RĨM a Zeroboam kũumã poore, rĩm dãmb nins fãa sẽn dɩ naam buud 10 zugã yɩɩ rĩm-yoodo. Rĩm a Akaab wẽnemã n da yɩɩd b fãa. Yãmb mii sẽn yaa bũmb ning yĩng bɩ? Yaa a pag a Zezabɛll sẽn da yaa nin-​wẽng wʋsgã yĩnga.

A Zezabɛll ra pa Israɛll ned ye. Ra yaa Sɩdõ rĩmã bi-​pugla. A ra pʋʋsda ziri wẽnnaam a Baalle, la a ra kɩtame t’a Akaab ne Israɛll neb wʋsg me ra pʋʋsd a Baalle. A Zezabɛll ra kisa a Zeova. A kɩtame tɩ b kʋ a Zeova no-​rɛɛsdb wʋsgo. Kẽer kong n zoe n tɩ solga tãens bogdẽ t’a pa paam n kʋ-⁠b ye. A Zezabɛll sã n da rat bũmbu, a saka a kʋ ned menga.

Daar a yembre, a Zezabɛll yãame tɩ rĩm a Akaab sũurã pa noome, t’a soka yaa: ‘Yaa bõe n maan tɩ fo sũurã pa noom rũndã?’

A Akaab leokame yaa: ‘Mam yeela a Nabot t’a koos a pʋʋgã ne maam la a zãgsame.’

La a Zezabɛll yeela a sɩdã t’a ra sãam a sũur t’a na n deega pʋʋgã n kõ-a.

A Zezabɛll gʋlsa sebr n kɩt tɩ b tɩ kɩs a Nabot sẽn be tẽng ning pʋgẽ wã nanambsã. A yeela sebrã pʋgẽ tɩ b kɩt tɩ nin-​yood rõd a Nabot n yeel t’a tʋʋsa Wẽnnaam ne rĩmã, la b yiis-⁠a yɩng n lob-⁠a ne kug t’a ki.

A Zezabɛll sẽn wʋm a Nabot kũumã bala, a yeela a Akaab yaa: ‘Yik n tɩ reeg a Nabot pʋʋgã masã.’ A Zezabɛll sẽn kɩt tɩ b kʋ a Nabotã, a pa segd ne sɩbgr sɩda?

A Zeova tʋma a Zehu t’a tɩ sɩbg-⁠a. A Zezabɛll sẽn wʋm t’a Zehu watame wã, a manega a meng hal sõmã la a rẽes a ninã kɩrʋ. La a Zehu sẽn kẽ na-​zakẽ wã n yã a Zezabɛll sẽn yas fenetrẽ wã, a yeela rap nins sẽn da yas a sɛɛgẽ wã tɩ b tus a Zezabɛll n lubi. Yãmb pa ne rapã sẽn gãd-⁠a wã sɩda? B tus-⁠a lame t’a tũ fenetrẽ wã n lʋɩ tẽng n ki.

YÃMB mii rap nins sẽn be foto wã zugã bɩ? Bõe la b maanda? B rebda zabre, la rap nins sẽn be taoorã yaa yɩɩn-​yɩɩndba. La bõe yĩng tɩ bãmb pa zãad sʋʋs la kãn n na n tɩ zabe? Bɩ d ges tɩ d na bãng a võore.

A Zozafat yaa Bẽnzame ne Zida buudã rĩma. Yẽ ne a Akaab la a Zezabɛll fãa vɩɩmda wakat yɛnga. La a Zozafat ra yaa rĩm-​sõngo. A ba a Aza me yɩɩ rĩm-​sõngo. Rẽ n kɩt tɩ Bẽnzame ne Zida buudã neb vɩɩmd ne sũ-noog yʋʋm wʋsgo.

La bũmb n wa n maan tɩ nebã yɛɛse. Neb n wa n yeel a Zozafat yaa: ‘Sodaas wʋsg n yi Moaab ne Amo la Seyiir tãngã n wat n na n zab ne yãmba.’ Israɛll nebã wʋsg tigma taab Zerizalɛm n na n bõos a Zeova t’a sõng-⁠ba. B kẽnga wẽnd-​doogẽ wã, t’a Zozafat lʋɩ taoor n pʋʋs a Zeova n yeel yaa: ‘Zeova, tõnd ka tar pãng sẽn na n tõog zãma kãseng kãngã sẽn wat n na n zab ne tõndã ye. Tõnd ka mi d sẽn na n maan bũmb ning ye, d teega foo.’

A Zeova kelga b pʋʋsgã, n kɩt tɩ no-​rɛɛs a ye yeel nebã yaa: ‘Ka yãmb n so zabra ye. Yaa Wẽnnaam n so. Ka yãmb n na n zab zab-​kãngã ye. Yaas-⁠y bal n ges a Zeova sẽn na n fãag yãmb to-⁠to.’

Vẽkembeoog yibeoogo, a Zozafat yeela nebã tɩ b tẽ a Zeova t’a na n sõng-⁠b lame. A yãka yɩɩn-​yɩɩndb tɩ b na n lʋɩ sodaasã taoor n yɩɩnd n pẽgd a Zeova. B sẽn wa n kolgd zabrã zĩigẽ wã, yãmb mii bũmb ning sẽn maan bɩ? A Zeova kɩtame tɩ b bɛɛbã wẽneg n kʋ taaba. Israɛll nebã sẽn ta wã, b mikame tɩ b bɛɛbã fãa kiime.

Ad a Zozafat sɩd bãnga yam la a sẽn teeg a Zeova wã. Tõnd me segd n teeg-⁠a lame.