YÃMB mii bi-​puglã sẽn yet pagã bũmb ning bɩ? A gomda a Zeova no-​rɛɛs a Eliize yelle, la bũmb nins a Zeova sẽn kɩt t’a Eliize maanã me yelle. Pagã ka mi a Zeova ye, bala a pa Israɛll ned ye. Bɩ d ges sẽn sɩng to-⁠to tɩ bi-​puglã wa be pʋg-​kãngã zakẽ wã.

Pagã yaa Siiri tẽngã neda. A sɩdã yʋʋr la a Naama. Yaa Siiri sodaasã naaba. Siiri nebã yõka bi-​pugl kãngã sẽn yaa Israɛll nedã, n tɩ kɩt t’a lebg a Naama pagã tʋʋm-​biiga.

Wãood n tar a Naama. Yaa bãag sẽn sãamd ned yĩng hal t’a nusã ne a karsã tõe n kʋrse. Bi-​puglã yeela a Naama pagã yaa: ‘M zu-​soabã sã n da kẽngẽ a Zeova no-​rɛɛs ningã sẽn be Israɛllã nengẽ, a na n maaga a wãoodã.’ B togsa a Naama bi-​puglã sẽn yeel bũmb ningã.

A Naama ra rata ne a sũur fãa t’a wãoodã maage. A yikame n kẽng a Eliize nengẽ Israɛlle. A sẽn ta a Eliize zakẽ wã, a Eliize tʋma a tʋm-​tʋmdã t’a yi n yeel a Naama t’a kẽng Zʋrdẽ kʋɩlgẽ wã n tɩ lis koomẽ wã naoor a yopoe. La a Naama sũurã puugame t’a yeel tɩ yẽ tẽngã kʋɩls sãoo Israɛll kʋɩlsã fãa zĩig sẽn zãre. A lebgame t’a na n looge.

La a tʋm-​tʋmd a ye n yeel-⁠a yaa: ‘Naaba, a Eliize sã n da yeel yãmb tɩ y maan bũmb sẽn yɩɩd woto, y ra ka na n maan sɩda? Bõe yĩng tɩ y pa na n tɩ lis koomẽ wã wa a sẽn yeelã?’ A Naama kelga a tʋm-​tʋmdã goam n kẽng Zʋrdẽ kʋɩlgã pʋgẽ n tɩ lis naoor a yopoe, la a wãoodã maaga zãng fasɩ t’a yĩnga lebg sõma.

A Naama sũurã yɩɩ noog hal wʋsg t’a lebg n kẽng a Eliize nengẽ n tɩ yeel-⁠a yaa: ‘Masã, mam bãngame tɩ Wẽnnaam ka be zĩig a to ye. Yaa Israɛll bal la a be. Bɩ y reeg m kũunã masã.’ La a Eliize yeel-⁠a lame yaa: ‘Ayo, mam ka na n deeg bũmb ye.’ A Eliize ra miime tɩ pa sõma t’a reeg kũunã ye. Bala yaa a Zeova n da maag a Naama wãoodã, la pa yẽ ye. La a Eliize tʋm-​tʋmd a Gehazi yẽ da rata kũunã.

A Naama loogrã poore, a Gehazi wudgame n babs-⁠a n tɩ yeel-⁠a yaa: ‘A Eliize n tʋm maam tɩ m wa yeel-⁠y t’a kota kũunã bilf n kõ a zo-​rãmb sẽn wa mas-​masã n na n ges-⁠a.’ A Gehazi ra yagdame, la a Naama ra pa mi tɩ yaa ziri ye. A yãka teed kẽer n kõ a Gehazi.

A Gehazi sẽn lebg n kulã, a Eliize bãnga a sẽn maan bũmb ningã, bala a Zeova togs-⁠a lame. A Eliize yeela a Gehazi yaa: ‘Fo sẽn maan bũmb ningã yaa wẽnga. Rẽ n so t’a Naama wãoodã na n leb foo.’ La sɩd yɩɩ woto zĩig pʋgẽ bala.

Bõe la woto fãa zãmsd tõndo? Pipi, d segd n gomda a Zeova yell ne nebã wa bi-​puglã sẽn maanã, bala na n sõnga neb wʋsgo. Yiibu, d pa segd n zẽk d meng wa a Naama sẽn maan to-⁠to sɩngrẽ wã ye. D segd n kelga Wẽnnaam nebã saglsã. La tãabo, d pa segd n yag ziri wa a Gehazi ye.

GES-⁠Y rao ning sẽn be koomã pʋgẽ wã. Yell n na n paam-⁠a, bala zĩnfã rat n vel-⁠a lame. Yãmb mii raoã bɩ? A yʋʋr la a Zonase. Bɩ d ges bũmb ning sẽn kɩt t’a wa be koomã pʋgẽ wã.

A Zonas yaa a Zeova no-​rɛɛsa. No-​rɛɛs a Eliize kũumã poor bala, a Zeova yeela a Zonas yaa: ‘Yik n kẽng Niniiv sẽn yaa tẽn-​kãsengã n tɩ moon n yeel t’a nebã kongame. Bala b wẽnemã yaa wʋsgo.’

La a Zonas ra pa rat n kẽng ye. A zãgsame n yik n kẽ batayo sẽn da pa teesd Niniiv sẽnes meng ye. La a Zeova sũurã pa yɩ noog ne-⁠a ye. A kɩtame tɩ seb-​kẽeng na n fug wʋsg hal tɩ batayo wã meng rat n bõre. Rabeem wʋsg n yõk batayo wã rãmb tɩ b kelemd n kot b wẽnnaam dãmbã tɩ b sõng-⁠ba.

A Zonas wa n kong n yeel-⁠b lame yaa: ‘Mam tũuda a Zeova, Wẽnnaam ning sẽn naan yĩngr la tẽngã. A Zeova yeela maam tɩ m maan bũmbu, la mam pa rat n maan ye. Rẽ n kɩt tɩ m zoetẽ.’ Batayo wã rãmb sok-⁠a lame yaa: ‘D maan-⁠f bõe tɩ sebgã sigi?’

A Zonas yeelame tɩ b rɩk yẽ n lob koomã pʋgẽ tɩ koomã na n sigame. Batayo wã rãmb ra pa rat n lob-⁠a ye. La b sẽn wa n mik tɩ sebgã yãngdame wã, b kong n dɩk-⁠a lame n lob koomã pʋgẽ. Sebgã kell n yõka zĩig pʋgẽ, tɩ koomã me sigi.

B sẽn lob a Zonas koomẽ wã, zĩm-bedr n vel-⁠a, la a pa ki ye. A paa zĩnfã pʋgẽ rasem a tãabo. A Zonas sũurã sãamame, a sẽn zãgs a Zeova noorã n pa kẽng Niniivã. Yãmb mii a sẽn maan bũmb ning a sẽn wa n be zĩnfã pʋgẽ wã bɩ?

A pʋʋsa a Zeova n bõos-⁠a t’a sõng-⁠a. A Zeova kɩtame tɩ zĩnfã tɩ wʋk a Zonas koomã noore. Rẽ poore, a Zonas kẽnga Niniivi. Woto wilgda tõnd t’a Zeova sã n yeel tɩ d maan bũmbu, d segd n maaname.