BIIG sẽn ki sã n lebg n vʋʋge, a ma wã sũur pa na n yɩ noog sɩda? A sũurã na n yɩɩ noog hal wʋsgo! La ned sã n ki, a tõe n le vʋʋgame bɩ? Neb n zoe n ki n lebg n vʋʋg bɩ?

Ges-⁠y raoã ne pagã la bi-​riblã sẽn be foto wã zugã. Raoã yaa no-​rɛɛs a Eli. Pagã yaa pʋg-​kõor sẽn vɩ Zarefate, la bi-​riblã yaa pʋg-​kõorã biiga. Raar a yembre, biigã lʋɩɩ bãaga, la bãagã kengame hal tɩ biigã ki. A Eli yeela pagã t’a rɩk biigã n kõ-a.

A Eli reega biigã n dʋ yĩngr doog ningã yẽ sẽn da beẽ wã, n gãneg-⁠a gãagã zug n pʋʋs a Zeova n yeel yaa: ‘Zeova, kɩt tɩ biigã vʋʋge.’ Biigã sɩd vʋʋgame! A Eli talla biigã n sig n lebs-⁠a a ma la a yeel yaa: ‘Gese, fo biigã vʋʋgame.’ Yaa rẽ yĩng la yãmb sẽn ne tɩ pagã sũur yaa noog hal t’a nintãmã rʋʋgdẽ wã.

A Eliize me yɩɩ a Zeova no-​rɛɛsa. Sɩngrẽ wã a ra sõngda a Eli. La a Zeova wa n kɩtame tɩ yẽ me tõe n maand yel-​soalma. Daar a yembre, a Eliize kẽnga Sunem, tɩ pag reeg-⁠a sãand sõma. Pagã wa n doga bi-​ribla.

Biigã sẽn wa n lebg bedr bilfu, a yika raar a ye yibeoog n kẽng a ba wã nengẽ pʋtẽ wã. La biigã wa n yika zĩig pʋgẽ n kelemdẽ t’a zugã n zabde. B sẽn tall-⁠a n kulã, a tɩ kiime. A ma wã sũur sãama wʋsgo, t’a yik tao-​tao n tɩ bool a Eliize.

A Eliize sẽn ta wã, a kẽe roog ning pʋgẽ b sẽn gãneg biigã. A pʋʋsa a Zeova, la a tẽeg a meng biigã zugu. Sẽn yɩ bilfu, biigã tĩsa naoor a yopoe n puk a ninã. Pagã sẽn kẽ roogã pʋgẽ n yã t’a biigã vʋʋgame wã, a sũurã yɩɩ noog hal wʋsgo.

Neb nins sẽn ki wã yaa wʋsgo. B kũumã sãama b zaka rãmb ne b zo-​rãmbã sũy wʋsgo. Tõnd yẽ pa tõe n vʋʋg kũum ye. La a Zeova tõeeme. Taoore, d na n goma kũum vʋʋgrã yelle.

YÃMB mii bi-​puglã sẽn yet pagã bũmb ning bɩ? A gomda a Zeova no-​rɛɛs a Eliize yelle, la bũmb nins a Zeova sẽn kɩt t’a Eliize maanã me yelle. Pagã ka mi a Zeova ye, bala a pa Israɛll ned ye. Bɩ d ges sẽn sɩng to-⁠to tɩ bi-​puglã wa be pʋg-​kãngã zakẽ wã.

Pagã yaa Siiri tẽngã neda. A sɩdã yʋʋr la a Naama. Yaa Siiri sodaasã naaba. Siiri nebã yõka bi-​pugl kãngã sẽn yaa Israɛll nedã, n tɩ kɩt t’a lebg a Naama pagã tʋʋm-​biiga.

Wãood n tar a Naama. Yaa bãag sẽn sãamd ned yĩng hal t’a nusã ne a karsã tõe n kʋrse. Bi-​puglã yeela a Naama pagã yaa: ‘M zu-​soabã sã n da kẽngẽ a Zeova no-​rɛɛs ningã sẽn be Israɛllã nengẽ, a na n maaga a wãoodã.’ B togsa a Naama bi-​puglã sẽn yeel bũmb ningã.

A Naama ra rata ne a sũur fãa t’a wãoodã maage. A yikame n kẽng a Eliize nengẽ Israɛlle. A sẽn ta a Eliize zakẽ wã, a Eliize tʋma a tʋm-​tʋmdã t’a yi n yeel a Naama t’a kẽng Zʋrdẽ kʋɩlgẽ wã n tɩ lis koomẽ wã naoor a yopoe. La a Naama sũurã puugame t’a yeel tɩ yẽ tẽngã kʋɩls sãoo Israɛll kʋɩlsã fãa zĩig sẽn zãre. A lebgame t’a na n looge.

La a tʋm-​tʋmd a ye n yeel-⁠a yaa: ‘Naaba, a Eliize sã n da yeel yãmb tɩ y maan bũmb sẽn yɩɩd woto, y ra ka na n maan sɩda? Bõe yĩng tɩ y pa na n tɩ lis koomẽ wã wa a sẽn yeelã?’ A Naama kelga a tʋm-​tʋmdã goam n kẽng Zʋrdẽ kʋɩlgã pʋgẽ n tɩ lis naoor a yopoe, la a wãoodã maaga zãng fasɩ t’a yĩnga lebg sõma.

A Naama sũurã yɩɩ noog hal wʋsg t’a lebg n kẽng a Eliize nengẽ n tɩ yeel-⁠a yaa: ‘Masã, mam bãngame tɩ Wẽnnaam ka be zĩig a to ye. Yaa Israɛll bal la a be. Bɩ y reeg m kũunã masã.’ La a Eliize yeel-⁠a lame yaa: ‘Ayo, mam ka na n deeg bũmb ye.’ A Eliize ra miime tɩ pa sõma t’a reeg kũunã ye. Bala yaa a Zeova n da maag a Naama wãoodã, la pa yẽ ye. La a Eliize tʋm-​tʋmd a Gehazi yẽ da rata kũunã.

A Naama loogrã poore, a Gehazi wudgame n babs-⁠a n tɩ yeel-⁠a yaa: ‘A Eliize n tʋm maam tɩ m wa yeel-⁠y t’a kota kũunã bilf n kõ a zo-​rãmb sẽn wa mas-​masã n na n ges-⁠a.’ A Gehazi ra yagdame, la a Naama ra pa mi tɩ yaa ziri ye. A yãka teed kẽer n kõ a Gehazi.

A Gehazi sẽn lebg n kulã, a Eliize bãnga a sẽn maan bũmb ningã, bala a Zeova togs-⁠a lame. A Eliize yeela a Gehazi yaa: ‘Fo sẽn maan bũmb ningã yaa wẽnga. Rẽ n so t’a Naama wãoodã na n leb foo.’ La sɩd yɩɩ woto zĩig pʋgẽ bala.

Bõe la woto fãa zãmsd tõndo? Pipi, d segd n gomda a Zeova yell ne nebã wa bi-​puglã sẽn maanã, bala na n sõnga neb wʋsgo. Yiibu, d pa segd n zẽk d meng wa a Naama sẽn maan to-⁠to sɩngrẽ wã ye. D segd n kelga Wẽnnaam nebã saglsã. La tãabo, d pa segd n yag ziri wa a Gehazi ye.