩ bõos-⁠a t’a bas nebã namsgo. La a Roboam pa kelg ye. A namsa nebã n paas menga. Rẽ n so tɩ nebã kɩt t’a Zeroboam na n dɩ naam buud 10 zugu, la Bẽnzame ne Zida buudã yẽ kell n zĩnda a Roboam poorẽ.

A Zeroboam ra pa rat t’a nin-​buiidã kẽng Zerizalɛm n tɩ pʋʋs a Zeova wẽnd-​doogẽ wã ye. A maana sãnem nag-⁠bi a yiib n kɩt tɩ buud piigã neb pʋʋsd-⁠ba. Tao-​tao bala, tẽngã pida ne nin-​kʋʋr la tʋʋm-​beed a taaba.

Zu-​loees wʋsg n paam buud a yiibã nebã. A Roboam sẽn deeg naamã tɩ yʋʋm a nu, Ezipt naabã wa n zaba ne Zerizalɛm. A wʋka a Zeova roogã arzɛk wʋsg n looge. Dẽnd b sẽn da nags wẽnd-​doogã t’a yaa sõma to-⁠to wã pa yã n kaoos meng ye.

RĨM a Zeroboam kũumã poore, rĩm dãmb nins fãa sẽn dɩ naam buud 10 zugã yɩɩ rĩm-yoodo. Rĩm a Akaab wẽnemã n da yɩɩd b fãa. Yãmb mii sẽn yaa bũmb ning yĩng bɩ? Yaa a pag a Zezabɛll sẽn da yaa nin-​wẽng wʋsgã yĩnga.

A Zezabɛll ra pa Israɛll ned ye. Ra yaa Sɩdõ rĩmã bi-​pugla. A ra pʋʋsda ziri wẽnnaam a Baalle, la a ra kɩtame t’a Akaab ne Israɛll neb wʋsg me ra pʋʋsd a Baalle. A Zezabɛll ra kisa a Zeova. A kɩtame tɩ b kʋ a Zeova no-​rɛɛsdb wʋsgo. Kẽer kong n zoe n tɩ solga tãens bogdẽ t’a pa paam n kʋ-⁠b ye. A Zezabɛll sã n da rat bũmbu, a saka a kʋ ned menga.

Daar a yembre, a Zezabɛll yãame tɩ rĩm a Akaab sũurã pa noome, t’a soka yaa: ‘Yaa bõe n maan tɩ fo sũurã pa noom rũndã?’

A Akaab leokame yaa: ‘Mam yeela a Nabot t’a koos a pʋʋgã ne maam la a zãgsame.’

La a Zezabɛll yeela a sɩdã t’a ra sãam a sũur t’a na n deega pʋʋgã n kõ-a.

A Zezabɛll gʋlsa sebr n kɩt tɩ b tɩ kɩs a Nabot sẽn be tẽng ning pʋgẽ wã nanambsã. A yeela sebrã pʋgẽ tɩ b kɩt tɩ nin-​yood rõd a Nabot n yeel t’a tʋʋsa Wẽnnaam ne rĩmã, la b yiis-⁠a yɩng n lob-⁠a ne kug t’a ki.

A Zezabɛll sẽn wʋm a Nabot kũumã bala, a yeela a Akaab yaa: ‘Yik n tɩ reeg a Nabot pʋʋgã masã.’ A Zezabɛll sẽn kɩt tɩ b kʋ a Nabotã, a pa segd ne sɩbgr sɩda?

A Zeova tʋma a Zehu t’a tɩ sɩbg-⁠a. A Zezabɛll sẽn wʋm t’a Zehu watame wã, a manega a meng hal sõmã la a rẽes a ninã kɩrʋ. La a Zehu sẽn kẽ na-​zakẽ wã n yã a Zezabɛll sẽn yas fenetrẽ wã, a yeela rap nins sẽn da yas a sɛɛgẽ wã tɩ b tus a Zezabɛll n lubi. Yãmb pa ne rapã sẽn gãd-⁠a wã sɩda? B tus-⁠a lame t’a tũ fenetrẽ wã n lʋɩ tẽng n ki.